الخميس، 21 أغسطس، 2008

نضحك على روحنا



مع ظلمات الحياه بعيش هى متضحكش ليه لكنى بضحك على نفسى واقول لنفسى عيشى كلها يومين وتقضى لكن اليومين دول هتعمل فيهم ايه يازم قولى تسيب الدنيا تخنقنا من جنيه مطحون لمواطن كادح يموت يعيش كادح حاسس كانى ورقه واتحرقت وطايره فى الهوا محروقه فى وسط فراش الوان واشكال لكنى فى الاخر ورقه ملهاش اى قيمه لانى ذنبى انى اتولدت فقير اتولدت فى مصر اتولد عربى اتولدت مسلم اتولدت وبعدها كبرت بدلع لانى طفل وابكى لانى طفل واضحك على نفسى وهبلى لانى طفل واكبر وادخل مدرسه حكومه كلها ولاد ناس ماشيه تحت الحيط بعد ما الحيط اتهد علينا وعليهم وعلى كل واحد عش فى بلد ليست للفقرا بل الفقرا لها ولحكمها خدامين لكن جوانا سلاطين وملوك ولكن بنضحك على نفسا المدرسه فيها عيال والريحه بيرسول فعال لكن عادى ما احنا ولاد 9 ولا ايه هنموت نعيش كده والناس بتاعت زمان عايزينا نكون جيل المستقبل بتاع خالو جمال لكن للاسف احنا شباب مقرح دار علينا الزمن واخد من كل واحد فينا حته من جحوه قلبه وساب له دنيا مش حببها كارهه اخره يا فاشل يا ناجح واتسجن لانه ملوش ضهر وعجبى على ده زمن ودى بلد ودى مدارس وده تعليم وفشلى ورقصنى على مزيكه الناجح ينزل ايده وهتلاقينى متعلق من ايديه برقص على سلم خشب فى بيت قديم والعنكبوت دخل جوه عينى غماها بلد مهما عملت فيها بتحس انك فاشل صحيح ؟


مش لاقى نفسى


محمد كمال

هناك 15 تعليقًا:

غير معرف يقول...

وانت كده بقى مش بتضحك على نفسك ؟!
وكل اللى بتقوله مش مبررات لنفسك ..عشان تفشل اكتر واكتر ..
لو الكلام ده بيريحك .. هقولهولك.. انت فاشل ..اصلك مصري ..وفوق كده عربي ..دي صفة لوحدها فيهم لعنة اقولك حاجة كمان ..مفيش فايدة ..والامل مش في بكرة ولا فى السنة اللى جاية حتى .. حد قالك تتعلم فى مدارس مصرية..يعني كنت شفت حد دخلها
وفلح ..؟!
هاه ..مبسوط ؟!
كده احسن ..خليك واقعي يا راجل..بلاش تضحك على روحك
..بقولك صحيح..
هو انت عندك كام سنة ؟مممممممممم
مش لازم تبقى كبير يعني عشان تعرف اكيد ..ما هي بتبان من أولها ..مش بيقولو الجواب بيبان من عنوانه ... بعدين ما البلد كلها كده ..انت يعني غير خلق ربنا ..
بقولك ..ما تاخدها من قاصرها وتتوكل على الله ..مستني ايه؟!

عارف الكلام اللى قلته انت فوق ..كان ممكن اقبله من واحد عنده 90 سنة ..بيحتضر على سريره ومعملش حاجة عدله فى حياته ...كان هيدخل دماغي ..انما انت بقى..شفت ايه ؟؟ قول يمكن اقتنع ..اصلي هبلة برده ولسه مشفتش حاجة..
عموما ..ربنا معاك .. ويا رب تلاقي نفسك ..
peace

كلمتى يقول...

هى الدنيا كده يامحمد وبالذات الزمن بتاعنا ده


معاه يدوس على اللى معهوش

كبير يستغل صغير

قوى ياكل ضعيف

امال اسمها دنيا ازاى حاجه كده لو اتاملت للى بيحصل فيها

هتحس اد ايه هى حقيره واد ايه هى مش تتعاش

والقرف والزهق والاكتئاب بقت سمه مميزه لينا خلاص

انا لما بتكون فى حاجه مفرحانى مابيعديش اليوم وتلاقينى اكتئبت بسبب او من غير

بس مش معنى ان ظروفنا وحشه اننا نستسلم

ياانا ياظروفى ومش معنى انك حاليا مش لاقى نفسك انك هتفضل كده

ومش معنى ان احلامك حالياً مش متحققه ان انت مش هتقدر تحققها بعدين

وافتكر دايماً

ربك لما يريد احلامنا هتتحقق وكلامنا هيتصدق والغايب هيعود

وباذن الله انت ترجع محمد اللى نفسك فيه

وتحقق كل احلامك

امتى ؟

لما ربك يريد

كلمتى يقول...

لانى ذنبى انى اتولدت فقير اتولدت مصرى اتولدت عربى اتولدت مسلم

ذنبك انك اتولدت مصرى .. دى معاك فيها


اتولدت عربى .. دى كمان ليك حق فيها

لكن ذنبك انك اتولدت فقير

ومين قالك انك لو غنى كنت حققت احلامك

مين قالك انك لو غنى كنت هتعيش سعيد

ربنا مقسمها يامحمد

انا زياده عنك فى حاجه اكيد هتلاقى نفسك زياده عنى فى حاجه تانيه

اما بقى ذنبك انك اتولدت مسلم

فده مش ذنب خالص بالعكس ده فخر ليك

كفايه انك تصحى من النوم كده وانت مؤمن باللى خلقك

دى على مااعتقد اكبر نعمه فى الدنيا

اننا مسلمين

باذن الله هتحقق كل احلامك وتيجى فى يوم تقرى الكلام ده وتضحك

وتقول ياااااااااااه ده ايه الاكتئاب

اللى كنت فيه ده

بس انت ادعى ربنا

رحــــيـل يقول...

مش عارفة اقولك ايه بس مسيرها تروق وتحلى حاول وبلاش يأس اكيد طول مانت بتحاول في امل انك توصل

المشكله ان الايام كلها شبه بعضها

dina يقول...

الله الله الله...ايه الجو دا يا محمد...بص ابويا علمنى حاجة حلوة اوى...علمنى اخد من الحاجة احسن ما فيها مهما كانت وحشة....و دا احسن حل لينا دلوقتى اننا نحاول نستفيد من اى حاجة ممكن تكون كويسة حتى لو رافضين نظامها و دا اكتر حاجة يتطبق عليها الكلام دا التعليم طبعا..انما انا بردو لسا عندى امل فى بكرا و كلامك دا اول طريق للنجاح و اول خطوة للتغير بس احنا نعمل اللى علينا بس يا محمد و انا و انت و كل واحد فى بلدنا ممكن يعمل فرق لو بدأ بنفسه
ماتيأسش كدا

Gannah يقول...

محمد
يا رب تكون بخير
كل سنة وانت طيب
مش عارفة اقولك ايه غير ان قيمتك كبيرة عند الناس اللى بيحبوك
وان شاء الله عند ربنا
كلنا بنمر بلحظات اليأس دى بس متخليهاش تسيطر على حياتك وتفكيرك
لان الرزق ده من عند الله اولا وسيرزقك الله من حيث لا تحتسب
كن على يقين من ده
انا عارفة ان الظروف اللى حوالينا مهببه بس يعنى علينا نعمل اللى نقدر عليه ونقول يا رب
والباقى مش بادينا
تحياتى

alshared يقول...

أيه يا كيمو
أيه المنطق الحزين واليأس ده
مش متعود منك علي كده
أكيد كلنا مرينا بالحاله دي قبل كده
بس أكيد فيه أمل
بص حواليك
فيه ناس ظروفها مستحيله وعايشه وعندها أمل

أهم حاجه الأمل

ربنا يوفقك يا كيمو

قلوب بتغنى يقول...

محمد
انا عارفه ان كل الى انت قلته صح
بس ده مش مبرر ابدا للاستسلام للياس
دور يمكن متلاقيش نفسك دلوقت بس الاكيد كمان انك مش هتلاقيها برده بدين لو بطلت تدور عليها
مش مهم المده المهم تلاقيها

sameh يقول...

مدونتك جميلة أوي يا محمد وربنا يوفقك

canary يقول...

شوف يا بنى لو اعترفت انك فاشل
وان لو ليك حلم يبقى عمرة ما هيتحقق
ولو ان الظروف وحشه يبقى عمرها ما هتتحسن وتقبلت الواقع دة وتعايشت مع الحقيقه دى هتبص تلاقى انك ارتحت جدا ونفسيتك هديت لأنك مبقاش عندك أمل عشان يضيع ويجبلك اكتئاب ولا ظروفك هتسؤ اكتر من كدة والقهرة تموتك وهتلاقى السلام النفسى مليك وتبص تلاقى نفسك بتقول انا ريشه
استحمل وبص حواليك هتلاقينا كلنا طايرين جنبك
سلام

صاحب المضيفة يقول...

ايه ياعم الكئابة دي كلها


ربنا يسعدك ويبدل غمك فرح وسرور



سلام يا صاحبي

دواير يقول...

أنا بصراحة مش هعلق عشان ما عنديش رد على اللي كتبته ده كله, لكن هقول حاجة واحدة بس نفسي أخل المدونة هنا قريب ألاقي موضوع يدعو للتفاؤل شوية, أنا مش عارفة ليه كل المواضيع اللي كتبتها في الفترة الاخيرة كده!!!!!!!!!!!

Ahmed El-Agouz يقول...

مش عقولك انت كبر الموضوع ولا هلوم عليك علشان جو الكأبة اللي انت عايش فيه
ولا هقولك ان احنا عملنا بلدنا شماعة نعلق عليها عيوبنا
ولا هقعد فوق برج عالي واعطيك نصائح

مشاتمة
شتم رجل حمار فقال له يا غبي
فرد عليه الحمار وقال اصمت يا عربي
احمد مطر
كان الله في عونك وعوننا وربنا يفرجها عليك وينور طريقك وتخرج من المود ده بسرعة
العجوز

مدحت محمد يقول...

ربنا يفرج همك يارب


ويبلغنا واياك رمضان

وكل سنة وحضرتك طيب

mero-moory يقول...

السلام عليكم ورحمة الله وبركاته

تعرف اسلوب طرحك للكلام اللي عايز تقوله لو اتعدل شوية هتتقرب من اسلوب الاستاذ صلاح جاهين
بالنسبة لمضمون موضوعك هقولك حاجه واحده

لا يغير الله ما بقوم حتى يغيروا ما بأنفسهم
ابدأ بنفسك حاول وافشل بس الأكيد إنك هتنج ادي كل حاجه واتعلم كل حاجه وأكيد هتحصد من العمل في الاخر كل حاجه وان فشلت مرة ورا مرة أكيد هتكون اخر مرة فيها نجاح فيها فلاح فيها وصول للقمة
لا تلوم وتقول عجبي على الزمن قول عجبي على البشر ماهو الزمن هو الزمن والبشر أصبحوا حجر مرة بشر بعيونهم يتعالوا وبفلوسهم يمشوا ويختالوا ومرة بشر بايديهم يطولوا النجوم بس ضاعيني في الدنيا م الهموم
يبقى ع الاقل لوفشلت في تعليمك او عملك

تقول الحمد لله انك نجحت بضميرك وبراحة بالك

ربنا يوفقك يارب

في رعاية الله