الأربعاء، ٢٨ مايو ٢٠٠٨

مستقبل يا خى توكا 2



خايف من كل حاجه حاسس ان اغلمستقبل خلاص ملوش لازمه يعنى عايش وخلاص وفعلا انا كده من زمان قوى وانا عايش وخلاص معايه مليون اتصرفوا معايه ريال اتصرف وهكذا تدور الرحله الطويله لكن مستقبلى مش مهم الاهم هل انا والى فى سنى او جيلى كلنا كده ؟ الاجابه اةةةةةةةةةةةةةةةةةةةةةةة واه وجعه مش اه يعنى صح وجعه من الزمن والسياسه والبلد والغربه جوه بلدى وكل حاجه بشفها بتننسف قدام عينى فى كتير هيقولولى انت بس محبط والله انا مش محبط وشغال والشغل لذيذ وبطبق بقالى اسبوعين ولسه بروح من الساعه 10 الصبح لحد السعه 1 باليل ومش زعلان لان اليوم بيمر قوام واهو يوم وبيعدى والدنيا بتمر وكل يوم بشوف ناس جديده بس زعلان على جيلى وعلى الجيل الى جاى بعده وده من حقى لانى للاسف مصرى معهوش فلوس ياكل سندوتش فول ابو جنيه وربع من عند التابعى وطبعا مش بيشبع ويااه لو معايه قرش ومحيرنى هاكل بطاطس الى السندوتش ب 2 جنيه اه لذيذ بس ميشبعش طفل السؤال بيقول هو العيب فى مين فينا ولا الزمن ولا الحكومه ولا ده عيب بشريه اتخلقت زى السمك الكبير ياكل الصغير وانا مش صغير انا صغنون موووووووووووت بجد تعبت من بشر ومن ناس ونفسى اشوف نفسى طبيعى من غير اكتئاب ولا زعل اه هتبقى ممله بس اهو تغير احنا الجيل الى اتحكم علينا بالذل والمهانه احنا الجيل الى لو قولتله اديك مليوووووووووووووون جنيه هتعمل بيهم ايه هيرد يقول ولا حاجه مش هيكفوا يومين احنا الجيل الفاسد البايظ الى مبيحبش حكومه بلده زى ما الناس بتقول احنا الجيل الجل والتسقيط ومش عيب حد يقولى الحل فى ايد مين واروحله وابوس ايده واترجاه يسامح الجيل كله


كلامى بايخ بس حقيقه """"

يأخى توكاااااااااااااااااااااااااا


واحب اتاسف لكل اصحابى وحبايبى الى عبرونى فى البوست الاخير والى مبروحلهمش ولا هما ولا غيرهم عشان مفيش وقت خالص والاخت الكبيره الى هى صاحبه اكبر مدونه فى الشرق الاوسط عاليا حليم مدونه عندليبيات احب اقولها انا موجود بجد شكرا

هناك ١٥ تعليقًا:

نسر الشرق يقول...

السلام عليكم

دى اول زيارة لية

هذة المدونة جميلة ودماها شربات
وكمان اول تعليق طيب انا حظى حلو

سلااااام

كاميليا بهاء الدين يقول...

صباح الخير
ازيك؟

اول ما بشوف ياخى توكا دى
بقول بس.. فيه حاجة

خلى عندك أمل
إن شاء الله المستقبل افضل
اعمل اللى عليك
وربنا هايكرمك باذن الله

عيش سنك .. واستمتع بفترة دراستك
واعمل المطلوب منك فى المرحلة دى

ان شاء الله
القادم أجمل وأحلى

ربنا يسعد قلبك البرئ

تحياتى

صاحب المضيفة يقول...

ايه يا بني البؤس ده


دي حتى ما بتضيقش كده الا لما تلاقي الفرج وراها على طول


المهم الصبر الجميل بس



سلام يا صاحبي وخلي بالك من نفسك

غير معرف يقول...

هي ارغي معانا

مشفاضيين غير للرغي

مافيش حاجة غير نرغي

علي فكرة انا برغي كتير روح واتفرج

dodda يقول...

نوصيكم برباطة الجأش
----
متضايقش نفسك اوى كده
ومتبوسش ايد حد
الحل فى ايدك انت واصحابك اللى من جيلك

اجمد
اخشوشن

ربنا يعينك

رحــــيـل يقول...

السلام عليكم

اهلا بيك
كويس ان ظهرت تانى ههه متبقاش تتاخر كده

شوف تقريبا هى فعلا مشكلة جيل كامل
بس احنا راحين فين او اللى جاى بصراحه انا مش قادره احط اى تصور او اى توقع اصل للاسف الموضوع بيذداد سوء كل مادا

بس كل اللى اقدر اقوله ان ممكن نعمله ان احنا نربى ولادنا صح ده لو بقى عندنا ولاد فى يوم من الايام

تحياتى لك

محاولة لكسر الصمت يقول...

ليه كده بس..ده انا كنت لسة داخلة اقولك مش باين يعني...ومش بتسال فينا...بص يا محمد ولو اني مش فاهمة بالضبط سبب معين للاكتئاب اللي انت فيه ده....بس مش كده..فكها شوية مالك شايف الدنيا سودة كده ليه..وبعدين ايه جيل فاسد دي..؟؟.زعلى فكرة احنا مش وحشين كده ومش ذنبنا اننا اتولدنا لقينا البلد بايظ والحكومة مخربة الدنيا...يعني احنا ماغلطناش في حاجة..بس هنبقى غلطنا فعلا لو سيبنا الحال كده وقعدنا نندب في حظنا....مين قال اننا مش هنقدر نغير....تعرف فكرتني بالمقولة اللي بتقول لا تلعن الظلام ولكن اوقد شمعة....وبعدين صدقني لسه في أمل...
يلا باه فكها ...امال فين التفاؤل وحزب التهييس والكلام ده؟...يا ريت ادخل المرة الجاية ألاقي المدونة بمبي..
سلام

سنووايت يقول...

مش عارفة ارد اقولك ايه
عندك حق
ولا خللي عندك امل
ولا ايه
بس ان شاء الله ربنا يرحمنا برحمته

مدحت محمد يقول...

احنا تعبانين اه

متضايقين

برضه اه

نيأس لا والف لا

عارف انت مسلسل سوق العصر

لما كان عم جاب الله بيقول لمنصور

الزمن الطيب جاى يامنصور
انا كمان بقلك كدة

الزمن الطيب جاى يامحمد

بعون الله

إبن مصر يقول...

ازيك يا ايها الصوت الجميل الشادى الصوت المصرى
بجد انا كمان صعبان عليا بس اسمحلى انت سألت سؤال ممكن اجاوبك عليه
كنت عايز اقولك اطمن العيب مش فى الزمن
لأن ده بترتيب ربنا ومش هنعترض على ترتيبه ولكن العيب مشترك بينا وبين ناس بتقول على رأى المثل الفلاحى (( قال يا فرعون ايه فرعنك قال ملقتش حد يلمنى ))
هو ده المقصود بالظبط اننا او بعضنا ساكت ومش بيتكلم على الأقل
هو ده العيب صحيح بنسب متفاوته بس موجود قول يارب يكون اخر العيب ده خير وربنا يسترها عليا وعليك وعلى بقيت جيلنا
إبن مصر

Rania Lelah يقول...

اكيد ربنا هيفرجها قريب قوى
الامل يا محمد
خلى ديما عندك امل
و ربنا يسهل

تحياتى

المتحرش بها يقول...

طول ما احنا جاعنين مش هنتقدم
دى الخلاصة

Gannah يقول...

بجد انا احبطت بشكل مش عادى لانك سألت أسئلة ملهاش عندى اجابة
انت بتقول كده وانت بتشتغل امال الملايين اللى قاعدين على القهاوى من غير شغل يقولوا ايه
حسبى الله و نعم الوكيل فى كل اللى قتل احلامنا
تحياتى

wael يقول...

ياعم اصبر واسمحلي اضم صوتي لصوتك يا اخي توكتين

ليتنا نتعلم كيف نشتاق إلى الله يقول...

يا صاحبى انا مش عارف انت ليه مكتب كده اولا ده مفروض انك انت اللى تشجع الجيل اللى بعدك اللى هو مش ولادك اللى هو اخواتك يعنى تكون عبره ما بالك انك ماغلطش فى حاجه بس خليك COOLو ابعت للدنيا missed call رنه احده و ما تتطولش المهم ان العيب دلوقتى فى مين ما انت مش هاتعرف تحل مشكله من غير ما تعرف مين السبب بس انت اللى بتكتب يعنى اكيد تعرف بس و حياتك ابقى قولنا علشان نحلهامعاك و تصبح على خير