الاثنين، ٢٢ سبتمبر ٢٠٠٨

تاج بمعنى انا


التاج ده جالى من بلوج اجمل ايامنا بجد بلوج جميل وشكرا جدا لصاتحبه البلوج اختكم فى الله ؟
نبتدى ولاشويه لانى خايف اكتبه لانى كتبته وقبل ما اسيفه النور قطع فيلا بقى وتوكلنا على ربنا ؟

1- الحالة الجسمانية بمعنى هل سيادتك تتمتع بصحة جيدة ولا الاخ صاحب مرض ؟

انا مرهق بدرجه جيد جدا وهموت وانام بس هنعمل من الشغل للبيت ومن البيت للقهوه ومن القهوه للبيت ومنها للشغل ؟

بس بجد تعبان بس مرضى مش معدى
2-الحاله الاجتماعية بمعنى هل علاقتك بمن حولك جيدة ولا عامل مشاكل مع طوب الارض ؟

على ما اظن لا لانى صريح فوق اللزوم والناس بتحب المجامله وانا ضد المجامله لانى مش منافق مبعرفش اكذب احيانا ؟

3-الحاله العقلية بمعنى هل تشعر ان عقلك يعمل ولا حضرتك منيم دماغك ؟

عقلى زى عقل الطفل لدرجه انى بتكلم وانا نايم من كتر التفكير بتعب احيانا وبقول لنفسى هو انا ليه بفكر

4-الحاله العاطفية مش محتاجة تفسير ومش عايز استعباط ؟

كل الى متابع البلوج عارف انى مرتبط بروحى ساره عاطفيا بس مش مخطوبين وادعولنا

5-الحاله الروحية بمعنى هل علاقتك بربنا كويسة ولا الكلام على ابو لهب ؟

هو مش ابو لهب ولا الشيخ الشعراوى لكن علاقتى بربنا ده خاصه جدا بنفسى

الخمس اسئلة اللى جاية دى اسئلة متنوعة

الاول : اكتر عيب فيك ونفسك تتخلص منه ؟

انى لو عايز حاجه هتجنن عشانها وكتير بفشل وبكره الاكتئاب مع انى صديقى اللدود

الثانى : ايه الحاجة اللى عملتها وندمت انك عملتها قوى ؟

ايامى الى فاتت من عمرى من غير ما افكر اعمل حاجه

االثالث : اية الحاجة اللى لسة معملتهاش وحتموت وتعملها ؟

انى اكون انا مش حد تانى بمعنى احقق نفسى فى حاجه بحبها

الرابع : اكتر دعاء بتقوله وبتردده دائما؟

اللهم اغفر لى ولوالدى

الخامس : لو عرفت انك هتموت دلوقتى وقالولك اخر حاجة نفسك فيها ايه ؟

انى اقول لا اله الا الله محمد رسول الله وان ساره تكون جنبى عشان يبقى اخر حد شفته عينى

اخيرا التاج خلص

عموما بهديه لكل الى هيرد ويعلق بس بجد ارجو منكم تعليقات مش مجاملات

للعلم الصوره الى فوق دى صورتى محدش يخاف منها

هناك ١٣ تعليقًا:

engy يقول...

انت حتموت وتنام طيب ما انت ممكن ماتروحش القهوه وتنام فى الوقت ده
حاول تسترخى وبلاش تفكير يعنى روح نام
وكانك مفيش وراك اى حاجه
شيل كل حاجه من دماغك
وربنا يخليلك ساره ان شاء الله
كويس انك تصر على حاجه معينه نفسك فيها ولما تفشل حاول تانى و ايه يعنى
مفيش حد فى الدنيا كلها مبيتضايقش او يكتئب لان الاكتئاب ده يعتبر حاله معينه بنكون فيها مع نفسنا وخواطرنا واعتقد ان دى حاجه مفيده
بس المهم انها متسيطرش علينا وتبقى عاده
لاننا حنضيع وقت يعنى مرحله وهتعدى
كويس انك تندم على اللى فات من غير تفكر تعمل حاجه علشان تستغل اللى جاى
وان شاء الله تحقق اللى نفسك فيه بس انت حدده ابتدى ان شاء الله باول خطوه تحددها
تحياتى ليك ولساره

أختكم فى الله يقول...

اولا شكرا جداااا على حل التاج

اجابات هايلة والله

ربنا يسعدك
ويجمعك بسارة ان شاء الله ويكرمكم ويرزقكم الذرية الصالحة ويبارك فيكم

صوت من مصر يقول...

engy
يعنى ايه مروحش القهوه ازاى يعنى وهضيع ساعتين من وقتى ازاى لازم اقعد واشربشيشه خوخ وشاى باكيت سكر بره لازم الدنيا تبقى كده ؟
وبجد هفكر انى اخد يومين اجازه وانام

صوت من مصر يقول...

اختكم فى الله
؟احلى دعوه من احلى اخت
شكرا جدا على التعليق وعلى التاج

Mona Shereif يقول...

جميل اوى واجابات مختصرة وفى الصميم
والله مش بجامل اهو
ربنا يجمعك انت وسارة على خير يارب عاجلا ليس اجلا يارب العالمين
وتكون الزوجه الصالحة ليك اللهم امين
ربنا يوفقك الى ماتحبه وترضاه
وتحقق كل اللى تتمناه ياااااااااارب

عايش... ولكن !!!! يقول...

روح نام يابنى
اجاباتك مختصوره اوى بس بتنجز
عموما ربنا يسعدك ويجمعك انت وساره على الخير
دمت بكل خير

canary يقول...

عاوز تعليقات بجد ومش مجرد كلام وخلاص حااااااااضر
بص يا احمد انت انسان كويس والله بس كئيب شويه زى ما قولتلك قبل كدة
وعلاقتك بربنا طبعا شئ يخصك وحدك ومحدش ملاك وكمان محدش أبليس
بالنسبه ل سارة اللى انت اكلت دماغنا بيها ان شاء الله ربنا يكرمك ويكرمها وتتربطو ببعض بس اللى ميعيطش بعد كدة
واحلى حاجه فيك بقى انك مخبطتش حد بالتاج وسبته مسئله اختياريه
تحياتى يا فيلسوف

كلمتى يقول...

ازيك يامحمد

بمنتهى الصراحه وبدون مجاملات

اكتر عيب فيك اللى انت ذكرته انك هتتجنن على الحاجه وبعدين بتفشل

انا مش شايفاه عيب خالص

لان مين قال ان النجاح لازم يكون من اول او عاشر مره

حاول لحد ماتحقق ولو حتى فشلت ومادام هتجنن عليها يبقى مش لازم تستسلم

اكتر صفه بقى عجبتنى انك صريح ومش بتجامل

لأن الصفه دى بتخلى الواحد ياخد منك الرأى وهو واثق ان ده هو رأيك

وأخيراً كل سنه وانت طيب

صوت من مصر يقول...

Sometimes
دعوه جميله جدا ومكنتش بحلم بيها ؟
بجد ربنا يخليكى
وياربيحققلك دعوتك الى فى البلوج عندك ؟

صوت من مصر يقول...

عايش ولكن
عارف خير الكلام ما قل ودل ولا لازم ارغى على الفاضى
شكرا يا بيس

صوت من مصر يقول...

canary
تصدقى انا بجد غلطان انى فعلا بجيب سيره حد بحبه بس انتى لو عارفه معنى الحببجد انك تحسى انك بدل ما تتكلمى عن نفسك تتكلمى عن الى بتحبيه اكتر ؟
عموما انا مش زعلان وخلى عصافيرك تطير بقى

صوت من مصر يقول...

دودو
مش عارف الرد على تعليقك ايه بس كفايه انك اقرب صاحب ليه فى التدوين ولا فى مانع
عموما كل سنه وانت طيبه ؟

Unknown يقول...

حلوة اجاباتك صريحة جدا... يا رب يااااااااااااااااااارب يخليلك سارة ويخليك ليها بجد يارب تفضلوا تحبوا بعض على طول