الأربعاء، 20 أكتوبر، 2010

ثقافة جديدة


بعيدا عن الرومنسية العادية
بعيدا عن الاحداث التى تصيب البشر بالشلل
ارى الان احداث مثيرة تسيطر على وضع الوطن
ولكن الجميع مننا لا يهتم بالطبقة التى تنعدم عنهم الثقافة العامة وهم بشر يعرفهم الغالب مننا فى تعاملتهم اليومية
الطبقه دى ممكن اكون انا منها وانت منها ولكن
الطبقى دى جمعت ثقافة ليهم تذكرنى بثقافة
Negro American culture والتى انتشرت بشكل مثير جدا فى امريكا وجعلت من الشباب مجموعه لا تهتم الا بالمزيكا الصاخبة وايضا ادمان الكثير من انواع المخدرات والتعامل بهمجية مع الاشياء والبشر فالسلاح معهم اينما وجدوا
ولكن فى الطبقة المصرية التى نستطيع التحدث عنها فى ثقافة جديدة " ثقافة التكاتك " وده اللفظ اللى بحب اقول عليه كده نظرا لان التكتك اصبع شغلة سهلة لكل من ليس له عمل وايضا فهو لعبة للبعض منهم فاحيانا ارى اطفال سائقين له ولكن المميز فى التكتك هو اغانيه والتى اسمعها فى اى مكان فى الشارع وايضا فى الافراح والتى تسمى ب " المهرجنات " والتى هى عبارة عن صالة ديسكو يجتمع بها الكثير من الشباب للرقص والتهيس ولكن ليس كل المهرجانات ناجحة فالنجاح مقياسه بعدد الشباب الموجوده بالفرح ولجلب العديد وجددت كروت الدعوة والتى تعتبر سهلة للكل فيحدد صاحب المهرجان شكل الكارت على دماغة وتصميمة يكون صاخب وشبابى من الدرجة الاولى ولكن ما هى كلمات الاغانى والمزيكا
المزيكا هى مزيكا " الشندرابولا " وهى المزيكا المصاحبة لكل الاغانى والتى بدأت بمهرجان العشرين او اغنية عشت حرام فى حرام
الكلمات هى من تاليف البعض منهم
"1"
يا مساء الخير عليكم وزة يحيكم
بعد مساء الخير على غفر الليل
بعد مساء النور على وزة الامور
اصحى وخلى بالك وزة ولعهالك
الكلام ده جديد من شغل العيد
معاك فلوس هتدوس على الناس هتدوس
انا عاوز حد يسمعنى عشان الجرح بيوجعنى
ــــــــــــــــــــــــــــــــــــــــــــــــــــــــــــــــــــــــــــــــ

"2"
اسمع كلامنا هنتكلم

اسمع كلامنا هنتعلم
اسمع كلامى وصحح فوق
بكره الدنيا يا صاحبى تروق
سندباد وعلاء الدين
عامل هد جامد ومتين
اللى هيجى علينا هندوسه برجلينا
واللى هيجى عليا هدوسه برجليا
الدنيا مدرسة
واحنا فيها بنتعلم
ويعيش المعلم ولسه بيتعلم
احنا لسه شباب والمزاج عناب
صحيح قلبى طيب صحيح مليان حنان
بس اللى بعنى انا بيعه وانساه لو هو مين
اكمنك حلو شوية بتزيد التقل عليا
انا ممكن اعمل زيك
بس متهونش عليا
احنا اللى ياما كتير فرشولنا الارض حرير
عشان يكون يوم
ـــــــــــــــــــــــــــــــــــــــــــــــــــــــــــــــــــــــــ

"3"
انا المعلم يلا مبحبش الهرجلة

انبح صوتى بكيفى وفى كل حته معايا سيفى
سيفى هو لسانى
ايوة كده يا وديع الكل بقى بيذيع
ارجع ياض يا عبيط اصل البحر غويط
اوعى تحلله من غير ما تسهله
الكوتش والطارة الطبلة والزمارة
سيد شيبه معاه حكاية وكل يوم جاى بروايه
اصحى من الزرازير ياعم دول كتير
عملى فيها من الهند وكل يوم مع بنت
وبتلعب بالبنات ومقضيها اشتغلات
يانهار ابيض على البنات اللى ماشية بحملات
ينفع فى شتا اوصيف
...........................
بس خلاص
احكموا انتوا
كيمو




هناك 7 تعليقات:

still-searching يقول...

لا تعليق بجد
الواحد فعلا وهو ماشي في الشارع بيسمع حاجات من الملوثات دي كتير
خلاص معادش في اي نوع من احترام الذات البشرية عندنا

ده ناتج عن انعدام الثقافة زي مانت بتقول

وفي النهاية ربنا يرحمنا برحمته

يوميات شحات يقول...

شكرا على البوست

Foxology يقول...

عادى جدا يا كيمو الواحد بيسمع حاجات عجيبة والمشكلة ان فى ناس حافظة الاغانى دى !!! انا متأكد ان المؤلف والملحن والمغنى كمان كلهم مدمنين لأن ده مش كلام ناس طبيعيين زينا حتى لو كانوا من بيئة مختلفة مش عادية او مستوى اجتماعى اقل

الذوق العام انحط فعلا والبركة فى اختراع الدى جى اللى فتح الباب للثقافة دى

تحياتى

re7ab.sale7 يقول...

مساء الورد
علي فكرة انا دخلت هنا في الاساس عشان اعرفك لاني عرفت اننا تقريبا كدة هنشتغل مع بعض في الجريدة ...
تعرف كلامك بيفكرني بالناس اللي مسميانا جيل النايتي ..يعني احنا جيل هش وميعرفش حاجة بس الناس دي متعرفش اننا برضه بنفهم ف الثقافة والحضارة واننا مهتمين بالوعي اكتر منهم واننا بس بنحارب التقاليد البالية ...زي ما في مناس لسة بتغني بحبك يا حمار واعتزري للي هيجي بعدي عشان خدت منك كل حاجة وبتموت ف تمووورة في ناس لسة بتستني فيروز في كل جيد ليها وبتعش كل قديم ليها وبتحب حليم وثومة وغيرهم من الناس اللي رفعوا مستوي الغنا بيهم وليهم ولينا ...حلو اووي البوست...تحياتي وتقبل مروري

mrmr يقول...

مساء الورد يا كيمو
بوست جميل
يعبر عن الثقافه الجديده للشباب

فتاه من الصعيد يقول...

اغاني عجيبه تحسها زي متور العربيه وداير في دماغك وانت بتسمعها :)

تحياتي

أسمعنى شكراًً يقول...

أية ياض الكلام دة
أنا سمعتة منك كتير
بس ماتوقعتش أنك ممكن تنزلة فى موضوع

والحشيش رجع يداول .
رول وولع وناول.
أوعى الغنى والكلمات .
ولكيمو أحلى التحيات .