الأحد، 18 أكتوبر، 2009

وشوشه ودع


يوم يوم وقد كان
النهارده نزلت المعهد واتجننت وقعدت العب طاوله كالعاده وبعدها خرجت قعدت اهزر مع باقى الناس وكده وبتاع المهم قالو هنخرج اكتر من اربعين شخص
طب هتروحوا فين قالو حديقه الحلويات ( الحيوانات سابقا ) دخلنا الحديقه وربنك ما يوعدك مشفتش فيها اى حيوات غير طاوسين دكر وواحده نتايه والدكرين بيتخانقوا عليها
المهم قولنا ندخل نقعد فى مكان وانا قاعد ومشغل اغانى وكده وبتاع ةالحياه لذيذه بخلاف البشر الغريبه اللى كانت موجوده لقيت العيال فجاه اتلمو كده مع بعض حتى الحبيبه سابو بعض وكده وبتاع ولقيت واحده فى وسطهم وكانها هنادى رجعت يا اماى بجد نفس الشكل قمطه الدماغ السودا مع جلابيه سودا ومود وكلام والشغل اللى انتوا عارفينه المهم بتوشوش الودع والكلام ده ب 2 جندى مصرى لا غير تخفيض بقى عشان احنا طلبه المهم مسكه ولد كلت دماغ الواد الواد ده جاله حاله استبهلال غير طبيعى وكان ناقص شعره يقف وعينه تبرق وبعدها اخدت 3 بنات بعيد عننا وانا كمتطفل رخم قولت ابص كده من بعيد لقيت واحده بتعيط انا بقى فى عقل بالى ( الست دى بتشتغل الناس ولا فى ايه ) المهم اتفقت مع الرجاله كلها انى انا اشتغلها او اعمل عليها حوار المهم مسكت واحد اسم شكرى وابتديت معاه كلام واخدته بعيد عننا دخلت انا وواحد تانى قالت لنا اخرجوا بعيد الواد التانى قالها فى ايه قالتله دمك زفر بصراحه قعدت اضحك المهم قولتها لو عرفت انك تمام هجيبلك الموزه ( وانا مفيش موزه اصلا ) المهم الست دى قالتلى وشوش بعد ما خدت منى 2 جنيه فضه وانا قايم بعيد عنها اوشوش بقول لواحد تخيل ممكن اعمل زى فيلم الحاسه السابعه واقولها اجرى يا نصابه يا بنت اللل قعدنا نضحك المهم وشوشت الودع وقولتله حاجه شغلانى بقالها فتره قالتلى اسمك قولتها محمد بتقولى اسم امك برئتلها عينى وقولتها لا قالتلى طب قول حووواااااا قولتلها حوا مسكت الودع كانها بتسبح وتبص وتكلمنى
قالتلى ان كتير كلام فعل ما في . وقعت فى 3 مشاكل منهم واحده مرض والتانيه كلام عليك والتالته سكتت وانا كنت فاهم لانها متتحكيش بس بنظره عينها فهمت وقالتلك رزقك واسع ( افتكرت محاسن صابر بجد ) نفس كلام محاسن انى هترزق جامد قريب وانا مش عارف وانى وده المهم حاسس ان الدنيا كلها كارهانى بس انا محبوب من طوب الارض لقيت واحد صاحبى ضحك جامد وبصلى قوى وبتقولى انت عامل مشاكل مع العسكر ( تقصد الحكومه ) انا فى عقل بالى هى الست دى بتدخل بلوجر ولا ايه المهم وقرينك السفلى قوى جدا هى بتقولى كده وانا مش فاهم وبتقولى هى مش مؤزى عامل زيك كده بتحب الخير وجواك خير كتير وكمان انت مش بتسكت على الحق وكلمه الحق على رقبتك صحابى اللى قريبين منى استغربوا جامد قوى لكلامها اخر كلمه قالتها هى الاغرب بتقولى متفتحش مندل ولا توشوش ودع ولا تقرى كف او فنجان لانك مش بتقتنع بالكلام ده كله وانت كنت جاى هنا عشان تهرج
حد يفهمنى الست دى
المهم دخلت على ايمن صاحبى قالتله انت مقصر فى قرايه القران وناقصلك 5 اجزاء وعندك حاجه لربنا وناقصلك صلاه العصر قوم وروح صليها وانت وانت وانت الواد قايم بيقولى الست دى فيها حاجه غريبه بتعرف منين
المهم انا فعلا مش بقتنع بيها
سالتها كلمه هو انت هتحبس
ضحكت ومشيت
المهم الودع كنت بقوله هو انا هعيش قصه حب امتى بقى

هناك 20 تعليقًا:

فاروق عادل يقول...

:)كذب المنجمون ولو صدفوا

المهاجر يقول...

صوت من مصر

الودعوالحاجت إللى بتقول عليها دى كلها خرافات حقيقية لوقالت شئ عن المستقبل فاكيد كاذبة ولو عن الماضى حتى لو صحيح فهى كاذبة أو ساحرة وهى فى حكم الدين كافرة أو بها قدر عالى من الذكاء وبكده تكون نصابة

لا تكترث بما تقول ولا تضع له بالا

فلا يعم الغيب إلا الله
ولن يصيبنا إلا ما كتب الله لنا

المهاجر يقول...

كان نفسى أكون أول تعليق ولاكن ملحوقة دمت بخير

wafaa يقول...

اوشوش الودع وابين زييييييييييييين

نعتبرها هزار ووقت لعب مش حاجة تشفل بالك كذب المنجمون ولو صدقوا
بس قولى الودع رد على سؤالك بايه ؟

nona يقول...

طبعا هو كذب المنجمون ولو صدقوا
حتى لو هى صادقة بس كذابة
انما فعلا حاجة عجيبة جدا
ممكن تكون جت معاها بالصدفة لانى اعرف ناس كدة
وممكن تكون مخاوية شيطان بيعرفها الاسرار الخفية ودة بيحصل كتير

انت كلمت الودع ..

بس انا بئا هقولك انت هتعيش قصة حب قريب بس بعد تفتح قلبك اللى انت قافله

ايوشة يقول...

بصرف النظر عن ان الست انها عرفت حاجات او معرفتش انا مش بقتنع بالكلام ده حتى لو صدف بعض الحقيقة
لكن انا هعلق على حاجة واحدة فى اخر البوست ايه موضوع قصة الحب دى اللى نفسك تعشها
انا كنت فاكرة الازمة دى عند البنات يعنى تلاقى البنت تقولك امتى هيجى الانسان المناسب وامتى احبه وطبعا حتى لو جه حياءها بيمنعها فى انها تعترف فى اغلب الاوقات يعنى ده لو الزمن متغيرش عن زماننا:)
انما معرفش الشباب دلوقتى كلهم هيموووووت ويحبوا بس الحب والجواز ده نصيب ومحدش بياخد نصيبه بدرى عن اللى مكتوبله

الشعب لابد له من حكومه تشكمه يقول...

جييييييييييييت:)
شوف ياسيدى دول حضرتك بيقروا وشوش الناس صح جدااااا ومن سؤال واحد تساله لجنابك تقدر تقولك حجات كتير عنك.
كنت مره فى مدينه نصر بتغدى هناك انا واصحابى وفى مكان راقى جدااا وكان فى واحده من دول قاعده على جمب واحنا ماشيين ونادت علينا وكنت انا اللى نحيتها بصتلى وقالتلى تعالى يابنتى اشوفلك الودع.
بصتلها وضحكت جدااا وقلتلها هتشوفيلى ايه باه؟
بصتلى وقالتلى كلمه وقتها عجبتنى اوى:
بصتلى جامد وقالت:هطمن قلبك:)

قوتها افتكرت فيلم العرافه وقلتلها لااااااااااااا شكرررررررررا.
(تعرف فيلم العارفه ده لعمر خورشيد ومديحه كامل لما كان ظابط ومديحه كامل كانت بتطلع فى المظاهرات وقبض عليها وحبها واتجوزها وفى الاخر ماتت هى وكل اصحابه)
المهم ان فى بداية الفيلم قابل عرافه وخلاها تشوفله الودع قالتله:
بحر الحب مليان دم ياولدى ولو نزلته هتغرق فيه:(

وال هتطمن قلبى ال الا بذكر الله تطمئن القلوب ياعم.

بالنسبه لسؤالك لا تقلق هتحب اول متلاقى واحده تدخل تقعد وتستربع فى قلبك وتحتله هتعرف انك بتحب علطول.

ريمان يقول...

كذب المنجمون ولو صدفوا



هما بيعرفوا الحاجات بطريقه معروفه اوى


هى بتكون مخاويه جن


والجن ده بيمسك القرين بتاعك ويقعد يقرره عشان يعرف عنك كل شىء


وهى بقه بتنجم او بتحاول تتوقع اللى جاى


لان ميعرفش الغيب الا رب العالمين

حنان الشافعي يقول...

متسألهاش ولا تستناش
هيجي لوحده وانت مش واخد بالك

:)

dodoo يقول...

ازيك يامحمد

كذب المنجمون ولو صدقوا

مهما تحس انهم عارفين عنك كل حاجه فاكيد هى كدااااااااااابه وطبعا معروف هى ايه عند ربنا باللى بتعمله ده

forevar يقول...

فاروق عادل
مين قال صادقين

forevar يقول...

المهاجر
للاسف فعلا مش بصدق

forevar يقول...

المهاجر
حاول مره اخرى

forevar يقول...

wafaa
سكتت خالص
وابين زين

forevar يقول...

nona
انا قلبى برسم البيع
ابيعه
حد يشترى
هههههههههههههههههههههه

forevar يقول...

ايوشة
على فكره مش بتفرق ولد ولا بنت فى اى حاجه غير البطاقه

forevar يقول...

الشعب لابد له من حكومه تشكمه
ايه ده تفائل هنا وعندى
شيمو متنسيش احنا الاتنين اكسبيرد

forevar يقول...

ريمان
برضه مش هصدقها نهائى

forevar يقول...

حنان الشافعي
هاخد بالى من ايه

forevar يقول...

dodoo
على اساس انى مصدق مثلا