الأحد، 4 مايو، 2008

اضراب الحبيبه


الحياه اصبحت حزينه ليس لي انا بل للجميع ممكن توضح لى موضوع مهم وهو انك فعلا يوم 4 مايو قعدت فى البيت واضربت ولا فعلا مروحتش الشغل ممكن تقولى هقولك الى فيها كل الناس راحت الشغل والى مرحش الشغل خرج مع الموزه اهو منه اضرب وموز ولا ايه بصراحه كده اضراب فاشل بمعنى الكلمه لانى كنت فى التحرير مكان شغلى شارع طلعت حرب من الساعه خمسه مساء حتى الساعه الثانيه صباحا الناس موجوده والزحمه هى هى ولا فى اضراب ولا حاجه ولا حتى حكومه الى كان واضح هما الحبيبه كل واحد ماشى ومروش ومعاه الموزه بصراحه الاضراب ده ممكن يتسمى عيد الحب

ثانيا احب اشكر كل المدونين الى بيزورونى واسف جدا على تاخرى وعارف انى مقصر لكن الشغل بقى وانا لسه جديد يا عالم بجد نفسى اكون كل دقيقه معاكم وفى بيوتكم اقصد مدوناتكم شكرا لكل المدونين

اسف لكن الحقيقه بتوجع

هناك 20 تعليقًا:

مفقوعة مرارتي من حماتــــــــــــي يقول...

هومش الريس وزع الهدية ووعدهم بالعلاوة يبقي يعملوا أضراب ليه
والله أحنا شعب طيب رغم كل شيء

WhItE HeArT يقول...

اضراااب هوه كان في اضراب يوم 4 مايو

وانا رحت الكلية !!!

طيب مش تقولوا ياجماعه

هههههههههه

ياعم الشعب المصري كله مكنش يعرف اصلا ده في اصحابي وعيلتي مكنش في الا انا

تحياتي

صاحب المضيفة يقول...

هي دي مصر ياعم محمد


ربنا يستر علينا


سلامي يا كبير

Yuri Eisenheim يقول...

اضراب مين يا صديقى خدعوك فقالوا ان فيه اضراب
لا الحكومه بتاعتنا ماشيه بمبدا لا يلدغ مؤمن من جحر مرتين
وشغل العوء بتاع الشعب دا خلاص مش هيحصل
اهو النجاح بقى له الف اب
الاضراب الاولانى الاخوان وغيرهم من التيارات السياسيه راهنوا على فشلنا بس نجحنا عشان كدا المرادى تستبقوا على الدخول فى معمعه الاضراب وفى الفيس بوك اكتر من تلاتين جوب كله بيعلن مسؤليته عن الاضرابزى ما يكون حماس وكتائب شهداء الاقصى
والحكومه بردو عملت حسابها لشغل العوء بتاع الشعب الرزل اللى مختار يوم ميلاد مصر كلها
وبتسال لسا عن الاضراب
كان يوم عادى جدا فى الجامعه وفى التحرير وفى كل حته.....

walaa يقول...

هو اساسا مكنش فى اضراب احنا شعب بينضحك علينا بشوية فلوس هو اخد التورته الكبيره ورمى لنا حته صغيره قوى منها واحنا قال فرحنا
وقلنا الراجل كويس اهو مش احنا شعب بيضحك علينا والنبى
تحياتى ولاء

mnoon يقول...

كيمو ولا يهمك
يكفينا شرف المحاوله
أنا عن نفسى وفى بلدى الريفيه البسيطه
وفى تجربه الأضراب الأولى
لم يحدث شئ ومحدش خد باله
أما إمبارح فبجد المحلات كانت قافله
والناس كانت فى بيوتها إلى حد ما
نظراً لوجود حركه إخوانيه فى البلد
أما عن الموزز فتلاقي اللى حسيت بيه ده
مجرد حقد طبقى

سنووايت يقول...

يوم 4 مايو
الناس اضربوا عن الاضراب اساسا

عبده الرايق يقول...

اضرابين وراء بعض
مش صحيح ولا سليم
لازم يكون فى فاصل زمنى

ra7eel يقول...

بصراحه انا ماعملتش اضراب
واساسا لما بيحصل اضراب مش بحس بى فى البلد عندنا
تقريبا احنا مش على الخريطه ههههههه

وبعدين شكلك كده بتحقد على الحبيبه
ههههههههه طيب دول يضيعوا وقت ويضربوا ليه ؟؟؟؟؟؟

كلمتى يقول...

ازيك يامحمد
وحشتنى مدونتك
بس والله غصب عنى
امتحانات وقرف
بس تعرف انا فى بلدنا
بصيت على حد لابس اسود او حد مش رايح الشغل
او حد علق العلم
مالاقتش
قلت للدرجه دى هما راضين عن احوالنا
والحزين ان فى ناس معايا فى قسم اعلام وده اعلااااااااااااااااااام
ومع ذلك مش يعرفوا اصلاً بموضوع الاضراب
بس ولا تزعل نفسك
احنا مش محتاجين اضراب احنا عايزين ثوره
تحياتى

مجرد حكاية يقول...

اولا اخبارك معلش كنت مشغول بقالي فترة ومكنتش بعلق انا وللإسف لسا بدرس مشعارف بقي الدكتور اكمنو تبع الحزب الوطني عملها عند ولا لا بس خلي تسليم المشروع يوم الإضراب ودا علية اعمال السنة فغصب عن عيني لازم اروح ورحت بس لاقيت الأمر عادي خالص ولا كان في حاجة """وصراحة كمان هو كان واضح فعلا انو اضراب حبيبة علي شوفتو يوميها""""
تحياتي

Yuri Eisenheim يقول...

مش عارف اقولك ايه فى ظل الجهل السياسى وسياسه الحكومه الحكيمه اللى هى الحمار اللى هو الشعب والجزره اللى هى حاليا العلاوه
وصراعات الاخوان لاجل افشال وهقولهالك تانى افشال الاضراب من اساسه
ماهو لعبتهم الاولانيه مانجحتش يبقى نفشل الاضراب الجديد ونقدم السبت والحد والاتنين للحكومه
وثالثا تقارب فتره لاضراب وعدم تنظيمه بشكل جيد

alshared يقول...

أنا مش عارف أذا كان نجح ولا أتنيل فشل

أنا كنت قاعد في البيت زي ماكان المفروض يحصل
بس تعرف أنا كنت حاسس أنه هايفشل

مفيش تحرك = فشل

ربنا معاك يا كيمو في الشغل بتاعك

خالص حياتي

Ahmed El-Agouz يقول...

بص يا محمد اصلا اغلب المصرين فعلا ميعرفوش يعني ايه اضراب
والمشكلة اننا بنقارن بين يوم 6 ابريل وبين يوم 5 مايو
اللي حصل يوم 6 ابريل كان بسبب الحكومة اللي عملت دعاية مجانية للاضراب والناس منزلتش من بيوتها مش علشان مضربين لكن علشان خايفين من الاضراب ومن الفزع الامني اللي اعلنته الحكومة
لكن الحكومة طلعت شطرة المرة دي واتعلمت من اخطائها

بص نزعل اه بس نيأس لا لو ان الاضرابين اللي فاتوا دول عرفوا النس يعني ايه اضراب فهذا كفاية وان شاء الله في وسائل ضعط اخري وممكن يعاد الاضراب تاني ومتخفش الحكومة بسياستها المهلبية هتعلم الناس يعني ايه اضراب ويا اما يسيبوهم يضربوا في الشارع يا اما هيضربوا فيهم
المهم خير وربنا يكرمك
العجوز

نسيان يقول...

هو صح مليش بهلمواضيع بس واضح انو هيك خطوة محتاجة تضامن اكثر من قبل كل الناس....

momken يقول...

شوف يا كيمو
احنا لسه قدمنا شويه لما نقهم ثقافه الاضرابات
والاعتصمات
لسه لحد دلوقتى فى ناس فاكره المظاهره يعنى يخرج ويركب على كتف زميله ويهتف يسقط الاستقلال
وفى ناس فاكرها انهم يكسروا العربيان
ويسرقوا المحلات
وفى ناس تانيه فاكره الحجات دى خيانه عظمى
ورجز من عمل الشيطان

لما نحب نعمل اضراب يبقى فى الاول نعلم الناس يعنى ايه اضراب

وبعدين نقول للناس الى ملهاش فى البطيخ
خليكوا بعيد
احنا مش عاوزينكوا
احنا عاوزين الى بيفهموا بس
والى ليهم قضيه بس
انا عارف انك فهمنى
واسف على الرغى الكتير
البوست بتاعك رائع

تحياتى

كاميليا يقول...

انا طبعا بعيد بس دايما بسأل
واللى بعرفه يوجع قوى
الناس بقيت ماشية شايلة الهموم على كتافها
مش عارفه بكرة فيه ايه
وكل تفكيرها فى ان ولادهم هيبقى حالهم ايه
اذا استمر الحال كده

ربنا يستر

تحياتى

son's egypt يقول...

السلام عليكم
طالما علاوة اتوزعت يبقي خلاص الموضوع خلص
بس ياخسارة فرحة ماتمت اخدها البنزيز والسوار وطار

دواير يقول...

مش فاهمة ايه اللي بيزعل....أصلك مش فاهم يا محمد...احنا شعب رومانسي وعايز ايامه كلها تبقى حب....ربنا يكون في عون الشعب وفي عوووونك عالشغل الجديد وعقبالي كده لما اشتغل يارب....

Rania يقول...

متنساش يا محمد انى فى لعبه اتلعبت يوم 1 مايو
و قالوا هيزيد المرتبات
تلاقى الناس قالت خلاص بقى يا جماعة الراجل اتعدل اهو و عرف غلطته فين
:)
هم يبكى و هم يضحك

ربنا يعنيك