الاثنين، 12 أبريل 2010

هنا القاهرة


كالعادة ساكتب لكن انتوا بتزهقوا منى انى دايما مش بغير الموضوع الازلى
اللى هو كره الحكومة وان مصر هى الموزه وحبى ليها قد ايه ووصفها ولكن
انا شخصيا زهقت وكرهت كده وعاوز اغير مش عارف فلما قولت اغير قولت اكتبلكم الاتى
ـــــــــــــــــــــــــــــــــــــــــــــــــــــــــــــــ.......
هنا القاهرة الساحرة العامرة اللى فيها هيلتون وجنبه بولاق
اللى فيها النيل فى المعادى وبيعدى على شبرا
اللى فيها دماء طلبة عين شمس والقاهرة
وفيها طابور سجل مدنى فى شارع الهرم
وفيها رقص وملهى ليلى يسمى بالصن سيت
وفيها قهاوى تقترب من 1265488 ولا ايه
وفيها السحر والشعوذة
وفيها الكورة وفيها سوق الجمعه وسوق الخميس والتلات
ومولد الحسين والسيدة عيشة والسيدة زينب
وحمص شام "" حلبسه "" ودخان شيشة عم احمد
وجلبية ام عصام وبقالة عم امام وبرضه لا تخلى من ماكدونلد وكنتاكى
وفيها جاد والشبرواى وعربية فول وكشرى وطاجن
وفيها تلاقى عربية قردة وعربية " خايف اقول اسمها حد يشتمنى "
وفيها كتب وكتاب ومثقفين
وفيها فرافير ومفرفرين
وفيها حسنى وابنه
وعمو حسنى بتاع الكبدة
ومارى جرجس والسبع كنائس وجامع عمرو
وفيها عرقنا على سقالات المقاولين
وفيها كبارى وفيها نواصى ومخدرات
تلك هى العامرة الساحرة الساهرة
ولولا عشقى ليكى ما كنت تذكرتك فى اى مكان لانك حتة من جوة عقلى .
كيمو

هناك 35 تعليقًا:

فتاه من الصعيد يقول...

اكيد هي دي القاهره :)

تحياتي

هراء لا داعى له ..... يقول...

طيب و أنا إيه إللى يجبرنى أحب عاهرة


ما الدنيا مليانة بلاد بنات ناس محترمين و مؤدبين و بعفافهم و شرفهم

أنا شخصيا مش عايز العاهرة دى

ستيتة حسب الله الحمش يقول...

يا عم هراء عامرة عااااااااامرة
صلي ع النبي
دي مصر واللي ابوه نسي يطبعها في قلبه ميعرفش يطبعها كبير
واللي طبعها شقيان في حبها ومش بإيده حل

كيــــــــــــارا يقول...

هي دي القاهرة :)

سجود يقول...

ههههههههههههههههههههههه
ال يعني كده طلعت من المود
ما هو كل ده بسبب اهمال الحكومه
ربنا ياخدهم
اللهم اني ماقولتش حاجه

هراء لا داعى له ..... يقول...

اااااه .....

عااامرة


واضح إن أنا محتاج نضارة على عينيا الحيوين الفترة الجاية



لكن الصراحة بمراجعة الصفات المكتوبة فوق ( عاامرة ) ــ و هى حقيقة بالفعل ــ فمعتقدش إنى جانبت الصواب أو جافيت الواقع كثيرا

dr.lecter يقول...

بكرهها علشان البشر وبحبها علشان لما تفضي منهم

richardCatheart يقول...

مصر عاااااااااامره ساهره
بحب الناس ماليانه ومبهره
جاير عليها زمنهادلوقتى مش متغندره
لكن ب100 راجل مش زى ناس مدلدله


واللى مش عجبه بلدى يغور ولو غاير ياريت مايرجعش ويتهد ويغور بردو

كلامك جميل زيك واوعى تبطل تحبها وتدوب فيها زى صبيه حلوة ماشوفتش فى جملها حد
تسلم والله
تقبل مرورى

المسلم يقول...

قل للعواذل إن رميتم مصرنا***بتخلف التصنيع والتعدين
مصر الحديثة قد علت وتقدمت***فى صنعة التعذيب والتقرين
وتفننت كى لايمل معذب***فى العرض والاخراج والتلوين

http://islamiatzidan.blogspot.com/

ريمان يقول...

ايوة هى دى القاهره



تحياتى

rovy يقول...

بما أنى أسكندرانيه جدااا بأشكرك لتعريفى بالقاهره الأم .. :)

تحياتى لك ..

عاشقة الشهاده يقول...

السلام عليكم
بفضل الله عدت بعد غياب عام كامل ع التدوين
موضوعك جميل
وياريت ربنا يثبت عقولنا ع اللى بنشوفه الحين بمصر

reem يقول...

هى دى القاهرة يا كيو اللى بعشقها

واعشق كل تفاصيلها

بس انا زعلانه منك

فين مصر الجديدة يا كيمو ؟؟؟

انت مش معترف انها جزء من القاهرة ولا ايه ؟

انا مبسوطة جدا انى اتعرفت عليك وقعدت معاك يوم الجمعة اللى فاتت
وبجد كان يو حلو سيظل محفورا في ذاكرتى

دعاء العطار يقول...

ولولا عشقى ليكى ما كنت تذكرتك فى اى مكان لانك حتة من جوة عقلى .

ودى احسن حاجه فيك

انك بتحبهاااا اووووووووووى

شمس النهار يقول...

ايه ده انت نسيت اهم حاجة

انها البلد الوحيد في العالم اللي العربيات الكارو ماشيه جنب العربيات المرسيدس والبي ام
جنبا الي جنب

:)))

شمس النهار يقول...

(( الاخ هراء لادعي له ))

فعلا بجد اسم علي مسمي

هراء لاداعي له

:((

Just waiting يقول...

انا مقتنعه ان مصر جميله وهتفضل طول عمرها جميله
حتى لو كانت حالها مايسرش دلوقتي بكرة ترجع احسن من الاول بكتير كمان

صوت من مصر يقول...

فتاه من الصعيد
وممكن احلى

صوت من مصر يقول...

هراء لا داعى له .....
اسمحلى ابسطلك شىء
واحده وحشه جدا بس دمها خفيف ووحدها حلوة ودمها تقيل جدا
تحب مين ؟؟؟؟؟؟؟؟؟

صوت من مصر يقول...

ستيتة حسب الله الحمش
عارفه يا دكتورة
اهلى ربونى على ان مصر هى الوطن اللى عمرى ما اقدر انساه لانى هموت فى ارضها

صوت من مصر يقول...

كيــــــــــــارا
مش حلوان

صوت من مصر يقول...

سجود
فى حاجات بنحبها وهى غلط
والمدونة هنا ممكن تشتمى الحكومه عادى

صوت من مصر يقول...

راء لا داعى له .....
على راى شموسه
هراااااااااااااااااء لا داعى له

صوت من مصر يقول...

dr.lecter
وانا بحب زحمتها

صوت من مصر يقول...

richardCatheart
نورتننى كتير بكلامك
بس تعبير اوعى تبطل تحبها عمرى ما هوصل له لانى عاشق ليها

صوت من مصر يقول...

المسلم
مش فاهمك

صوت من مصر يقول...

ريمان
ايوه دى تاكيد

صوت من مصر يقول...

rovy
لو انا من الاسكندرية مش هوصفها هعشق كل عمود نور لان مفيهاش تراب فى الارض
نورتينى كتير

صوت من مصر يقول...

عاشقة الشهاده
رجوعك غالى
وربنا مش بينسى حد

صوت من مصر يقول...

reem
قبل اى كلام انا اللى ليا الشرف بجد
بس مصر الجديده عاوزة مش بوست عاوز روايه

صوت من مصر يقول...

دعاء العطار
وواثق ان حبك ليها اكبر واكبر

صوت من مصر يقول...

شمس النهار
وكمان البلد اللى البشر فيها نايمين 27 ساعه فى اليوم

صوت من مصر يقول...

شمس النهار
ناس طيبين جدا يا خال

صوت من مصر يقول...

Just waiting
شوفى حكمة ربنا مقهورين وبنضحك
فعلا احنا منها وهى لينا

اتمني الشهادة يقول...

بلدي وان جارت عليّ عزيزة

جميل المقال ده والصوره معبره
وبالرغم من اشفاقي علي من يعيش في القاهره وتعجب اانني اتعب اذا اقمت فيها يومين وليس عمري كله
الا اني ائما اشعر انهم يشعرون بالحريه عن اي مكان اخر في مصر
قد يكون هذا الوصف هو السبب