الثلاثاء، ٤ مارس ٢٠٠٨

ذكريات جميله


مش عارف ليه الايام دى بتفكرنى بايام بحبها هو نفس الجو بحبه جدا الناس كلها بتكرهوا لانه غريب تراب وحر وشتا فى وقت واحد وانت مش عارف تعمل ايه ممكن تمطر وفى نفس ذات الوقت الجو حر بتفكرنى الايام دى باجمل فتره قضيتها فى حياتى فى 3 ثانوى مدرسه القبه الثانويه بنين اه كنت مجنون بالخزف والرسم فعلا كنت بحس انى جوايا مشاعر كتير ممككن اخرجها كنت اخرج فى مظاهره واروح المرسم عشان امسك الطينه واحولها لتمثال وامسك ورقه بيضه وارسم فيها خيالى كنت اهرب من المدرسه عشان اخرج واعيش حياتى بلا قيود اروح الهرم اروح وسط البلد واشرب سجاير فرط على الكورنيش اعمل الى انا عايزه انط افرح ازعل ابكى لكن الجو كان بيقولى اتفائل اخرج وافتح بابك واجرى وشوف الشارع والتراب والهوا والمطر كنت فعلا عايش الطبيعه اكتر من اى وقت لانى كنت بحب واخاف من حبيبه افتكر انى كنت كل يوم اشوف عنيها كنت بحس انى متكهرب مش قادر اتكلم فعلا هو ده وقت الجو عشان اقولها وارجع اقول بطل غباء اخاف انها ترفضنى اخاف على نفسى منها اخاف ان النظره تضيع من عنيه لو قولتلها كنت ايامها بسمع اغنيه حبس النساء ليورى مرقدى فى المرسم زمايلى كانوا بيقولولى انت مجنون فى حد بيسمع يورى وكان شكلى مبهدل لكن كنت عايش الطبيعه بكل معانيها ؟

هناك ٣٤ تعليقًا:

HeBa يقول...

ليه حسيت من كلامك إن كل ده ذهب مع الريح ؟؟

هل بطلت ترسم وتروح المرسم مع زمايلك

بطلت تتمشى على الكورنيش

بطلت تعيش الحياة بكل معانيها

حلو أوي أننا نفتكر ذكريات وفترة معينة مرينا بيها

بس أنت لسه معندكش 100 سنة علشان تتكلم بالنبرة دي

يا ترى أنا عندي حق ولا متفائلة زيادة عن اللزوم

AHMED SAMIR يقول...

بالنسبة ليا انا دة اسوأ واصعب فترات السنة
حساسية و تراب وتغيير فصول وامراض
تحياتي

فرنسا هانم يقول...

يعنى بالبلدى كده كنت مقضيها
سجاير فرط وتنطيط
احسن حاجه تعيش بحريتك
لكن انا اول مره اعرف انك فنان تشكيلى

حنة يقول...

ايوة يا فنان
انا كمان بحب الايام دي قوي علشان بتفكرني بايام جوازي وبعدين ده مدخل الربيع بعد الشتا يا طول لياليه

قضية عم أحمد Ahmed Case يقول...

حلوة اوي انك تنبسط في وقت الناس تستغرب انبساطك فيه ....

بس الاجمل انك ترجع ذكريات جمبله كل اما يجي وقت زي ده يعني ممكن تكلم صحابك بتوع ثانوي وتتقابلو في الوقت ده وترحوا تاكلو ايس كريم قدام المدرسة :)))

يارب يفرحك حبيبي

مي بهاء الدين يقول...

انت لسة صغير يا جميل وبقالك ذكريات؟؟ دانا على كده مت من زماااان
حلو الراب اللي انت حاطه ده
دماااغ انت
تحياتي

:)

Unknown يقول...

محمد كمال

ايه ياعم الكلام ده ده شغل تلامذة

فكرتنا بايام زمان
يااااااااااااااااااااااه

كانت ايام حطيت السجاير الفرط فى الشراب ؟
هههههه

شريف طلال يقول...

أحسن حاجه الواحد يفرح من ابسط حاجه
مش كده؟؟
شكراً ليك
و تحياتى

د/اجدع بنوته يقول...

ياعينىىى ع الطبيعه

حبيت الحياه بتاعتك دى اوى


وطبعا حقدت عليك اكتر

خزف ورسم

يابختككككككككككككك

بس انا اهو بضحك ع نفسى وبستعوض بانى بعرف اكتب

كان نفسى اوى اكون بعرف ارسم

علاقتى بالرسم تنتهى عندى

ارسمى حمار ياسمسمه

احم احم

برسم خط اوله دايره ونازل منه اربع عواميد

وف الاخر طالع منه ديل

تحياتى

ويارب حياتك دايما تكون زكريات حلوه

صوت من مصر يقول...

هبه
فعلا بطلت ارسم وبطلت اروح الكورنيش وبطلت اشترى سجاير فرط
بس حاسس انى عندى 100 سنه بجد
;;;;;;;;;;;;;;;
احمد سمير
منورنى
بس ممكن اتغلب على تعب الجسد بالروح
;;;;;;;;;;;;;;;;;;;;;;;;;;
فرنسا
انت شكلك عايزانى اكون رئيس دوله ومعايه عليه سجاير مستورده ؟
صعب ؟
;;;;;;;;;;;;;;;;;;;;;;
حنه
الايام دى شكل العيله كلها بتحبها
على فكره بحب افتكر بابا فى الايام دى جدا
برتاح من صورته فى خيالى قوى
;;;;;;;;;;;;;;;;;;;;;;;;;;;
احمد رفعت
تعرف انا نفسى انط من على سور المدرسه
;;;;;;;;;;;;;;;;;;;;;
مى
لو عندى يوم
ليه ذكريات والراب ده مش طرئعه
ده ليه معنى
;;;;;;;;;;;;;;;;;;;

صوت من مصر يقول...

حسن توفيق
بجد ايامك غير ايامنا احنا كنا مش بنخبى السجاير
كنا بناخدها من المدرسين
;;;;;;;;;;;;;;;;;;;;;;;
شريف طلال
استاذ شريف على قد فرحى
زعلان من الايام الى فتت منى بسرعه
;;;;;;;;;;;;;;;;;;;;;;;;;;
د اجدع بنوته
مش عارف ارد اقولك ايه بس عين الحسود

Heart Beat يقول...

لما بنسترجع الذكريات الحلوة دي بنحس اننا لسه عايشين الحمدلله

انا بحب الجو ده اللي يلخبط يعني لا انت عارف هو حر و لا مطر و لا ايه بالظبط

عشان يجي بعد كده الربيع يهدي الاحوال دي كلها

محاولة لكسر الصمت يقول...

متهيالي دي مشكلتنا كلنا.......كل مابنكبر بنحس ان فيه حجات كتييييييييير اوي بتضيع مننا ودايما بيبقى جوانا حنين للأيام اللي فاتت.......لكن يمكن لو فكرنا في حالنا بعد خمس سنين.وفي اننا برضه هنحن للأيان اللي عايشينها دلوقتي......يمكن ساعتها نحب حياتنا ويفضل الماضي مرد ذكريات

mnoon يقول...

كلنا لنا زكريات
صعب جداً إنها ترجع
بس كويس
إنك بتفتكرها لسه
تحياتى

صوت من مصر يقول...

Heart Beat
بجد انا مش قادر اوصف انا قد ايه مستمتع بالجو ده يا ريت انت كمان تكون مستمتع
;;;;;;;;;;;;;;;;;;;;;;;;;;;;
دواير
عمر الماضى حتى ولو كان مؤلم يتنسى لاننا عشيناه ومش سهل انك تنكره
;;;;;;;;;;;;;;;;;;;;;;;;;;;;;
mnoon
اكدب لو قلت انى فى يوم هفتكر ايامى دي واقول انى كنت برخم على الناس بمدونتى ؟

الفارس الملثم يقول...

اكيد كل واحد فينا لديه ذكريات جميلة في كل مرحلة من مراحل حياته ,ربما كانت مرحلة الطفولة هي المرحلة الاجمل في حياتي , بينما كانت المرحلة الثانوية ترتبط بذكريات اليمة ..

اما بالنسبة للجو فربما كنت مثلك احب هذا الوقت مع بداية انكسار الموجة الباردة الي حد ما حيث عندما كنت صغير كنت لا احب الشتاء لاني عادة لا اتحمل البرد الشديد..

تقبل مروري

قلوب بتغنى يقول...

صباحو يا محمد
وحشتنى جدا
ليه يا محمد خليتها ذكريات
حب واتحب واتنطط تحت المطر
وراقب نظرات عنيها حتى لو مكنتش واخده بالها منك
عشها يا محمد
على فكره انا كمان ملخبطه اغلب الوقت
ودايما كم مفروض وكم متنى ورباط الكوتشى مفكوك وبغنى لمنير معرفش ليه مبسوطه عى ايه يعنى

سنووايت يقول...

انا بحب اكتر الوقت بين الصيف والشتاء اللي هو الخريف بنبقي خارجين من حر الصيف ويبدأ الجو يبقي بارد برودة لطيفة والشجر اوراقه تقع واحيانا بيكون فيه مطر خفيف بس اخر الشتاء او الربيع بيبقي الجو كله تراب وبتبقي خارج من برد الشتاء علي حر زي دلوقتي كدا
بس في الاخر هتلاقي كل واحد بيحب الوقت اللي ليه عنده ذكريات بيحب يفتكرها

المـــفـــــــقــــــــوعـــــة مــرارتـهــا يقول...

انا كمان كنت بحب الرسم ولسة برسم بس علي خفيف اوي ياتري انت لسة بترسم ؟؟

walaa يقول...

طيب عايزين نشوف الرسم ده
حيانتا ما هى الا ذكريات وحشه او حلوه اكييد بنفتكر الحلوه ونحاول نسيب الوحشه
تحياتى ولاء

walaa يقول...

بس يارب تكون بطلت السجاير مش حلوه علشان صحتك
ما هو مبارك كده كده مضمرنا بفساد الاغذيه والمبيدات المسرطنه

oceaneyes يقول...

حلوة اوى البساطة اللى بحسها فى اسلوبك دى يا محمد

وانا كمان بحب الجو ده جدا ..وبيفكرنى بذكريات حلوة كتير

خليك دايما على طبيعتك واعمل الل يريحك طالما مش بيتعارض مع حقوق اى حد اخر


تحياتى


:)

غير معرف يقول...

انت فعلا شخصيه جامده جدا و على فكره انا اول مره اعلق ليك على اى حاجه بس ان شاء الله مش هتكون آخر مره ياااااااااارب تكون عرفتنى

غير معرف يقول...

انت فعلا شخصيه جامده جدا و على فكره انا اول مره اعلق ليك على اى حاجه بس ان شاء الله مش هتكون آخر مره ياااااااااارب تكون عرفتنى

صوت من مصر يقول...

الفارس الملثم
بجد كل واحد بيحب فتره فى حياته انا عن نفسى كنت بحب ثانوى جدا شكرا
;;;;;;;;;;;;;;;;;;;;;;;;;;;;;
قلوب بتنزف
يا قلوب بلاش كلمه صباحو الناس بتفتكر انى بشرب ولا ايه ؟
عموما انتى ليه مش بتكتبى ؟
;;;;;;;;;;;;;;;;;;;;;;;;;
سنو وايت
بجد الربيع والخريف جو ممتع لانه جو تغير
عشان كده هتحسى انك هتتغيرى معاه ولا ايه
;;;;;;;;;;;;;;;;;;;;;;;;;;;;
المفقوع مرارتها
مبعفش اكدب لانى نسيت شكل القلم اصلا
بس ساعات بخربش كده على قدى
;;;;;;;;;;;;;;;;;;;;;;;;;;;

ولاء
د تصدقى انا مبطلتش سجاير لانى بحبها جدا وبطلت رسم ولو عايزه تشوفى رسم هبقى انزله قريب
;;;;;;;;;;;;;;;;;;;;;;;;
اوشن
بجد البساطه دى عند كل مخلوق على الارض وانا فعلا بعمل الى انا عايزه
;;;;;;;;;;;;;;;;;;;;;;;;;;;;;;;;;
نونه
معرفش انت مين بجد اعذرنى بس على الاقل تقولى اى حاجه بينا
وعموما شرفنى زيارتك وياريت اعرف انت مين ؟

Rania Lelah يقول...

تقدر ترجع كل حاجة لو انت بس عايز
مش بتكلم هنا على قد
بتكلم على هوايات ذكريات حلوة
تحياتى

صوت من مصر يقول...

رانيا
بجد اتمنى لكن الظروف تسمح يعنى لو لقيت شغل اقدر اعمل ده
لانى مش فاضى اشتغل بدور على شغل 24 ساعه فى 24 ساعه

خمسة فضفضة يقول...

السلام عليكم ورحمة الله وبركاته

مايهمش الجو عامل ايه المهم انت حاسس بايه ، وعاوز تعمل ايه

ربنا يجعل كل ذكرياتك سعيده

Hedaya Al Haj يقول...

يااااه

راح يجي يوم اتذكر هالاشياء ..!!

يمكن كلمة راح اكبر مو مناسبة لاني فعلا كبرت .. بس لما راح اترك المدرسة اكتر شي راح اتذكر الساعات اللي كنت بسرح فيها بنص الحصة مع عصفور واقف ع شجرة السرو الكبيرة ..

ياه شو بنبسط لما يجي !!
واحلى لحظات هذيكي اللي بيمسكني الاستاذ فيها نايمة او بكتب او بقرا كتاب استعرته ومش قادرة استنى لاروح ع البيت !!

تحياتي\\

صوت من مصر يقول...

فضفضه
بجد مش عارف اقولك ان الحياه بعيشها بريحه الجو يعنى كل وقت بيفكرنى بذكرياتى
;;;;;;;;;;;;;;;;;;;;;;;;;;;;;
عروبه
انت فعلا عشان صغيره مش هتحسى ان دى افضل ايام حياتك بكره تكونى عجوزه زى انا كده وتتبى عنها
ياريت تهتمى بالحصه وبالذات الرياضيايات

Camellia Hussein يقول...

مفيش حاجة في الدنيا احلي من ان الواحد يكون نفسه بكل االجنان اللي جواه والمشاعر اللي ممكن تكون ساعات متلخبطة او حتي متناقضة،مفيش احسن من انك تعيش طبيعتك

أحمد سعيد بسيوني يقول...

بسم الله
معذرة على التحليق خارج السرب
ولكن
ثورة طنطا في صور - جديد مدونة البحر
مع خالص تحياتي

Hedaya Al Haj يقول...

نصيحة راح اخدها بالحسبان ان شاء الله ..

ملاحظة :" ما تكرِّر صغيرة ، لاني ما بعرف ايش بيصير لما بسمعها "

تحياتي \\

غير معرف يقول...

انت نسيتنى !!!:oعموما انا هبعتلك رساله على ميلك هتعرف انا مين