الخميس، 20 مارس، 2008

سئمت منك


عايز اكتب ومش عايز عايز احب ومش عايز عايز كل حاجه ومش قادر هل لانى اصبحت منتهى الصلاحيه او لاننى فقدت القيمه الذاتيه للانسان ولا عشان البلد اصبحت لا تهتم بالفقراء والمكدوحين بها هل البلد اصبحت بلد من يملك ومن لا يملك فهو خارجها لا يستحق العيش بها انا حاسس انى مش فى وطنى الى طول عمرى بسمع عنه من والدى وكل الناس الكبار الى دايما قالولنا ان مصر دى فيها خير لو قعدت تاخد منه مليون سنه مش هيخلص للاسف يا والدى ويا اعمامى واجدادى لم ارى فى بلدى سوى فقر وكدح وعذاب وحكومه مبيهماش غير انها تظهر بافضل صوره فى الخارج وتهتم بالاغنياء ومع ذالك لا يشفعلها من فى الخارج ولا يشفعلها الاغنياء بها كل منهم يريد المقايضه على ان يملك جزء منها فهل هى اصبحت للبيع وهل خيرها اصبح للبيع مع انى اعرف ان الخير شىء عام مش للبيع بجد عرفت معنى كلمه مهمه سوف تدون فى تاريخ قاموس حياتى وهى انى اصبحت غريب داخل وطنى واين وطنى لم اجده الا كلما استمعت لاغانى الشيسخ امام مصر يا امه يا بهيه واين هى الترحه والجلابيه فقد اصبحت بدله وجيبه واصبح من يلبس الجلباب ليس من اهلها بل اصبح يقال عليه كلمه بيئه وماذا تعنى تلك الكلمه كيلو الفول ابو سوس اصبح ب 6 جنيه مع انه اكل الفقراء او فطار الاسر المتوسطه الى اختفت اذكر انى منذ 10 سنوات كنت داخل اسره متوسطه الدخل الان اصبحت فقيرا لا املك سوى نفس داخل ونفس خارج يقول معه كلمه اين وطنى اصبح البرلمان عباره عن كرسى اصبح الرئيس هو من يهمه ان يتجاوز ال 400 قرن وهو على نفس الكرسى اصبحت اتذكر انى اقتربت من مواجه وجه الكريم وهو عى قيد الحياه يا ريس سيبنا نشوف حد غيرك هيعمل ايه سيب الهواء متبعوش سيبنا نهتم باغانى سعاد حسنى وكلمات جاهين ومنير وحليم من دون ان نشعر ان ليس لهم طعم لاننى اتذكر انى فى المدرسه كنت اكره سماع اى صوت داخل الفصل نتيجه صورتك المبجله داخل كل فصل وكانك الملك واين توضوع الصوره فوق لفظ الجلاله فوق الصبوره التى تبداء بكلمه بسم الله الرحمن الرحيم

اى ان الله سبحانه وتعالى رحيما بالناس لكنك لاتنتظر من ان اقولها لك انك لست برحيما بشعبك

بكرهك انت وحكومتك بصراحه

هناك 38 تعليقًا:

د/اجدع بنوته يقول...

اول كومينت وراجعه

د/اجدع بنوته يقول...

ربنا معاك

وفك كده محدش واخد منها حاجه

حسبنا الله ونعم الوكيل

walaa يقول...

بجد الناس قرفت قوى قوى قوى قوى
وهتنفجر خلاص
ربنا معنا
بس احنا لازم نعمل حاجه
تحياتى ولاء وحسبنا الله ونعم الوكيييل

صوت من مصر يقول...

ياسمين اجدع بنوته
عارفه ازاى اقدر اقول انا كويس انا مش كويس صعبه صح
;;;;;;;;;;;;;;;;;;;;;;;;;;
ولاء
انتى منهم وانا كمان وكل مصرى بجد قرفان
بس عارفه يا ولاء انتى وياسمين
حاسس ان كلمه حسبى الله ونعم الوكيل طالعه منكم زى الراجل بتاع فيلم جانا البيان التالى ؟

نوري يقول...

بص يامحمد
اولا انت قاعد بتاكل في نفسك
وتتعب فيها
وارهنك لو طلعت بحاجه من كده
انت عيش الدنيا زي ماهي
عشان ميبقاش هم وموت اكلينيكيا
بس لعلمك مش بس الي في مصر هما الي متغربين
ده احنا كمان الي بره متغربين مرتين
غربه روح وغربه وطن
فلا كده نافع ولا كده نافع
طنش انت بس وارمي ورا ضهرك اشمعني هما يعني احنا كمان لازم نكون كده
خليها تخرب بقي

و(بست وشز فور يو)0

فزلوكة يقول...

هو صح وضع البلد سىء جدا
لكن إيه إللى هينفع لو يإست بالشكل دا؟؟

دور جواك على حاجة تخليك مختلف ومتميز

حاول تغير ومتكتفيش بالوقوف عند المشكلات

صدقنى هتلاقى جواك طاقات كتيير تقدر بيها تعمل حاجة

وبلالالاش يأس واكره الحكومة براحتك بس لازم تعمل حاجة تقابل هذا الكره

قلوب بتغنى يقول...

صباحو يا محمد
اه يا لئيم انا فاهمه انت بتعمل ايه كويس
انت قاعد تشتم فى الحكومه وامال تقل فادبك عايزهم يعتقلوك يا خبيث وتاكل جوه على حسابهم وطبعا فى عيش من بتاع المخابز الى جوه ومفيش طوابير واكيد فى لحمه على الاقل مره فى الاسبوع والعدس ببلاش
يلهوى على خباثة الشعب ده
طب انصحنا نشتم معاك اهو نلاقى حته تلمنا بدل الصياعه والجوع الكافر ده
مكنتش فكراك كده
اشطات

صاحب المضيفة يقول...

يارب ارحمنا برحمتك ومن علينا بفضلك


ياعم اصبر دا الفرج قريب باذن الله تعالى




سلام يا صاحبي

صوت من مصر يقول...

نورى
لازم اكل فى نفسى لانها بلدى وبخاف عليها ولا ايه
;;;;;;;;;;;;;;;;;;;;
فزلوكه مهم دورت ومهما استنيت بصراحه انا مليش دور لانى مبقفش طوابير
;;;;;;;;;;;;;;;;;;;;;;;
قلوب
بصى يا شيماء بصراحه انتى طلعتى ذكيه جدا هههههههههههههههه
انشاء الله مش هتحبس لوحدى
;;;;;;;;;;;;;;;;;;;;;;;
صاحب المضيفه
تصدق فعلا بشكرك على مرورك الكريم يا صديقى العزيز

دواير يقول...

اسمحلي أخ محمد.وسوري يعني..كده بتخبط في الحلل زي ما بيقولوا...يعني ما احنا صابرين من زمن خلاص ..مش قادر تصبر شوية...أما بأه عن مصر ياأمه ...مش عارفة ليه تاعبك أوي موضوع الجلابية دي...اذا كانت هيه اصلا ماعادتش(أمه)...أما عن الريس(ربنا يطوللنا في عمره)...فصدقني المشكله مش بس فيه...المشكلة في ناس تانية كتير ومنهم احنا..لأنه فعلا(كما تكونوا يولى عليكم)..يعني احنا لازم نتغير..معاك ان فيه حجات لازم تيجي من فوق..بس برضه ...يعنيليه عايز تكتب ومش عايز وعايز تحب ومش عايز...بص خد قرارك ومالكش دعوة بأي حد..وان شاء الله مش هتندم

كلمتى يقول...

السلام عليكم
ياااااااااااااااااااااااه كل ده حاسس بيه بجد ربنا معاك لأنى اوقات كتيره بكون فى حالتك دى
ودى بتبقى اصعب لحظات بمر بيها
مش بحس بطعم اى حاجه
بس حاول على قد ما تقدر تطلع من المود ده
وحاول ترجع لنفسك الامل وما تيأسش
لأن الدنيا مش مستهله اننا نزعل على حاجه فيها
سلاااااااام
وياريت الموضوع الجاى يكون كله تفاؤل
بس على فكره انت لسه ماجاوبتش على سؤالى

سنووايت يقول...

حاول تخرج من الحالة دي بسرعة بجد لانها مش حلوة , حتي لو بطلت تفكر
وربنا معاك ومعانا ومع الشعب

صوت من مصر يقول...

دواير
هو الى بيطلب بالحق يبقى بيخبط فى الحلل عموما انا عارف انى ممكن اموت من كلامى لكن اخر كلمه قالهالى وادى الله يرحمه
امشى فى الخير وتخفش حتى ولو على رقبتك ؟
ثانيا بعنى بكلامى انى زهقت من العيشه فى البلد دى ؟
;;;;;;;;;;;;;;;;;;;;;;;;;;;;;
كلمتى
انا مش مكتئب لكن دى ظروف اكتر من 20 مليون شاب
وثانيا ايه هو السؤال ؟
;;;;;;;;;;;;;;;;;;;;;;;;;
سنو وايت
عمرى ما بكلت افكر لانى لو بطلت يعنى انى ميت ؟

فرنسا هانم يقول...

شكلك كده مفلس
ومفيش سيجارتين مروقين الانانى ولا معمارين الطاسه
صح ولا ؟؟؟

صوت من مصر يقول...

فرنسا
منوره والله يا ريسه تخيلى ان معايه علبه سجاير بوكس كامله فيها 19 سجاره يعنى هتقنعينى انك مش قرفانه من حال البلد

Desert cat يقول...

طيب ما هو كلنا شايفين ان الوضع سئ وبيسوء كل يوم اكتر من التانى عملنا ايه غير اننا ساكتين وكل واحد بيتكلم بينه وبين نفسه خايف احسن حد يسمعه
يا عزيزى ان الله لا يغير ما بقوم حتى يغيروا ما بانفسهم
احنا نفك الكمامة دى وننطق ونتحد كلنا وساعتها هنعرف نعيش كويس فى بلدنا

ahmed يقول...

محمد ازيك يا قمر
للاسف وطنا اللى كنا رسمنا صورته فى احلامنا مش موجود اللى موجود خرابة بينعق فوق جدرانها الغربان ويتربص بحملانها الذئاب ....... بس اللى متعرفوش ان الامل لسه ممتش لسه عايش اه بيحتضر اه الذئاب مش هتسيبوا غير لما تخلص عليه لكنه لسه موجود واحتمالات النهضة والحياة لسه موجودة ولو حنى 1%

Heart Beat يقول...

الحاجات اللي قلت عليها كلنا عايزنها و مش قادرين مش لاننا انتهينا و لا فقدنا القيمة الذاتية للانسان لأ

اعتقد لاننا عارفين و متأكدين في ظل الوضع اللي البلد فيه ده ماحدش فينا هايقدر يعوز حاجه و لا يفكر فيها هانبقى مستنين اي حاجه و ناخدها و خلاص

انا عن نفسي اتخنقت خلاص من اللي بيحصل و دايما بقول ان الطوفان جي خلاص و هايغرق الكل حتى احنا لاننا ساكتين

طيب انا ساكتة ليه ... عشان عارفه و متأكد ان اول ما انطق ماحدش يقف ينطق معايا و هايسبوني لوحدي بزعق و اقول كفاااااااااااااااااااية بقى

و هاتنتهي الحكاية انهم هايعتقلوني و ماحدش هايسمع عني تاني

زي ما قالت قطة الصحراء الحل في الاتحاد مع بعض

انما طول ما احنا خايفين مش هايحصل حاجه و الحالة هاتزيد و تبقى اسوء من اللي انت و انا و غيرنا حاسينه دلوقتي

تخيل بقى احساسك ايه و انت عارف و متأكد من ان شعب بلدك مش هايقف جنبك ... يعني مافيش ثقة خالص ... انعدمت

غربة ما بعدها غربة فعلا

اعتقد هو ده حالنا دلوقتي خايفين لاننا مش واثقين من بعض عارفين ان في وقت الزنقة كله هايقول يالا نفسي

و طبعا النظام الفاسد هو اللي وصلنا للحالة دي عرف كويس ازاي يفرق بينا و يحسسنا بالاحساس القاتل ده

ربنا على الظالم و المفتري اللي وصلنا للحالة دي من التشاؤم و اليأس لدرجة اننا بنتخبط مش عارفين نعمل ايه و لا ناخد قرار من غير ما نفكر الف مرة

only spot يقول...

ضاقت ضاقت حتى استحكمت حلقاتها فظننتها لا تنفرج فاذا بها تنفرج
ليس لدى سوى الصبر حتى يقضى الله امره
بس اكيد هيجى اليوم الى نتحرك فيه بدل ما نبكى حالنا لحد مايجى اصبر بجد وحاول تستعين بالله
مش لاقيه كلام اقوله بصراحه بس الى احنا فيه ده كان لينا دور فيه بسلبيتنا وصمتنا عن حقنا
تحياتى

عبده الرايق يقول...

فقير لا تملك سوى نفس داخل ونفس خارج
خلاص
علاجك عندى
انا حجزت لك عندى فى المدونه اوضه بمنافعها
بسجايرها
بحشيشها
كله تمام
ورزقى ورزقك على الله
حسنه قليله تمنع بلاوى كتيره
وهادور اشحت بيك
قصدى استلف بيك من المدونات
وكله هيتسدد بعد الكادر
وهاشغلك
مندوب مالى لثروه الرايق

oceaneyes يقول...

ليه مضايق نفسك اوى كدة ؟؟

هو انت لما تتضايق ودمك يتحرق من النرفزة والعصبية ..ده هايأثر فى الوضع الراهن او هايغير من وضع البلد ؟؟

لا طبعا

...


اهدى يا محمد وروق كدة ..واللى ربنا عايزه هايكون ان شاء الله


تحياتى


:)

صوت من مصر يقول...

قطه الصحراء
بامانه انا مكدبتش انى اتكلمت ومخفتش ولو حد خايف من كلامى هينكسر خوفه
;;;;;;;;;;;;;;;;;;;;;;;
احمد
عامل ايه بس ممكن اقولك انى عندى امل 100 % يعنى حتى ولو وحدى برضه اموت على حق
;;;;;;;;;;;;;;;;;;;;;;
اجندا حمرا
لازم نعمل كده نفكر ونفكر لاننا بشر ؟
;;;;;;;;;;;;;;;;;
only spot
على ما اظن ان رايك مماثل لللكلام
ولا ايه
;;;;;;;;;;;;;;;;;;;;;;
عبده الرايق
بجد رايق
بس اوعى الرشاوى لكل موظفى الحى والعه
;;;;;;;;;;;;;;;;;;;;;;;;;;;
oceaneyes
لازم اضايق نفسى لانها بلدى ولو انتى معملتيش كده يبقى لابد نلغى الانتماء

ftafeet يقول...

ايه يابنى هون على نفسك شويه

ربنا يعدل حال البلد ان شاء الله

ويعدل حالنا


نوناااا

صوت من مصر يقول...

فتافيت
عموما قبل اى كلمه انتى ليه بتخلينا نسنتى موضيعك بشده بصراحه انتى بخيله جدا ؟
تانى حاجه البلد مش هيتعدل حالها الا بعد شىء واحد واننا نفوق ونبطل سطل الى الحكومه معيشانه فيه ؟

Heba يقول...

محمد

حالك من حالنا كلنا

بلاش تكتئب أوي كده

بكره ربنا يفرجها من عنده

shirry يقول...

علي فكرة حالة القرف اللي عندك دي عندنا كلنا

وانا مؤيدة ليك في كلامك
لان بجد الناس مش عارفة هتعمل ايه
يعني ليه كل ما تزيد الاسعار يقولك زيادة عالمية للاسعار
وسبحان الله المرتبات مالهاش زيادة
ماعلينا ربنا يستر علينا كلنا


وبعدين احنا فعلا عايزين وجه جديد ونشوف
متزعلش نفسك كدة
وابقي تعالي

عاليا حليم يقول...

كفاية علينا نجعجع و نتخانق مع بعض وكل واحد يعمل نفسه مقياس الصح و الغلط و هو مش فاهم اى حاجة فى اى حاجة

كفاية علينا تاخدنا العنترية و العنتزة و مافيش فعل

ما بنفكرش فى حلول مجدية بنفكر بس ازاى نمسك لبعض على كلمة بنعمل مظاهرات لنفسنا و بنخطب فى نفسنا و بننصح نفسنا و بنقاطع نفسنا ... و لما حد يعرفنا حقيقة نفسنا يبقى حمار ما بيفهمش

أنا قرفت و الله العظيم

صوت من مصر يقول...

هبه
والله انا مش مكتئب بس لو ده حالنا يبقى فيه امل ؟
;;;;;;;;;;;;;;;;;;;;;;;
شيرى
التغير مفيد جدا على الاقل مش هنمل ونحس بملل دائم
وهروح فين ؟
ابقى تعالى
;;;;;;;;;;;;;;;;;;;;;;;;;;;;
عاليا حليم
استاذه عاليا انا مش بجعجع ولا بعمل كده عشان ابين نفسى الواد الرياضى النشيط لا والله انا بعمل كده لانى اسمى مواطن مصرى مش لاقى ياكل ؟
عموما يا فندم لو كلامك ليه بالنقض ابقى انا فعلا كويس جدا لان حضرتك مش قليله
شكرا لحضورك

Rania يقول...

من غير خناق و لا ضرب
عارة انى مقصرة
متزعلش بقى :D

*******
موضوعك بيوجع قوى يا محمد لانا كلنا بنحس بنفس شعورك
بس عايزين نعمل حاجة
و زى ما قالت علياء
ان نصنا بيحب يتكلم و مبيعرفش يعمل حاجة
او بمعنى اصح مش عايز يعمل حاجة اصلا

ما علينا
عايزين نفوق و نصصح و نعرف ان بلدنا هتتير بينا احنا مش هما

مودتى و تحياتى

مدحت محمد يقول...

انا نفسى افهم ليه بنربط تقدم بلدنا وتاخرها بشخص واحد
ليه احنا كشعب ميكونش عندنا الايجابية فى اصلاح بلدنا

walaa يقول...

تعال خد التاج بتاعك من عندى
ومش هقبل اعتذار علشان ده مش اى تااااج
تحياتى ولاء

صحفية روشة يقول...

ربنا يستر علينا وعلى ولادنا
اللى هنظلمهم عشان هنخلفهم

صوت من مصر يقول...

رانيا مزعلتش ابدا
لكن لازم اى بنى ادم مصرى يقول كده لانه مصرى
;;;;;;;;;;;;;;;;;;
مدحت محمد
هقولك حاجه انت لو مسؤال عن شركه مصير الشركه فى ايد مين ؟
;;;;;;;;;;;;;;;;;;;;;;;;;
ولاء
هروح طبعا
;;;;;;;;;;;;;;;;;;;;;
صحفيه روشه
عارفه انا مش ناوى اتجوز اصلا

الشنكوتي الكبير يقول...

واد انت
هي فرنسا مفيش غيرها اللي بوظت دماغكم وهتودونا في داهيه كده

ماله بس النظام
هو لما الناس تقتل بعضها على فرن العيش دي مشكله ده بيساعد على تدريب الشعب على الرياضات القتاليه يمكن نبقى زي اليابان

ماله برده لما تنزل تشتري حاجات السلطه خيار وطماطم وخضره تدفع عشرين جنيه فيهم ده لو معاك عشرين جنيه

ماله برده لما متبقاش عارف تشتري فرخه من اللي كنا زمان بنتنطط عليها ونقول كل شويه فراخ زهقت
-مش عارف امتى كنا بنقول كده بس يعني عديها دي- المهم يعني احنا كده يا فالح بقينا دوله غنيه زي امريكا ايوه طبعا
لما يبقى دي اسعار المواد الساسيه يبقى اكيد الحكومه عارفه ان متوسط دخل الفرد سنويا حوالي 45الف جنيه مثلا ده للناس العاديه وبيذيد في مناطق تانيه

مع ان لما تحسب دخل اربعتاشر اسره حواليا هتلاقيه مبيجيبش نص المبلغ ده في السنه يبقى الغلطه فين
ان في ناس بيدخلها دخل سنوي يعادل الفرق ده
يعني في ناس بيدخلها الفرق اللي يقدر بالملايين كل شهر
واحنا قاعدين نمصمص في صوابعنا وشفايفنا

قال وعايزين نتجوز كمان
اقولك ادعي ربنا ينجينا على خير

سلاااااااااااااااااااااام

mnoon يقول...

المساواه فى الظلم عدل
وهى دى المشكله
ناس تحت قوووووووى
وناس فوق قوى قوى
حتى الظلم مش متساوين فيه
بس برضه
لسه فيه أمل

شبــ اون لاين ـــاب يقول...

مدونه جميله

و بندعوك علشان تيجى تقول رايك عندنا و يمكن يكون فيه تعاون

صوت من مصر يقول...

الشنكوتى
يا باشا والله ده شرف كبير اننا نمشى على نهج فرنسا ولا ايه ؟
::::::::::::::::::::
منون
والله يا منون انا قرفت بجد
::::::::::::::::::::::::::::
ِشباب اون لاين
احب اقولك مدونتك ايضا رائعه

عاليا حليم يقول...

(لم ارى فى بلدى سوى فقر وكدح وعذاب وحكومه مبيهماش غير انها تظهر بافضل صوره فى الخارج وتهتم بالاغنياء ومع ذالك لا يشفعلها من فى الخارج)
------------

يعنى بذمتك بعد الكلمتين دول أقولك أيه ؟ ما احنا هلس

هون على نفسك شوية كلنا و الله تعبانين