الأربعاء، ٢٣ فبراير ٢٠١١

من 25 يناير حتى 11 فبراير جزء ثانى

اتجمعوا العشاق فى سجن القلعه ... اتجمعوا العشاق فى باب الخلق
الجزء 2 ........
كنا فى عربية الترحيلات ومحدش كان عارف هو فين لحد ما نزلوا الطلبة والصحفيين وبما انى فاشل مش طالب فضلت وبما انى مش معايا كارنيه نقابة الصحافيين فضلت واتبقى فى العربية 10 افراد لحد ما وصل ظابط المباحث وقالنا سلموا موبيلاتكم فى الامانات وبجد مش قادر اوصف انى ملقتش اى امانه منهم ......... وصلنا لمعسكر الجبل الاحمر للدخلية وهنا دخلنا العنبر وبعدها بحوالى 4 ساعات وصلنا احلى اكل على راى هيما وسيد اليكتريك وكريم وباقى الشله وهو غدس مطحون بفول بشعرية وعيش بس بما اننا فاقدين الامل فى الخروج اقدر اقول اننا اكلنا واشترينا سجاير كوكو وشوية دخل علينا 3 وقعدوا يسالوا عن الاسامى والعناوين وكل حاجه وده كان اول تحقيق وخرجنا اتعمل معانا تحقيقات الغريب فى اول مرة ليا انى اتعمل معايا تحقيق سهل وهو كالاتى اسمك وعنوانك بس ودخلت العنبر الجديد اللى قابلنا فيه ناس تانى واتنقلنا لعنبر تالت وان عامل زى التلاجه بجد سراميك لحد ما حاولنا نعمل هيصة ودخل علينا 5 ضباط امن الدولة وبدأو بالتحقيقات وبما اننا واثقين ان فى ناس كتير بتمشى كنا شبه فرحانين لحد ما الظابط شاور عليا وقالى شفتك فين قبل كده وانا اقوله ازاى يقولى اقنعنى انك مشوفتنيش طبعا كانى غبى وحيوان المهم بقينا بالظبط 27 شخص وفضلوا سايبنا لحد الصبح ودخل ال "
Breakfast " وهو فول وجبنه وعيش وبصل اخضر تحفة وبعدها تم ادخالنا الى السجن الحربى وهنا اضربنا عن الطعام وبعد ما كنت انا عمال اضحك لاول مرة انهرت بسبب ان ال 26 شخص نامو وانا كانى لوحدى وبدأت افكر بشكل مريب المهم جالنا الظابط وبيسلم الامانات وانا كشخصى الوحيد اللى ملقتش الموبايل بتاعى وده للاسف المهم الظابط قالنا احنا هننقلكم لفين قالنا انتوا هنا 5 نجوم هناك الله اعلم باللى هيحصل ركبنا العربية ومشيت بينا حوالى ربع ساعه خارج حدود المعسكر لدخولنا لمعسكر تانى وتحقيقات كتير تانى ولكن الاكل مختلف فصوليا نافة ساقعه مش بتتاكل مع رز ومن غير معلقه ولو اشتريت شاى كان بيبقى من غير سكر ومش هتكلم عن اخر تحقيق نظرا لكمية السفالة اللى فيه واسف المهم فضلنا قفاعدين لحد ما الظابط قالنا كله ماشى الا 10 افراد والحمد لله خرجنا على الساعه 4 الفجر " جمعه الغضب " وخرجنا من المعتقل وبالاحضان ياعم حسن يا احسن ثورجى وعبد الرحمن الشاب اللى افكارنا لقيتها واحده .
الجزء الثالث جمعة الغضب فى المطرية .........................................................
معلومه شكرا لعساكر الامن المركزى فى المعسكر على حسن المعامله بجد
شكرا يا اسكندرانى على علبه السجاير
وهروح مطش الاهلى عشان اشوفك يا على .
كيمو

الاثنين، ١٤ فبراير ٢٠١١

من 25 يناير حتى 11 فبراير جزء اول


البداية يوم 24 يناير
عيد ميلادى
الازهر بارك مع روح قلبى وعيد ميلاد مكنتش متوقع انه يتم بالشكل ده
25 يناير
روحت الشغل نزلت منه على دار القضاء ومعايا كريم صاحبى وقابلت اختى هناك ومن هنا تم عمل كردون امنى بشكل بشع لدرجة انى قلت لاحد الظباط انت ليه مش متخيل ان عدد العساكر اكبر من المتظاهرين بحوالى 4 مرات ومن هنا بعد عدد من محاولات الخروج خرجنا ومن هنا قررنا نروح على التحرير المركز الرئيسى للاحداث وفعلا روحنا التحرير ومع دخولنا للميدان اللى كان بشكل سهل عكس ما توقعت هناك قابلت رجالة صنعت التاريخ بجد قابلت مجموعه قدرت تغنى وتفرح فى عز الكرب .
المهم الساعه كانت وصلت 12 مساء منتصف الليل اتصل بيا حد اعرفه وقالى فى اوامر بضرب المتظاهرين وبما انى شفت الموقف وعدد المتظاهرين قولت فى قرارى صعب ضربهم ومع تحرك اول مدرعة امن مركزى قررت اكون فى اول صف وفعلا حصل وهنا بدأت ادافع وبدء الضرب اللى بجد كان شنيع وبما انى من ذوات الحساسية على الصدر وصل بيا الحال الى حالة اغماء وبعدها حالة غريبة حصلت مش قادر اوصفها وده بسبب المسيل للدموع الفاقد للصلاحية وبعدها جالى تليفونات من ناس كتير ومدونين كتير " اسف انى مش هقدر اقول اسم حد تقريبا لانى نسيت هم مين ؟ " المهم اختى وصاحبى مش لاقيهم اتجمعنا تانى وروحنا على رمسيس ومن هنا بدء الضرب تانى وقررنا نروح وننزل يوم 26 وفعلا تم .
26 كريم بيقولى مش متفائل واختى كذلك وانا العكس نزلنا محطة رمسيس مشينا لحد دار القضاء مشينا فى مظاهرة لمده 10 دقايق بدء الضرب جرينا دخلت فى حارة سد ومن هنا بدء ضربى بشكل وقح حتى دخولى عربية الامن المركزى " الترحيلات " .
اتصلت بيا اخواتى واهلى لحد ما نزلت من العربية .................................................. ؟
البقية تاتى ...................
ج 1

السبت، ١٢ فبراير ٢٠١١

بيان رقم .................1

هرجع ادون تانى
هكتبلكم تدوين خاص بيا مع الثورة
وال3 ايام اعتقال
بعد نص ساعه
كيمو ..............
ثوار 25 يناير