الأحد، ٣٠ مارس ٢٠٠٨

الطابور اختفى ليه ؟ الاجابه عند محمد بتاع الفول




يا خبر بفلوس بكره يبقى ببلاش ده مثل بس تصدقوا ان فى مصر مفيش خبر بفلوس نهائى النهارده وانا قاعد كالعاده فى الشباك عشان اشرب الشاى بتاعى والسجاره البوكس ومستنى اتفرج على العربيه المخصصه عشان تاخد الدقيق من الفرن لكن المفاجئه ويارتنى متفجئتها العربيه مجتش ياه روحت لحد محمد بتاع الفول اهو اخد من عنده سنكوتشين بطاطس وطعميه سخنه بتكلم معاه قالى ان العربيه بتيجى باليل بصراحه زعلت لدرجه انى افتكرت انى مش هقدر اشوفها تانى كنت بحس بلذه وانا بشوفها لذه انى جبان ومش هقدر اتكلم لكن روحت الفرن تخيلوا معايه ان الفرن من الساعه 8 صباحا لحد الساعه 9 ونص محدش اشترى منها غير اتنين منهم انا سالت خالد البياع الى فى الفرن هو ايه فين الناس قالى مخلاص شوفت قدامى شولت الدقيق اقعدت اعدهم طلعوا 33 شوال ياه 33 واوووووووووووووو مش معقول ومفيش ناس وحتى العمال واقفين يشربوا شاى وسجاير فى الشارع يا جماعه انا مش مصدق لقيت احد شركاء الفرن بيتكلم مع واحد ويقولوا معندكش حد ياخد شوالين ولا حاجه الراجل قاله خلاص الناس اتظبطت يا جماعه طب فين الطابور الراجل صاحب الفرن اتكلم شويه كلام قالك ان الدقيق رخص جدا يعنى من 240 جنيه بقى دلوقتى ب 180 جنيه بس تانى حاجه ان الحكومه منعت استيراد الرز ده كلامه هو والله وان خلاص الفرن مش هيبقى ليها رقيب ولا حاجه


نرجع لمحمد بتاع الفول وبنتكلم عن اضراب 6 ابريل الراجل قالى ان لو بايدى اقفل كنت قفلت لكن المحل ملك لابويا اها وبعدين قالى ان الافران الايام دى برحتها لسه الموجه هتشد تانى وهيبقى الناس بتموت بجد عشان العيش يعنى ابقى قابلنى لو خدت رغيف فول من عندى تانى ؟


يارب احمدك واشكر فضلك ويارب يخلي الريس ويطول فى عمره لحد 2777 عشان حفيد حفيدى يشوفه ويقول ابو الهول اهو ؟


الثلاثاء، ٢٥ مارس ٢٠٠٨

تاج والله تاج

تحديث يا جماعه افتتحنا بلوج جديد اسمه بين القاهره ودبى ومعايه نهى فتافيت كلام ارجو الزياره اوك
http://dopycair.blogspot.com/
التاج ده جانى من ولاء صاحبه مدونه انا موجوده

س 1 : لو سألك غير مسلم عن نبي الإسلام بماذا ستجيبه في سطور ؟

اول حاجه هقراله كتاب الله حتى يفرق بين ديانته ودين الاسلام وثنيا اقرا له بعض الاحاديث النبويه ثم احدثه عن عظمه رسول الاسلام ونبى الرحمه وعن دين السماحه ايضا

لو اتيحت لك الفرصه لرؤيه رسول الله أى الاماكن تريد ان تقابله فيها ؟

مسجد سيدنا الحسين

وماذا ستقول له ؟

اقول له اشعفلى يوم القيامه انا واهلى ووالدى وكل امه الاسلام

مالذى ستخبره به ؟

اخبره باننا سنظل مسلمين الى يوم القيامه وسنظل على طاعه الله ورسوله وانه اجمل ما رات عينى فى حياتى

اذكر مقوله قالها النبى صلى الله عليه وسلم كنت تتمنى ان يقولها لك ؟

لكل داء دواء الا السأم ( نظرا للبوست الماضى )

هل هناك تأثير لرسول الله صلي الله عليه وسلم على "شخصيتك أو حياتك أو بيتك "إذا كانت الإجابة نعم فاذكر مثالاً ؟

طبعا لاننا الحمد الله اصبحنا عائله مسلمه ونمشى على منهج رسول الله

تمرر التاج لمين ؟؟؟؟؟

كل الموجود على القايمه بتاعت جيره وعشره

الخميس، ٢٠ مارس ٢٠٠٨

سئمت منك


عايز اكتب ومش عايز عايز احب ومش عايز عايز كل حاجه ومش قادر هل لانى اصبحت منتهى الصلاحيه او لاننى فقدت القيمه الذاتيه للانسان ولا عشان البلد اصبحت لا تهتم بالفقراء والمكدوحين بها هل البلد اصبحت بلد من يملك ومن لا يملك فهو خارجها لا يستحق العيش بها انا حاسس انى مش فى وطنى الى طول عمرى بسمع عنه من والدى وكل الناس الكبار الى دايما قالولنا ان مصر دى فيها خير لو قعدت تاخد منه مليون سنه مش هيخلص للاسف يا والدى ويا اعمامى واجدادى لم ارى فى بلدى سوى فقر وكدح وعذاب وحكومه مبيهماش غير انها تظهر بافضل صوره فى الخارج وتهتم بالاغنياء ومع ذالك لا يشفعلها من فى الخارج ولا يشفعلها الاغنياء بها كل منهم يريد المقايضه على ان يملك جزء منها فهل هى اصبحت للبيع وهل خيرها اصبح للبيع مع انى اعرف ان الخير شىء عام مش للبيع بجد عرفت معنى كلمه مهمه سوف تدون فى تاريخ قاموس حياتى وهى انى اصبحت غريب داخل وطنى واين وطنى لم اجده الا كلما استمعت لاغانى الشيسخ امام مصر يا امه يا بهيه واين هى الترحه والجلابيه فقد اصبحت بدله وجيبه واصبح من يلبس الجلباب ليس من اهلها بل اصبح يقال عليه كلمه بيئه وماذا تعنى تلك الكلمه كيلو الفول ابو سوس اصبح ب 6 جنيه مع انه اكل الفقراء او فطار الاسر المتوسطه الى اختفت اذكر انى منذ 10 سنوات كنت داخل اسره متوسطه الدخل الان اصبحت فقيرا لا املك سوى نفس داخل ونفس خارج يقول معه كلمه اين وطنى اصبح البرلمان عباره عن كرسى اصبح الرئيس هو من يهمه ان يتجاوز ال 400 قرن وهو على نفس الكرسى اصبحت اتذكر انى اقتربت من مواجه وجه الكريم وهو عى قيد الحياه يا ريس سيبنا نشوف حد غيرك هيعمل ايه سيب الهواء متبعوش سيبنا نهتم باغانى سعاد حسنى وكلمات جاهين ومنير وحليم من دون ان نشعر ان ليس لهم طعم لاننى اتذكر انى فى المدرسه كنت اكره سماع اى صوت داخل الفصل نتيجه صورتك المبجله داخل كل فصل وكانك الملك واين توضوع الصوره فوق لفظ الجلاله فوق الصبوره التى تبداء بكلمه بسم الله الرحمن الرحيم

اى ان الله سبحانه وتعالى رحيما بالناس لكنك لاتنتظر من ان اقولها لك انك لست برحيما بشعبك

بكرهك انت وحكومتك بصراحه

الأحد، ١٦ مارس ٢٠٠٨

انتهى العالم يا امى


بجد عمرى ما جبت هديه عيد ام لامى لكن فى تلك الايام كنت قد اقرر ان اعطيها هديه لكن منين فالحال ليس معى فقط بل مع كل مواطن على ارض المحروسه بهذا المعنى اود ان اقول ان هديه عيد الام فى تلك السنه ستكون رغيف عيش وستكون هديه فى منتهى الجمال وستسعد بها كل ام مصريه تحيا على تلك الارض الخمريه اللون وياه بالدنيا اذ جئت اليها بكيلو سكر ستكون هناك من يوزع الشربات فرحا بالهديه القيمه التى منذ سنوات لاتقدر بشىء لكنها فى تلك السنه تقدر بالذهب الاحمر عيار 45 سترى فرحه على وجه الوالده لم تراه من قبل والخيار الثالث زجاجه زيت من زيت التموين الذى يجلب الامراض لكن فى ظروفنا هذه فانها ليست بهديه عاديه انما هى كانك سرقت اليها احدى الاهرامات وجئت بها اليها وسترى الدموع تنهار اليها من شده السعاده وبامنه هحسدك انا شخصيا على هذا بجد سامحينى يا امى فانا لاملك فى هذه الدنيا سوى عطفك على عيد امى هذه السنه ليس بالسعيد ككل عام فانظر الى حاله الركود العام المسيطر على الدوله فى الوقت ذاته ترى كميه الكليبات ومشاهد البورنو موجوده على كل تلفاز وداخل كل منزل وياه على سيطره القدر على الموضوع فى حد ذاته سترى انك ليس لك حق فى الحياه فقد لا اقدر ان اقول غير كلمه واحده


انتهى العالم

الخميس، ١٣ مارس ٢٠٠٨

ممكن سجاره


يوم بجد مندمتش كتير عليه على قد ما انا اتعلمت منه اليوم كان طويل جدا معايا من الاخر ايه رايكم احكلم الحدوته بتعته

احمد صاحبى شغال فى مكتب اعلان ودعايه ريجستير اتصل بيا وقالى العدد ناقص تعالى اقف معايا وقضى اليوم وكده بصراحه انا قولت اروح منه يوم خروج فى حاجه جديده وخلاص روحنا بدرى شويه المهم كتب اسمى فى الدفتر وقعدت انا وواحد كان معايه وعلى فجاه كده الاقى بنات مش عارف اقول ايه لقيتهم جايين بابتسامه رخمه وزى ما تقولوا كده ووشهم واكنهم خارجين من عند ورشه دوكو بصراحه قرف يعنى ولبس ضيق جدا اكيد من الاخر الى هما اسمهم موديلز وعن فجاه لقيت واحده بتقولى معاك سجاير عايزه سجاره انا شد انتنباهى الكلامى جدا ومردتيش سالتنى تانى قولتلها لا قالتلى اوك وراحت اشترت علبه مرلبوره ابيض وجاتلى بتدينى سجاره وانا بصراحه كده مبغريش لانى بشجع منتج بلدى الحكايه مش فى البنت دى الحكايه ان اللبس والطريقه بصراحه كده فظيعه انا عن نفسى مبقولش البنت تشرب سجاير او متشربش مش فارقه الى فارق الطريقه بصراحه طريقه قذره جدا وبعدين ده كان فى الشارع وبصراحه كده مش هى لوحدها ده المجموعه كلها كانت اغلبها بتدخن دول اكتر من 200 بنت

بصراحه هو سؤال واحد بصراحه كده هى بنات مصر هيبقوا بيئه كده بدل ما نشوف الناس بتعمل ايه كويس نعمله نقلدهم فى ال ؟

بصراحه اليوم كان مغامره مش هتتكرر

الاثنين، ١٠ مارس ٢٠٠٨

التاج ده اكيد ضيق على دماغى


اول مره يجيلى تاج او انا الى رحتله بنفسى وده فعلا حظى من اجدع بنوته وربنا يستر الاجابات دى جاتلى كده من على فجاه ومحدش يزعلى منى

تقرر اداره البلوج الى هو ان ومفيش غيره تعين مجلس وزاره جديد لدوله عسلقلانيه العظمى وهيكون كلاتى

رئيس مجلس الوزاراء

د / اجدع بنوته على اساس ان التاج من عندها يعنى

وزاره الثقافه

قطه الصحراء او ديسرت كات ؟

وزاره الاعلام بتوع التليفزيون والجرايد

حنه ( اختى ) وصحفيه روشه

وزاره التعليم

نوران بنت خيخه عشان خاظر عيون شريف

الاوقاف او كبير الشيوخ فى مصر

صاحب المضيفه

صديقى وانا عارفه بقى

الصحه بتوع الحقن والسرنجات

اقدر اقول لماضه وخمسه فضفضه

العدل

فنان جولوجى والاقربون اولى

الداخليه

خالو احمد الصباغ

الخارجيه

فرنسا

والمساعد احمد سكر

الهجوم والدفاع وخط النص

احمد سمير والاغلبيه الصامته

ومى بهاء 1/2 دسه افكار

النقل والمواصلات او الكمسريه

هبه وكراكيبها

الماليه

ساعد نسرين الايمن

الاتصلات

عم احمد رفعت وقضيته الكسبانه

الزارعه

همسكها انا عشان هزرع مصر كلها تلت اصناف بانجو وحشيش وقمح

الى حب وماطلش ( وزاره الحب )

اوشن ايز ocean_eyes

ورانيا واحساسيها

والمجلس الاعلى للكلمات الرقارقه

رئيسه

ولاء انا موجوده وتختار الى عايزاه مساعدها

المجلس الاعلى للشعب او حزب الشعب

قلوب بتغنى شيماء

وعروبه من نابلس

وعلى فكره هتكون افشل حكومه عرفتها دوله عسقالنيه

بجد ربنا معاكم

الأحد، ٩ مارس ٢٠٠٨

ربنا معاكم فى الكرامه


الحياه حلوه جدا انا قولت الجو بيفكرنى باشياء كتير افتكرت من يومين ان اوزل بنت اتعرفت عليها كان فى نفس التوقيت كانت اكبر منى وانا كنت لسه فى 2 اعدادى انا عارف ان فى ناس هتضحك بس كان مش زنبى هى الى كانت بتمشى معايه بس كانت موزه بصراحه

المهم انا جاى احكى عن شىء اسمه الكرامه مين فينا عنده كرامه او حاجه زيها مفيش فضلت ادور ملقتش حد نهائى ليه دور كده على الناس هتلاقى اننا الايام دى فرن العيش يعتبر فى شارعنا تخيلوا انى بشوف عربيه سرقه الدقيق يوميا وكرامتى متخدونيش عشان اتكلم والناس ماشيه عادى احمد عز ربنا كرمه بقرشين سيادته عمل بحكمه قارون ان المال وحده لا يكفى فقرر ان يمتلك السلطه وقعد عملها خيار وكوسه حد مصرى هنا يقدر يقولى كرامته فين او هو ساكت ليه على الظلم بجد احنا اصبحنا شعب نخاف منختشيش وبصراحه الحكومه ربنا يكرمها مدعمه الحشيش عشان الناس تنسى النص صباع بقى ب 40 جنيه بس يعنى اقول ايه اربعين جنيه دلوقتى متجبش كيلو لحمه يبقى الحشيش اوفر ربنا يخليلنا الحكومه وطبعا انا احب اشكر جدو على الى عنده خروف وجنينه مليانه نجيله بجد انا حاسس انى البلد بقت كلها فيها انطباع البلاهه يعنى كل واحد بيقولك وانا مالى انا عندى عيال بجد ربنا يخليلك عيالكوتقدر تخليهم كده ماشين جنب الحيط مستنين الحيط يقع عليهم

بالنسبه للصوره اهداء لفرنسا هانم عشان تعرفى ان الجنيه ليه قيمته ؟

الثلاثاء، ٤ مارس ٢٠٠٨

ذكريات جميله


مش عارف ليه الايام دى بتفكرنى بايام بحبها هو نفس الجو بحبه جدا الناس كلها بتكرهوا لانه غريب تراب وحر وشتا فى وقت واحد وانت مش عارف تعمل ايه ممكن تمطر وفى نفس ذات الوقت الجو حر بتفكرنى الايام دى باجمل فتره قضيتها فى حياتى فى 3 ثانوى مدرسه القبه الثانويه بنين اه كنت مجنون بالخزف والرسم فعلا كنت بحس انى جوايا مشاعر كتير ممككن اخرجها كنت اخرج فى مظاهره واروح المرسم عشان امسك الطينه واحولها لتمثال وامسك ورقه بيضه وارسم فيها خيالى كنت اهرب من المدرسه عشان اخرج واعيش حياتى بلا قيود اروح الهرم اروح وسط البلد واشرب سجاير فرط على الكورنيش اعمل الى انا عايزه انط افرح ازعل ابكى لكن الجو كان بيقولى اتفائل اخرج وافتح بابك واجرى وشوف الشارع والتراب والهوا والمطر كنت فعلا عايش الطبيعه اكتر من اى وقت لانى كنت بحب واخاف من حبيبه افتكر انى كنت كل يوم اشوف عنيها كنت بحس انى متكهرب مش قادر اتكلم فعلا هو ده وقت الجو عشان اقولها وارجع اقول بطل غباء اخاف انها ترفضنى اخاف على نفسى منها اخاف ان النظره تضيع من عنيه لو قولتلها كنت ايامها بسمع اغنيه حبس النساء ليورى مرقدى فى المرسم زمايلى كانوا بيقولولى انت مجنون فى حد بيسمع يورى وكان شكلى مبهدل لكن كنت عايش الطبيعه بكل معانيها ؟

السبت، ١ مارس ٢٠٠٨

ساعه عشان 5 ارغفه عيش ؟


قبل ما اقول اى حاجه اعذرونى الفتره لانى هكون مشغول الفتره دى هحاول على قدر الامكان اشوف حل انى ادخل حتى ولو خمس دقايق يوميا

؟

طبعا مش عارف احكى الموضوع منين لان مصر كلها بتتكلم عنه لكن انك تعيش التجربه ده حاجه تانيه تخيل نفسك واقف فى فرن عيش بلدى الساعه 11 الصبح طبعا كان بدرى لكن المشكله انى كنت عايز 5 ارغفه عيش مش اكتر اول ما روحت لا مفجاه ولا حاجه دخلت فى الزحمه وقولت انا عايز ببع جنيه بس ممكن اعدى يا بنى يا استاذ يا بشمهندس ولا كان حد هنا المهم وصلت ومسكت فى الباب الحديد وكنت فى قمه السعاده لانى انجزت شىء ولكن يطلعلى راجل عنده فوق السبعين من عمره ويعملى زى ارنولد ويشيل ايدى ويقولى يلا من هنا

ونزلت تحت تانى وبقيت واقف مش عارف اعمل ايه احاول واحاول واحاول ولكن دون جدوى واحده ست عاديه زى اى ست من مصر بتقولى ممكن اعدى عند صف الرجاله ركزوا الرجاله قولتلها اتفضلى ووسعت اخدت العيش من كلمه واحده خالد العيش فين وانا واقف زى الاهبل المهم وهى نازله بتشتمنى وبتزعق وانا من الخنقه روحت مزعق ودى كانت اول مره ازعق لواحده ست وفى الاخر الرجاله تحوشنى واسكت لانى بينهم غلبان لقيت عيل صغنون كده قولتله هاتلى معاك 5 والنبى وبصراحه كده الواد طلع راجل وخد الفلوس وانا قاعد مستنى وبسمع الشيخ امام مصر يامه يا بهيه على التليفون وبقول الله يرحمه الشيخ امام ماشفش الذل ده

عيل كان واقف جنبى وانا لسه متغاظ بقالى ساعه الا ربع معقول والله لابلغ عنهم

الواد رد رد مقنع جدا هيجوا فعلا وهيخدوا ال 200 جنيه وشكرا وكان شىء لمن يكن سكت المهم الواد الصغنون نزل ومجبليش عيش مرضيش يديله اكتر من بجنيه قولت اعمل زى شمشون وانط فى وسط الناس واجيب العيش وفعلا فعلتها وجبت 5 ارغفه عيش من ابو 5 قروش تخيلوا الفرحه الى كنت فيها عشان اجيب 5 ارغفه عيش اقف ساعه حد بيعرف يزغرط

وانا مروح للبيت صاحب الفرن بيقولى هيعملوا كشك عشان الناس تشترى منه و هيمنعوا الناس تشترى من الفرن وكل واحد ليه بجنيه بس وانا طبعا بشوف كل يوم عربيه سرقه الدقيق بتعدى تاخد الدقيق المسروق تخيلت المنظر ان ممكن الكشك ده يبيع ب 5 جنيه وشكرا والباقى اتسرق يا ريس

حد يقولى ابلغ ولا 200 جنيه