الثلاثاء، 9 يونيو 2009

رجل المستحيل


قبل ما هكتب اى حاجه الى هكتبه ده لا يعبر عن واقع نفسى ولا عن اكتئاب ولا عن اى حاجه انا حاليا بعيش فتره سعاده ( سعاده وحدانيه ) حد فيكم فكر يعنى ايه رجل المستحيل كنت بسمع اغنيه لمغنى اسمه مودى بتتكلم عن كده وشد انتباهى الموضوع جدا ان كل شاب مصرى مطلوب منه انه يبقى راجل المستحيل فى خلال اوقات بسيطه ؟ يبقى عنده عربيه او موتسيكل او عجله وسيبك الشقه والجهاز طب الجهاز ممكن يتقدر عليه طب الشقه حد عارف اسعار شقق ( منه لله الى فى بالى واسمه ابن عز ) طب الشاب بيشتغل بكام الى بياخد 800 جنيه بيقول انا معايا فلوس وتخيل ال 800 جنيه هيكفوه كام يوم سيبك من ده هو بعد ما اهلى يصرفوا عليا دروس خصوصيه وملازم ودراسه ومصاريف فى الاخر اطلع موظف اقبض 250 جنيه ليه يعنى عشان المعاش طب ياعم سيبك من الميرى وخش على الخاص هتشتغل ايه وبكام والوقت قد ايه ؟؟؟؟؟؟؟؟؟؟؟؟؟؟؟؟؟؟؟؟ الموضوع كبير والاجابه هتكون كلاتى 1 :: لو جالك الميرى اتمرمغ فى ترابه ومش هتحقق حاجه 2:: خليك فى الخاص وموت نفسك ومش هتحقق حاجه 3:: ولا ده ولا ده واقعد اشيش على قهوه وبعدها هقى بلطجى وربنا يوفق انا احترت حد يقولى المفروض ان كل شاب يبقى رجل المستحيل بجد

هناك 49 تعليقًا:

الشعب لابد له من حكومه تشكمه يقول...

اييييييه ده استنى بس انت عملت نيولولك ولا انا بتهيألى؟؟؟؟يانهارى على الزهايمر.
عموما انا اعرف رجل المستحيل انه ادهم صبرى عارفه ايون اللى بيضرب 100 فى وقت واحد ويوقع الطياره وهو واقف وبيتنكر ويغير شكله وبيحب منى توفيق ومش عارفه يتجوزها:))
مش مطلوب من اى شاب غير انه يلاقى شغل وبس وبكده هيكون رجل المستحيل قبل متتكلم عن الشقه والمرتب شوف هتلاقى الشغل اصلا الاول ولا لا ولما تلاقيه تباه بكده انت ادهم صبرى رجل المستحيل:)

الشعب لابد له من حكومه تشكمه يقول...

بثثثثثثت,,لا انا بس حبيت اقولك انى تانى تعليق كمان وياريت بس تقولى انت عملت نيولوك ولا انا الزهايمر خلاص تمكن منى:))

ايوشة يقول...

:(
انا مكتئبة خلقة يامحمد والله ربنا يصلح الاحوال

عمرو يقول...

طبعا أسئله مفحمه .. و لكن هو المطلوب فقط أن الاٍنسان يعمل اللى عليه و يسيب الباقى على المولى يدبرها بمعرفته ..
اٍعمل اللى عليك .. يعنى المطلوب منك حسب كل مرحله فى العمر و تأكد أنك لو أنجزت المطلوب على الوجه الأكمل حتلاقى باقى الأمور بقت سهله و ميسره ماتعرفش اٍزاى ..
ربنا مع الجميع و تقبل تحياتى و تقديرى ..

شمس النهار يقول...

شوف ياكيمو
اليأس مابيعملش حاجه اكتر من انه يدخل الانسان في دوامة الفشل
يعني ممكن تبتدي تعمل حاجه صغيره بس ايمانك بالله واملك في توفيقه يخليك تنجح والحاجه الصغيره دي تنجح جدا

لكن لو ابتاديتها وانت ياجت يامجتش هيسخطوك ياقرد ماعنديش مانع يعملوني غزال:)

انت ماسمعتش علي الولد اللي في الساحل من حوالي 15 سنه اللي عمل مشروع البطاطس المحمره

كان في بنوته ماشفتش في رفعها وقلة جسمها
حصل لها ظروف مش لطيفه
عملت ايه علشان تكمل دراستها
راحت اشترت تي شي رتات
من مصانع النسيج واللي هي درجه تانيه

وعملت تصميمات وطبعتها
واشتغلت بالخرز البسيط عليها
وابدعت وادخلت عليها مواد كتير
ماشاء الله دلوقتي عندها محل وبنتين بيشتغلوا تحت ايدها
انا مش بديك محاضره
عشان انا عارفه انك مابتقعدش ساكت وبتحب تشتغل دايما

انا بس بحب اذكر
وربنا لما قال في كتابه الكريم
ذكر قالها للمؤمنين
ماقلش للمسلمين
عشان يكون المعني اعمق

صباحك فل
وسعاده وجدانيه:)

Israa El-sakka يقول...

أنا مع شمس النهار يعني الموضوع مش أنك رجل المستحيل أنت كشاب مش مطلوب منك يبقى عندك 21 سنة مثلاً و عندك حياة فول أوبشينز لكن المطلزب منك أنك تشتغل و تتعب و تسعى الميري راحت عليه من زمان يا كيمو و مبقاش يجيب همه فالي هوه أن تعمل أقصى ما عندك و تسعى و زي ما بيقولوا أسعى يا عبد و أناأسعى معاك ..لكن الإحباط لا بيودي و لا بيأخر للأسف الحياة أمتحان مسنمر يعني شقى يتخلله أوقات راحة مشكلتنا كشباب أننا عاوزين ننبسط 24 ساعة 7 أيام و ده طبعاً مستحيل

سلاااام و مستنية جديدك

enjy يقول...

اولا مبروك النيو لوك دة

ثانيا مش مطلوب منك تبقى رجل المستحيل ممكن نكتفى بانك تبقى راجل وبس وسيب المستحيل فى حاله..

يعنى اعمل اللى عليك وسيبها لله واللى يطالبك باكتر من قدراتك فكك منه..

سلام يا كيمو

enjy يقول...

كيمو...صلح الجملة اللى فى البانر

دربك قريب من دربنا..درب اللى هو الطريق..صلحها والنبى

مصعب صلاح يقول...

السلام عليكم

ربنا هيصلح الاحوال ان شاء الله

الزمن الطيب جاي يا منصور

تقبل مروري

kmt يقول...

السلام عليكم ورحمة الله وبركاته

هههههههههههه
مش عارفه اقول لك ايه
رأي شمس في الجول

مبعدين ما انت معاك فلوس اهه تقعد ع القهوة وتشيش
طب حوشهم ياعم وحجر على حجر D:

عارف كتاب
the secret
السر
كتاب حلو جدا اقراه
هايغير شويه والله اعلم

كله هايعدي ياكيمو بالذوق بالعافيه هايعدي

سلام

تحياتي
الى اللقاء

romansy يقول...

على رايك يا كيمو
لا دا مرتاح ولا دا مرتاح
المشكله يا كيمو انك علشان توصل لازم تكون كداب غشاش منافق بتاكل رئيسك فى الكلام وتنكون انسان مش كويس علشان يرضى عنك
لا يا كيمو احنا علشان نكون رجل المستحيل فيه حل صغير قوى اننا منفكرش غير فى اللحظه اللى عايشينها ونحقق فيها اللى مقدناش نحققه فى حلمنا طبعا

صوت من مصر يقول...

الشعب لابد له من حكومه تشكمه
على ما اظن انى ممكن اشتغل لكن انا بعرض حاله لشباب معظمهم بيفكر كده صح

صوت من مصر يقول...

الشعب لابد له من حكومه تشكمه
نعم انه ليس زهايمر يا سيدتى
انا عملت نيولوك بس ربك يسترها مش عجبنى

صوت من مصر يقول...

ايوشة
الموضوع ملوش دعوه بالاكتئاب يا ايوشه

صوت من مصر يقول...

عمرو
استاذ عمرو
جيلك بجد كان جيل سهل جدا شقق تلاقى ورخيصه
طيبه موجده وناس واهل وشغل وكل حاجه
احنا سيبنها على المولى عز وجل
شكرا

صوت من مصر يقول...

شمس النهار
اتولا انا مش مكتئب ولا ياس ولا محبط ولا ولا ولا بعرض حاله لاغلب شباب مصر ولا رايك انتى ايه
انا عجبتنى جدا قصص الكفاح دى كلها
وانا مش اقل منهم بس ده من 15 سنه
تخيلى الزمن ممكن يكون اتغير ولا ايه رايك بقى
عموما تعليقك حائز على اعجاب المدونه كلها
والصوره كمان بجد نفسى اشوفها ملعلعه فى شموس النهار عندك
شكرا على النصيحه

صوت من مصر يقول...

Israa El-sakka
اسراء انا مش بقول كده
انا بقول اننا ممكن نشتغل 10 ساعات يوميا وبصدق جدا بس اخد مرتب ياهلنى انى اكون انسان اقدر اتجوز واشيل فلوس للزمن ولا ايه رايك

صوت من مصر يقول...

enjy
واى شاب بيدور على شقه حاليا ومعاه فلوس مش هيبقى رجل المستحيل
انا سيبها على ربنا
ويارب
وشكرا

صوت من مصر يقول...

enjy
غيرتها خالص وبلاش احراج بقى

صوت من مصر يقول...

مصعب صلاح
انت بتتفرج على مسلسلات احمد عبد العزيز كتير صح

صوت من مصر يقول...

kmt
مش لاقى رد على كلامك بس هو لازم اعيش حياه ضنك لانى مصرى يعنى مشربش شاى على قهوه ولا امشى واخرج زى بقيت الناس انا مش بطلب رفاهيه انا بطالب بحقى كمواطن انى الاقى شقه وعروسه وعفش وشغل

صوت من مصر يقول...

romansy
للاسف لا انظر ابدا الى المستقبل لانى عارفه كويس
ربنا يسترها علينا

Bola 7elmi يقول...

هههههههههههههههههههههه
معليش محمد بس بجد لقيت انو مينفعش اقول حاجه غير انو اضحك على اللي حاصل .
اصل انا مش عاوزا ابكي على حال شعبك يا مصر .. وشبابك خاصة

ربنا يكون فـ عون الشباب :)

شمس النهار يقول...

كيمو الصوره جميله جدا تسلم ايدك
وابلغ رد اني وضعتها في المدونه
كلمة شكرا مش كفايه:)

kmt يقول...

السلام عليكم ورحمة الله وبركاته

ايه انت خدت كلامي افش ليه كده
والله دا كان هزار

عموما ياسيدي اقعد مترح ما تحب
ع القهوة ع الشاى على حاجه ساقعه علشان الحر مترح ما تحب

تحياتي
الى اللقاء

yoyo يقول...

صباحك سكر يا كيمو

العنوان فكرنى بـ ( رجل المستحيل ) للرائع ادهم صبرى
هو المفروض يكون الشاب عنده مواصفات خارفة يعنى عشان يقدر يصمد و يعيش و الله النهاردة كنت بتكلم مع زيل ليا وهو متعاقد ( شغال بالعقد يعنى ) قى وزارة الصحة تتخيل مرتبه ممكن يكون كام ؟!!
190 جنيه يا محترم كل 3 شهور !!!!
وربنا انا مش كنت مصدقة يعنى فى الشهر 60 جنيه طيب يعمل بيهم ايه دول و تقولى تراب الميرى
حتى تراب الميرى مش بقى نافع و لا كان بيكون لناس اه و ناس لاء

و الله يا كيمو وهو سبحان الله له عنده امل و شغال و بيدور على حاجة تانية
يعنى الياس و الاحباط هيخلونا زى مااحنا محلك سر
احنا نحاول نعمل اللى علينا و اللى فيه الخير لينا ربنا يقدموا

وبعدين تعالى هنا و اللى مش بيحب يشيش يعمل ايه يعنى ينحرف ولا ينحرف يعنى
ههههههههههههههه
خلى عندك ثقة فى نفسك و فى ربنا

بالنسبة لشغل المدونة النقاشة و الكلام دا بجد تسلم ايدك وابقى ساعدنا احنا غلابة برده
ربنا يسعدك و يسعد قلبك يارب
تحياتى
يويو

صوت من مصر يقول...

Bola 7elmi
عارفه وانا كمان بضحك
بس الناس بتقول عننا محبطين بالعكس ان بنتكلم عشان نلاقى حل
شكرا لابتسامتك

صوت من مصر يقول...

شمس النهار
انا مش محتاج كلمه شكرا من امى

صوت من مصر يقول...

kmt
المشكله انى انا كمان بهزر
وللاسف انا م مكتئب ولا حزين ولا ولا بس انا بعرض لحاله يواجهها الشعب
وقولت فى الاول او الاخر دى اغنيه سمعتها
عموما
ازعلى متزعليش لازم تعلقى هنا كتير ماشى
ههههههههههههههههههه
بهزر بعا بس يهمنى رايك

صوت من مصر يقول...

yoyo
بصى بقى يا يويو هقولك معلومه الولد الى بيقبض 60 جنيه فى الشهر بيشترى بيهم يوميا 2 جنيه مصروفه
25 قرش 5 ارغفه عيش بعد 7 ساعات فى الطابور
50 قرش طعميتين
25 قرش باكو شمعدان على الفطار
50 قرش 3 سجاير لو كان مدخن لو مش مدخن هيحوشهم
واهو برضه حوش
والله لو انا اموت نفسى احسن بس الحمد لله الامل موجود
وياستى انتى تامرى بايه فى موضوع النقاشه وانا تحت امرك

norahaty يقول...

كلامك مضبوط ياكيمو
وللاسف الشديد كل
كلامك مضبوط :(

norahaty يقول...

حلو التغير
مبرووووووك

Foxology يقول...

مهو احنا اتولدنا علشان نبقى شعب المستحيل مش رجل المستحيل بس

تحياتى :)

aidy يقول...

يعنى هو فى كل الاحوال مش هتحقق حاجة

يبقى متحاولش بقي

بس فى ناس بتحقق وبيقدروا يكونوا رجل المستحيل

عايزين نعمل موضوع عنهم ونعرف هما عملوا كده ازااااى

عشان نمشي وراهم جايز نحقق حاجة

وان غلب حمارنا نسأل نبيل فاروق ..:D

ايوشة يقول...

كل شاب مصرى مطلوب منه انه يبقى راجل المستحيل فى خلال اوقات بسيطه ؟ يبقى عنده عربيه او موتسيكل او عجله وسيبك الشقه والجهاز طب الجهاز ممكن يتقدر عليه طب الشقه حد عارف اسعار شقق ( منه لله الى فى بالى واسمه ابن عز ) طب الشاب بيشتغل بكام الى بياخد 800 جنيه بيقول انا معايا فلوس وتخيل ال 800 جنيه هيكفوه كام يوم سيبك من ده هو بعد ما اهلى يصرفوا عليا دروس خصوصيه وملازم ودراسه ومصاريف فى الاخر اطلع موظف اقبض 250 جنيه ليه يعنى عشان المعاش طب ياعم سيبك من الميرى وخش على الخاص هتشتغل ايه وبكام والوقت قد ايه ؟؟؟؟؟؟؟؟؟؟؟؟؟؟؟؟؟؟؟؟ الموضوع كبير والاجابه هتكون كلاتى 1 :: لو جالك الميرى اتمرمغ فى ترابه ومش هتحقق حاجه 2:: خليك فى الخاص وموت نفسك ومش هتحقق حاجه 3:: ولا ده ولا ده واقعد اشيش على قهوه وبعدها هقى بلطجى وربنا يوفق انا احترت حد يقولى المفروض ان كل شاب يبقى رجل المستحيل بجد




بذمتك كل ده ومش اكتئاب امال الاكتئاب يكون ايه :(

صوت من مصر يقول...

norahaty
تمام انك مقتنعه بكلامى
بس سؤال
هو ده يسمى باكتئاب

صوت من مصر يقول...

norahaty
الله يبارك فيكى

صوت من مصر يقول...

Foxology
تانى اتفاق يا فوكس على اننا اتظلمنا
مش اكتر صح

صوت من مصر يقول...

aidy
ماشى موافقك انى هحاول بس مش صعب مش هقول مستحيل
بس صعب
عموما انا عمرى ما قريت راجل المستحيل تخيلى بقى

صوت من مصر يقول...

ايوشة
والله انا لو مكتئب مكنتش بفكر دلوقتى انى لازم اقوم اخلص الى هعمله وكمان بسمع بلاك تيما والحالع عال عال
وكمان بشرب سجاير مستورده من ام 5 جنيه
حاجه تانى
تشربى شاى

yoyo يقول...

صباحك سكر يا كيمو

يا نهار ابيض
انت كمان طلعت الولد ممكن يحوش
شوية شوية و تقولى بعد 10000 سنة كدا يقدر يخطب و يتجوز
احنا اللى ناس وحشة صح
ههههههههههههههههه
و الله هم يبكى وهم يضحك
ربنا يستر علينا يارب

بعد الف شر عليك الحمد لله انا فيه امل
تسلم يا غالى يارب مش انحرم منك ابدا
تحياتى
يويو

عمرو يقول...

لا و الله يا كيمو جيلى شاف الأمرين يعنى على الأقل دلوقتى فيه شقق قانون جديد لكن على أيامى ماكنش فيه غير التمليك و أى تعم الشقه التمليك الرخيصه كانت فى حدود 15 ألف جنيه لكن ده كان مبلغ خرافى وقتها قياسا لأن كيلو اللحمه كان ب 6 جنيه و أكبر مرتب للخريج كان 30 جنيه ..
كمان جيلى كان لسه خارج من حرب أكتوبر اللى سب4ته حرب الاٍستنزاف و اللى كانت على طول بعد حرب 67 يعنى كانت ظروف البلد عيضه أوى و يكفى أنك تعرف أنك علشان تعمل مكالمه لاٍسكندريه مثلا من القاهره كنت تروح تبلغ السنترال و تاخد دور بعد يوم و لا أتنين !!
شىء مضحك مش كده ؟؟
بس الحقيقه أن جيلى زى ما أنت بتقول كان فيه شىء مختلف بيتماشى مع طبيعة الحياه وقتها ..
شىء من الاٍخلاص و حب الناس لبعضها اللى كان بيهون كتير من الأمور ,, يعنى ماكنتش غابه يأكل فيها القوى الضعيف بل و يأكل القوى اللى زيه كمان لو قدر ..
ربنا يسهل الحال .. بس شوية تفاؤل يا كيمو برض :)

hager za3bal يقول...

البلطجه هي الحل :))))

mizohart2010 يقول...

السلام عليكم
ازيك يا كيمو سبها على الله ياغالى
و اكيد فرجه قريب متفكرش كتير
تفتكر لم تفكر حتعرف توصل لحل
الحل عند ئلى بايده الامر

صوت من مصر يقول...

yoyo
والله يا يويو انا متفائل وعارف ان بان الله فى امل بس اقنعينى انه زميلك بيقبض كده ازاى
يبقى ليه يحوش

صوت من مصر يقول...

عمرو
استاذى بجد كده من غير هزار كلامك كله تمام ومقتنع بيه
بس ساعه الحرب مكنش الحرامى هو الى حاكمك بالعكس كان زعيم الامه ناصر مخلى البلد فى احلى اوقاتها لحد ما جه انور السادات وراه وكان بيرفع الاسعار بس بيرفع المرتبات وفاكر ده كويس وكان ايام حرب وخروج من ايام الحرب وكده
فعلا انا مش مكتئب ومش عاوز احلف لانى حلفت كتير

صوت من مصر يقول...

hager za3bal
انتى شايفه حل واحد وهو البلطجه
انا عن نفسى شايف حل تانى معاه وهو التطرف الدينى
دى تبقى مصر سنه 2012
(:::

صوت من مصر يقول...

mizohart2010
ميزو بجد مش عارف اقولك ايه انا سايبها على الله
وكمان معلش لازم افكر كتير عشان احس انى عايش وموجود على قيد الحياه مش ميت
نورتنى

mizohart2010 يقول...

فى دعاء جميل اوى بيقول (ربنا ولا تحملنا مالانا طاقه بها) يعنى فى حاجات اكبر من طاقتنا لاننا مش بنوصل ليها لحل عمله زاى اللامتناهى فى الرياضه كل لم تفتكر نفسك وصلت تكتشف انك موصلتش لحاجه يعنى حتعرف تغير نصيبك حتعرف تغير القدر لو كان خير او شر حتعرف تغير نفسك لو شايف انك فيك عيوب و عاوز تصلحها