الجمعة، ٣ يونيو ٢٠١١

الى مجهول ...!!

بعد التحيه .... الخ !!

انا حد غريب عارف حد مريب مش مفهوم .. نفر من الانفار .. صوابعى بتعلب على المزمار .. بعزف غنى لا ليه اى صوت .. بغنى واموت .. معلش اصل انا بعشق فكره الموت .. فلسفتى غريبه زى مانا غريب .. بشرب قهوة وسجاره وافرح لما اروح اشترى نضاره تمنها عشره جنيه .. بس اصل انا قيمتى مش معروفه ومش ملموسه وقيمتك هتكون اعلى من كونك حد غير معلوم ... بكتبلك وعارف انك بتفهم .. بكتبلك اقولك ان الكون معتبرنى غبى .. وانا اقتنعت بانى غبى .. هو فى الدنيا حد يبقى بيفهم .. ده كان زمانه مات منتحر .. اصل الدنيا اللى انت مش عارفها صعبه ورخمه ومش زى عقلنا ماهو عاوز .. بكتبلك اقولك لو جاى هاتلنا اله تعزف افكار فى عقلنا .. يابوى على البشر يكرهوا الموت .. وميعلموش .. وميفهموش ده الموت يابوى فى خطر منهم .. عارف ممكن تبقى انت الموت .. وفى الحاله دى اقولك اتاخرت عليا ليه .. ده كونى عايش مضايق روحى اللى مرتاحه فى كف جوه تابوت متشال فى تراب مخنوق من قعدته للفرجه على الاموات .. يا .. ياه عالدنيا لما بتدى بتدى العالم اللى بحنى ضهورهم لشمس بتحرق افكار جوانا .. افكار عايشه جوه عقولنا .. افكار عليها خيوط عنكبوت بقالوا عشرويت سنه ميت وقبلها غزل خيطه على عين عين مش بتشوف الا الموت اللى بنخاف منه .. عارف يا خوى ان الفرقه مبتزعلش .. عارف ان الفرقه فيها دموع مكبوته وبس .. تطلع بصرخه ينده عليهم الميت ويقول ..( انا مش راجع ) .. انا مش راجع تانى اكون بنى ادم عقلى تراب كلى تراب بس هموت وهورح لتراب يحينى من برد شتا من حر صيف من عين الخلق اللى عاوزة تتحرق من قله الشوف .. عارف ليه انا فرحان وانا جوه تابوت .. عارف ليه بجرى بسرعه وعمرى ما همل ولا هفوت .. لانى زهقت لانى كنت بشر .. دولقت بقيت روح .. دلوقت الخوف اللى جوايا من الموت مات معايا ومات معاه جسد محنى من العجز من الذل اللى بنشوفه فى كل دقيقه فى كل دار فى كل شمس بتتولد فى كل نهار .. يابوى سجايرى بتحرق فى صوابعى من التفكير .. من ذلى على حبه تغير فى الكون واللون اللى ميتغيرش .. اصل كده تفكيرى بسيط وعاوز اصيح واقول يا خلق يا هو .. ارحموا العبد البسيط اللى ملوش حيط فى بلكونه عمره ... اللى نفسه يعيش يشوف الكون كله اللى يموت فرحان .. اللى عنيه دايما بتقول ( انا حزنان ) وحزانا معايا كل رمشه فى جفن عيونى فى ضلوع صدرى المنهوب والمسروق من خوف الموت فى سجاره بتدبح قصر الشوق فى عقول بتبيع بتخون بتجرح وانا مشاويرى فى الحياه دخانها لونه ابيض ورمادها لا يمل من التفكير والتخدير فى عقول الخلق ... ايوه هزعق ايوه هصيح ...... انا فرحان وانا جوه تابوت .. ونهايتى معاك ياخوى انا نفسى تسلم على الكون وتقولهم فكروا تفكير يحيى عقول امحوا الذل من عرق الدم اللى نازل من على كتف صبيه ساعه عصارى فى يوم ازرق ولا اسود مفهوش نسمه هوا ترد الروح اللى انسحبت من جبينى ... نهايتى معاك

سلامات .

اللى تقوله انت ( كيمو ) .

هناك ٦ تعليقات:

Tears يقول...

انا فرحان وانا جوه تابوت .. ونهايتى معاك ياخوى انا نفسى تسلم على الكون وتقولهم فكروا تفكير يحيى عقول

اه اهم حاجة احياء العقول دى لاننا فى اشد الحاجة لافاقة الشعب

شمس النهار يقول...

خير اللهم اجعله خير

engy يقول...

بكتبلك اقولك لو جاى هاتلنا اله تعزف افكار فى عقلنا
عارف ممكن تبقى انت الموت .. وفى الحاله دى اقولك اتاخرت عليا ليه .. ده كونى عايش مضايق روحى اللى مرتاحه فى كف جوه تابوت متشال فى تراب مخنوق من قعدته للفرجه على الاموات
بجد رائع ازاى عرفت توصفها كده
باهنيك فعلا

صوت من مصر يقول...

Tears
الموت افاقه مهوله من ظلم فادح
شكرا

صوت من مصر يقول...

شمس النهار
مش عارف والله بلس خير وكفايه انى رجعت اكتب تانى ....

صوت من مصر يقول...

engy
والله ماعارف بس ممكن يبقى تاثير .. او ال .. او ال .. او هو الموضوع يتلخص فى موضوع اخر من وحى نظريات زجاجه ستلا اقريه