الاثنين، 8 سبتمبر، 2008

كل سنه وانت طيب ياريس يا ؟


زمن الكابوتشا بجد اه او زمن الخص وكله بيجيب اسهال والبامبرز خلص من السوق واحنا اصلا عاملين مقاطعه وبنستعمل المنتج المصرى الى بيسرب وبيعمل تسلخات بجد اه يازمن سمعت خبر الدويقه وبامانه كده عادى ولا اثر لانى اخدت على النصايب فى البلد دى وشويه اسمع خبر سجن اسيوط والمهزله ومن الاخر المساجين على حق وافتكرت فيلم سلفستر لما كان مسجون والمامور فضل يعذب فيه بس مامتش وشويه وتسمع ولا اقولك هسمعك احلى خبر فى الدنيا ممكن تسمعه ان السد العالى الى بناه المصريين بجهد وعرق وعبد الناصر تعب وكافح عشانه وعبد الحليم غنا وقال قولنا هنبنى وادينا بنينا السد العالى ( مش الحضرى ) للاسف السيد رئيس مملكه مر المتحده مع اليهود مشغل فى السد العالى خبراء اسرائليين وسمعنى سلام رافت الهجان و جمعه الشوال وفى الاخر العميل 1001 وكمان سمعنى سلام رجل المستحيل رجل المهام الوسخه عارفين انى والله بضحك وانا قاعد اكتب البوست يا جماعه الخبر ده على مصراوى وبجد مع انى فرحان جدا وسعيد الايام دى محبتش ازعل نفسى وقولت عادى ما هى بقت كوسه والى زرعنها خبرا اسرائليين اصلا لا بنعرف نزرع ولا حتى نبنى يا ريس يا ريس انا وساره عايزيين نتجوز ممكن تدينى ربع المرتب الى بيخدوا الخبير الاسرائيلى الى بيعرف اكبر اسرارنا ياريس ساره مقاس رجلها بقا 52 من كتر اللف على الكورنيش ومش بنقزز لب عشان غالى ناس كتير هتقولى انت احبط تانى هقولهم لا خلاص بقت عاده ايه الجديد اننا عايشين مع يهود وايه الجديد لما نسمع اخبار فلسطين والعراق ولبنان والشيشان والسودان وليبيا وايران بجد ياريس انا كويس ومهيس وبسمع اغانى بسمع احلى اغانى كمان اغانى حب حب لمصر حبى لساره حبى لاهلى ومش زعلان واعمل الى انت عايزه وانا وانا بفطر كل يوم صدقنى من غير حلفان بدعى عليك وعلى امك يا ابن ؟ ولا حرام رمضان بقى

كل سنه وانت طيب ياريس

هناك 23 تعليقًا:

Sometimes يقول...

عارف احلى ما فى الموضوع ايه؟؟؟
سارة
ايه الجمال ده
ربنا يبارك لكم يارب
كل سنه وانت طيب
وحاول تنسى ربنا يخليك
انا عارفه كلكم شايلين الهم ليه... الرجاله يعنى
بجد بتتعبونا معاكم وبنزعل علشانكم ومش بعيد بنكتئب
سيبوها على الله

M.K يقول...

ربنا يخليلك ساره...
ويجعلها دائما لك من الهم سّاره..


وخليها على الله ..
قل حسبي الله وهو نعم الوكيل..

blue-wave يقول...

بقولك ايه
انت بتحب نوع ايه فى الحلاوة الطحينيه:))

shirry يقول...

مش عارفة اقول ايه
بس وانت طيب يا باشا

enjy يقول...

ارغى اقول ايه طيب بعد اللى انت قلته؟؟؟؟
اقوللك........سلم لى على سارة والله دى احلى حاجة فى الموضوع والقرف اللى احنا عايشينه دة

Dr/Salma يقول...

السلام عليكم
معلش مكتوبلنا نستحمل و زي مبيقولوا يا مصبر الوحش علي .....
تحياتي

elsha3er يقول...

انت كدة عمرك ما حتغيرحاجة على فكرة لان افكارك نفسها مشوشة انت بتهاجم لمجرد الهجوم على شخص انت ما بتحبهوش لكن مش عشان تغير وتتغير انا اسف دة رأى من غير زعل

احمد الشاعر

Heba يقول...

رمضان كريم يا محمد

أصبر لعله خير

كل سنة وأنت طيب

خديجة محسن "لؤلؤة الاسلام" يقول...

ما شء الله مدونة متميزة

تدل على صاحبها
و البوست رااااااااااائع
و تحيااااااااتى
رمضان كريم

غير معرف يقول...

فى خلال الثلاثين عاما الماضية تعرضت مصر الى حملة منظمة لنشر ثقافة الهزيمة - The Culture of Defeat - بين المصريين, فظهرت أمراض اجتماعية خطيرة عانى ومازال يعانى منها خمسة وتسعون بالمئة من هذا الشعب الكادح . فلقد تحولت مصر تدريجيا الى مجتمع الخمسة بالمئه وعدنا بخطى ثابته الى عصر ماقبل الثورة .. بل أسوء بكثير من مرحلة الاقطاع.
هذه دراسة لمشاكل مصرالرئيسية قد أعددتها وتتناول كل مشاكلنا العامة والمستقاة من الواقع وطبقا للمعلومات المتاحة فى الداخل والخارج وسأنشرها تباعا وهى كالتالى:

1- الانفجار السكانى .. وكيف أنها خدعة فيقولون أننا نتكاثر ولايوجد حل وأنها مشكلة مستعصية عن الحل.
2- مشكلة الدخل القومى .. وكيف يسرقونه ويدعون أن هناك عجزا ولاأمل من خروجنا من مشكلة الديون .
3- مشكلة تعمير مصر والتى يعيش سكانها على 4% من مساحتها.
4 - العدالة الاجتماعية .. وأطفال الشوارع والذين يملكون كل شىء .
5 - ضرورة الاتحاد مع السودان لتوفير الغذاء وحماية الأمن القومى المصرى.
6 - رئيس مصر القادم .. شروطه ومواصفاته حتى ترجع مصر الى عهدها السابق كدولة لها وزن اقليمى عربيا وافريقيا.
ارجو من كل من يقراء هذا ان يزور ( مقالات ثقافة الهزيمة) فى هذا الرابط:

http://www.ouregypt.us/culture/main.html

حزينه يقول...

كل سنه وانت طيب يا ريس
على وجع قلبنا
كل سنه ياريس وانت تابنا ومجوعنا ومنزل دموعنا
كل سنه وانت معانا دايما ومش راضى تسيبنا يا ريس


حزينه

عايش ولكن يقول...

اييييييييييييييه
قررت اكون لوحدى
من غير ما اقول يا بلدى
والعن جدود ابوها
لو مست شعره منى

خلاص هسيبها مخضره
للريس فله منوره
يلعب ويبرطع فيها
مهو خلاص جابها لوره

تقول مهما تقول
يهود او حتى مغول
كلمه ومتقولش لحد
مبقاش فينا عقول
من العجن واكل الفول

عابرة يقول...

اولا: كلام نوعا ما جميل ومضحك الي كتبته
ثانيا: الف مبروك ليك ولساره
ثالثا: وانت طيب يا سي ريس
رابعا: بتمنى يكون مروري على مدونتك خفيف

قلوب بتغنى يقول...

صباح التهيس
انت شكلك اتجننت من الجوع
ولم نفسك وركب البت توك توك بدل ما هتخدها وهى عندها فلات فوت

Desert cat يقول...

كل سنة وانت طيب يا محمد
على فكرة موضوع الخبراء الاسرائلين ده طلع اشاعات كدب يعنى مش فى خبرا فى السد العالى اسرائليين وبرضه موضوع التكديب ده كان تانى يوم مباشرة على مصراوى
سلاماتى لسارة بقى وقولها لا تياسى من رحمة الله فى ناس كتييييييييير كدا
ده الصين ياراجل حصل فيها انهيار زى الدويقة بالظبط
عرفت ان مش انت وسارة بس اللى مش عارفين تتجوزوا فى الصين الشقيق ناس زينا كدا

WhItE HeArT يقول...

كل سنة وانته طيب ياكيمو


ارجع بس لروحك اللي كانت في البوست اللي فات كده وهدي اعصابك وان شاء الله خير

تحياتي

engy يقول...

البوست رائع والمدونه بسم الله ماشاء الله تحفه ربنا يخليلك ساره بس الحمد لله انكو مبتاكلوش لب لانه بيتخن على الفاضى بالنسبه للدويقه اعتقد بقه الموضوع عادى جدا اننا نسمع عن الاف ماتو فى اى مكان ممكن نزعل شويه وبعدين نروح نكمل باقى حياتنا عادى جدا يلا سلام

مختار الجندى يقول...

صوت من مصر

مدونه جميله

وننتظر منك الزيد

dina يقول...

زى ما تقول كدا نحسنا بعيد عنك....

كلمتى يقول...

بوست جميل جداً

بحب انا المواضيع السخنه دى

بس ان شاء الله يامحمد هزورك بعيش وحلاوه

بس ادعى ان الحلاوه ماتغلاش

engy يقول...

ماشاء الله مدونه رائعه على فكره
احسن حاجه انكم مابتاكلوش لب لانه بيتخن على الفاضى سلملى اوى على ساره

أية الشقية الشعنونة يقول...

بص يا محمد انا زعلانة من الكلام ده
لما تدعى عليه انتا مش هتستفيد حاجة
ومش هتوصل للى انتا عاوزة
متدعيش على الحكومة انا ضد ده جدا
انا مش بهزر
تخيل لو دعيتله مش دعيتله بس قلت ربنا يهديه للفى صلاح للبلد
مش لو الدعوة دى استجيبت ده افيد ليك وللبلد
لما تدعى عليه الله اعلم مين هيجى بعده
وشكلها لابنه وربنا يستر
ادعى ربنا يهدى الحكومة علينا وتتقى الله فينا قول يارب لو فيه خير خليه ولو مفيهوش بدلنا خيرا منه
لكن اف رض دعيت عليه فباظ حاله اكتر مهو بايظ وبردو مسابش الرياسة يبقا اشطة على الاشطة اللى احنا فيها
لكن تخيل لو ربنا هدى الحاكم ونور بصيرته مش هيخلى فيها حاجة وحشة هو اللى فى ايده ينضفها بسسسسسسسسس
ربنا يهديه ..
عموما اختلاف الرأى لا يفسد فى الوز مهلبية على رأيى مدونة صديقة
ههههههههههههههههه
رمضان كريم

أختكم فى الله يقول...

أول زيارة ليا لمدونة حضرتك

اسلوب هايل وموضوع رائع

كل سنة وحضرتك طيب

تقبل مرورى