الأربعاء، 27 أبريل، 2011

تعجب ليس اكثر

اتعجب كثيرا من اننا انتفضنا ولكن لازلنا كبشر مثل السابق لم نتغير ويستفزنى البعض من البشر لانهم لم يتعلموا احترام ثقافة الغير . اعلم انى احلم بمدينة افلاطونية ولكن لما لا فالحلم ما هو شىء سهل تحقيقة فكنا نحلم بالتغير وحصلت ثورة ولكن فى تغير اشخاص وليست تغير نفوس ولا حتى تغير عقول فلا اتعجب حينما كنت ذاهب الى وسط البلد يوم شم النسيم وركبت المترو وجالى صداع من كتر الموبيلات اللى شغالة زن فى اغانى غريبة والاغرب انى شفت طفل بيردد الاغانى دى ومنها اغنية مستفزة اسمها الدبوس " اى خابور الحشيش " معلش لو ابنى طلع بيغنى الدبوس ده حبيبى ... وكمان انا شارب سيجارة بنى .. واغنية العظيم اللى قال البنات اللى ماشية بحملات .......... اظن من حق ابنى انه يطلع مدمن او تاجر مخدرات لان الدبوس ده حبيبه واكيد هيمشى يغتصب اى بنت لان اغنية البنات اللى ماشية بحملات تشجعه على ده .
الفكرة هنا الغلط فى مين ..؟
1. وزارة الثقافة ......... نظرا لانه حتى الان منذ الانتفاضة مشفتش اى مكتبة مفتوحة او اى عروض مسرح شارع او اى شىء يدل على نشر ثقافتها ........... الا الافلام الثقافية اللى بتتنقل يوميا من مليون موبايل الى موبايل اخر .
2. الاهل ..... لانهم بجد ازاى سايبين ولادهم كده يتمادو فى الغلط ................ ويقولك انا عاوز ياخد حقة .. عاوزه يبقى من شباب الثورة .... هو حد قاله اننا كنا بلطجية .
3. المدارس ....... لما بتفرج على فيلم اجنبى بتشل وبيجيلى رعاش فى ودانى من ازاى الناس دى بتطور نظم التعليم عندهم عن طريق فيلم بيشرح الفكرة ولكن حتى الفيلم الوحيد اللى عملناه عن كده " كان تهيس للاسف " وبرضه لسه مفهمناش ان التعليم فى مصر عاوز يتعدل كلياَ ولابد من اعتماده على نظرية التفكير مش الحفظ .
فى الاخر مش هلوم حد نهائى ......... بس هلوم نفسى لانى لسه ساكت على كل ده ..... اختى لما ربتنى ربتنى على اغنية حاحا للشيخ امام مش على اغنية حاحا بتاعة مروى " فيلم حاحا وتفاحة "
.............................
كيمو

الجمعة، 1 أبريل، 2011

على باب قلبك


واقف حارس على باب قلبك
واقف من غير ما تعب ... من غير ملل
من غير كسوف ... واقف وانا ملهوف
ملهوف لخطوة فى دقة صامته
ملهوف لغنوة سمعها قلبى
ملهوف لكل دقة قالها قلبك
وفى عز مانا ملهوف .. مشتاق
مشتاق لسريرى اللى جوه قلبك
مرسوم فى عيونك وفى الننى
مرسوم فى بحر القلوب مكتوب على جبينى
احبك ولو فات العمر
بحبك تبقى دنيا فيها الخلود موجود
وبحبك تبقى غنوة ورسمة جوه كتاب مكتوب
مكتوب بين كفينك
مكتوب بحروف اسمك
بعطرك
بلمسه منك
مكتوب لاحلى غنوة سمعها قلبى
وهى اسمك
..........
وعشان كل ده
مليش فى الدنيا غيرك انتى
بحبك واسف
//////////////
حبيتى
وعشان تكونى عارفه ان انتى مش حد تانى
كلمة السر
" الحب مش كلمة بتتقال "