الثلاثاء، 17 يونيو، 2008

ورقه بفره


على ورقه بفره

على ورقه بفره لفيت احزانى

وعلى ورقه بفره شربت انا همومى

وعلى ورقه البفره طلع منها دخان غضبى

ورقه بفره بطعم التوت ورقه بفره وانا فرحان وهموت

ورقه بفره اه كلها شر

ورقه بفره بتمحى ساعه كلها حزن

ورقه بفره رسمت عليها احلامى

ورقه بفره بطعم التفاح

ورقه بفره وانا لسه زى مانا مش مرتاح

ورقه بفره مش زعلان ولا فرحان

ورقه بفره ساعه عصارى

ورقه بفره فيها كل همومى

ده مش عيبى ولا عيب غيرى ده عيب زمن وللعلم الزمن هو ورقه بفره ممكن تتمحى فى ثانيه مع الدخان ؟

اولا انا مش بشرببانجو ولا بحشش عشان الاسم لكن الحياه فعلا ورقه بفره ؟

هناك 22 تعليقًا:

dodda يقول...

يمكن يكون صح الكلام
الدنيا اصغر من كده كمان

بس انت ليه زعلان ..لسه بدرى اوى
مشوارك طويل
حافظ عالبفره اللى فاضله

اذا كانت الحياه بفره
فلنمتنع جميعا عن التدخين
فانه ان لم يحرق حياتك يحرق حياة الاخرون!!!

Son of Egypt يقول...

ازيك يا ايها الصوت المصرى
بس مش ملاحظ ان الصوت فى نبرة حزن
وبعدين ايه حكاية التدخين دى حاجه غريبه على فكره اخر بوست عندى عن التدخين
ومعلش انا عارف انى مقصر مع الكل بس ظروف شغلى
تحياتى ليك والى كل صوت مصرى عااااااالى ومش مبحوووووووح

أية الشقية الشعنونة يقول...

خايفة اقوللك خليها على الله
تفهمها بمعنى قضيها واهى دنيا وبتاع
لأ توكل على الله ومن يتوكل على الله فهو حسبه وامشى صح اتحدى الدنيا وفكر مش لازم تفكر هتبقا ايه بس فكر تبدأ ازاى؟؟
لا تقل متى اصل ولكن قل كيف ابدأ
تحياتى

محمد حلمي مخلوف يقول...

اخي العزيز قصيدتك حلوه جدا ومعبره
بس ياريت متكررش كلمة ورقه بفره كده علي طول علشان مبوظها
وهذا رأيي وياريت متزعلش مني

صاحب المضيفة يقول...

يانهار يا عم محمد


انت اختزلت الدنيا كلها في ورقة البفرة

وانا عمال اقول الوحد بيخس من ايه


هو كلام رايق يا باشا

لكن انا مش عاجبني التشبيه


لكن يالا ملحوقة في غيرها ان شاء الله


تحياتي

Gannah يقول...

طب مش تراعى الجهلة اللى زى حالاتى وتقلنا يعنى ايه ورقة بفره
عامة انا استنتجت انها اللى بيلفوا فيها التبغ او الحشيش ولا ايه؟
انت عارف رأيى فى التدخين ومش هكرره علشان متزعلش
بس ايه الحزن الفظيع ده؟
دا انا عاجبنى اللى كتبه فى اول المدونة
اسكن بيوت الفرح اه ممكن
اسكن بيوت الجرح لا ممكن
دا انت طلعت ساكن بيوت الجرح والحزن والاحباط مش بتفكر تعزل؟
تحياتى

دواير يقول...

بيتهيألي هعلق نفس تعليق جنة وأقولك راعي الجهلة اللي زي حالاتي وقول يعني ايه ورقة بفرة,بس برضه انا استنتجت انها اللي بيلفوا فيها الحشيش...وبرضه زي ما جنة قالت بعيدا عن رايي في السجاير اللي قلتهولك قبل كده..بس بلاش نرمي كل حاجة على الزمن عشان نبرر أخطاءنا..ومع ذلك عجبتني حكاية الزمن ورقة بفرة دي.....وبعيدا عن كل ده ليا عندك رجاء....كفاية احباط واكتئاب..وجرب تكتب عن السعادة زيي...يمكن تفك شوية من حالتك دي

EGYPT EYES يقول...

دا بوست المفروض يتبلغ عنه ):
تحياتي على ورقة بفره

بنت مصريه يقول...

الشعر جمييل جدا
بس كتبته ف انهى غرزه
ههههههههههههههههههههه
اوعى تزعل انا بهزر معاك
بس والله شعر جميل وجديد

mostafa rayan يقول...

ممكن يكون كلامك صح

kemet يقول...

السلام عليكم ورحمة الله وبركاته

ده مش عيبى ولا عيب غيرى ده عيب زمن وللعلم الزمن هو ورقه بفره ممكن تتمحى فى ثانيه مع الدخان ؟

اذا لم تكن همومنا من عيب فينا او في سوانا فمن اين جاءت تلك الهموم ولما نعاقب عليها طالما هي ليست من فعلنا ولمانطالب عقاب الغير طالما انها ليست عيبهم

عزيزي
نعيب زماننا والعيب فينا و ما لزماننا عيب سوانا

ان كانت الحياة بضعف ورقة البفرة
الا يعني هذا اننا ضعفاء جدا جدا جدا
لانها استطاعت ان تصيبنا بالهم والحزن؟!!!!
وهل للضعيف مكان عليها ؟!!!

وجهة نظر
تحياتي الي اللقاء

نونو يقول...

نفسى اعرف كلامك صح ولا غلط ؟
ممكن يكون صح

الحمقاء المضلله innominate x يقول...

يا سلام عندما يصبح الحل في ورقه البفرة........

سنووايت يقول...

شكلك دخلت تاني في دور الاكتئاب
ومش هاقولك مش معاك حق
بس يارب ما يطولش

حنة يقول...

صباح التهييس
اوعى تكون مكتئب بجد يا محمد
الا الاكتئاب صحيح خلاك شاعر
طيب اشعر .. اشعر وهتروق وتحلى ان شاء الله

نسيان يقول...

بالفعل ... كلامات رائعه
و كاتب اروع
استمر ....

كوارث يقول...

صباح الفل يا عسل
الحياة فعلا ورقة بفرة
كلامك جميل
بس على فكرة كشعر عايز تظابيط كتير
سعيد باني بزورك

محمد العدوي يقول...

ورق بفرة
مناديل ورق

مش ينفع يتكتب عليها دي ولا ايه


:)

walaa يقول...

هى السجاير مسيطره علييك قوى كده
هى الدنيا لا تساوى عند الله جناح بعوضه
بس موضوع البفره ده جديد
بس اقولك شيلك من دماغك الاحزان
مش بتجيب غيير كل هم
تحياتى ولاء

قلوب بتغنى يقول...

ازيك يا محمد وحشتنى جدا
حالك غريب مالك هادى ومسالم ليه كده المره دى لا انا مش متعوده عليك كده
اشتم وزعق بصوت عالى بلاش الهدوء الى شكل الاستسلام ده
اشطات

dina يقول...

ورقة بفرة
يا سيدى عالدماغ العالية...و الله موضوع مبتكر و خلانى افكر كتير و انا بقراه..لا بس هو مش عيبنا ولا عيب غيرنا دا عيب الزمن انا مش معاك..هو عيبنا و عيب غيرنا و عيب سكوتنا على غيرنا و اخر حاجة ممكن تكون غلطانة هى الزمن

بس و الله اخر جمال
اتاريك كنت مبدع و انا بمتحن
تحياتى

momken يقول...

والله ياعم مخبيش عليك
انى خايف اعلق والاقى البكوس مدى ظهره للمدونه

واتفتش ويطلعوا من جيبى البفره بتعتك

ماشى ياعم بلدنا بفره واحنا جواها
يعنى احنا حشيش

طلع لينا تمن وعلينا طلب اهو

انت خليتلنا قيمه ياعم

البوست مع انه مش كوميدى ضحكنى وفيه حجات كتير صح

تحياتى يا دمااااااااااغ