السبت، 1 مارس، 2008

ساعه عشان 5 ارغفه عيش ؟


قبل ما اقول اى حاجه اعذرونى الفتره لانى هكون مشغول الفتره دى هحاول على قدر الامكان اشوف حل انى ادخل حتى ولو خمس دقايق يوميا

؟

طبعا مش عارف احكى الموضوع منين لان مصر كلها بتتكلم عنه لكن انك تعيش التجربه ده حاجه تانيه تخيل نفسك واقف فى فرن عيش بلدى الساعه 11 الصبح طبعا كان بدرى لكن المشكله انى كنت عايز 5 ارغفه عيش مش اكتر اول ما روحت لا مفجاه ولا حاجه دخلت فى الزحمه وقولت انا عايز ببع جنيه بس ممكن اعدى يا بنى يا استاذ يا بشمهندس ولا كان حد هنا المهم وصلت ومسكت فى الباب الحديد وكنت فى قمه السعاده لانى انجزت شىء ولكن يطلعلى راجل عنده فوق السبعين من عمره ويعملى زى ارنولد ويشيل ايدى ويقولى يلا من هنا

ونزلت تحت تانى وبقيت واقف مش عارف اعمل ايه احاول واحاول واحاول ولكن دون جدوى واحده ست عاديه زى اى ست من مصر بتقولى ممكن اعدى عند صف الرجاله ركزوا الرجاله قولتلها اتفضلى ووسعت اخدت العيش من كلمه واحده خالد العيش فين وانا واقف زى الاهبل المهم وهى نازله بتشتمنى وبتزعق وانا من الخنقه روحت مزعق ودى كانت اول مره ازعق لواحده ست وفى الاخر الرجاله تحوشنى واسكت لانى بينهم غلبان لقيت عيل صغنون كده قولتله هاتلى معاك 5 والنبى وبصراحه كده الواد طلع راجل وخد الفلوس وانا قاعد مستنى وبسمع الشيخ امام مصر يامه يا بهيه على التليفون وبقول الله يرحمه الشيخ امام ماشفش الذل ده

عيل كان واقف جنبى وانا لسه متغاظ بقالى ساعه الا ربع معقول والله لابلغ عنهم

الواد رد رد مقنع جدا هيجوا فعلا وهيخدوا ال 200 جنيه وشكرا وكان شىء لمن يكن سكت المهم الواد الصغنون نزل ومجبليش عيش مرضيش يديله اكتر من بجنيه قولت اعمل زى شمشون وانط فى وسط الناس واجيب العيش وفعلا فعلتها وجبت 5 ارغفه عيش من ابو 5 قروش تخيلوا الفرحه الى كنت فيها عشان اجيب 5 ارغفه عيش اقف ساعه حد بيعرف يزغرط

وانا مروح للبيت صاحب الفرن بيقولى هيعملوا كشك عشان الناس تشترى منه و هيمنعوا الناس تشترى من الفرن وكل واحد ليه بجنيه بس وانا طبعا بشوف كل يوم عربيه سرقه الدقيق بتعدى تاخد الدقيق المسروق تخيلت المنظر ان ممكن الكشك ده يبيع ب 5 جنيه وشكرا والباقى اتسرق يا ريس

حد يقولى ابلغ ولا 200 جنيه

هناك 24 تعليقًا:

Rania يقول...

كويس انى اول تعليق
بصراحة انت اتكلمت فى مشكله مهمة قوى و اعتقد انها بقت من اهم المشاكل اليومين دوول
رغيف العيش و الزحمة
رغم وعود الحككومة انها هتحل الموضوع دة انها هتبى افران جديدة او هتزود الدقيق او او او او
الا انها بردة زى ما هى ممكن تقف بالعشر ساعات علشان عيش دة غير كمان الخناقات اليومية
بجد الحكومة بقت بتفن فى انها تضيعادميه اولادها
تحياتى

Desert cat يقول...

ما هو لو انت بلغت وغيرك كمان بلغ
مش هيلاحقوا يدفعوا كل شوية 200 جنيه ويمكن مش يلاقوا ياكلموا
فهيحترموا نفسهم
مش ودانا فى داهيه غير السلبية
ومبروك على العيش

صوت من مصر يقول...

رانيا
بجد ده موضوع ذات اهميه وانا بجد حسيته اكتر من اى حد ؟

;;;;;;;;;;;;;;;;;;;;;;;;;;;;;;;;
قطه الصحراء

الله يبارك فيكى بس خلاص قررت اشترى ابو ربع جنيه اهو منه عدم بهدله واستسلام للواقع

oceaneyes يقول...

الف الف مبروك على العيش يا محمد

!!

والله ما عارفة اقولك ايه ..بينى وبينك انا زهقت من كتر الكلام اللى مالوش فايدة ده ..اصل احنا مشكلتنا ان السلبية طاغية على حياتنا بشكل فظيع

ومافيش فعلا حاجة بإيدنا نعملها ..الا بقى لو طلع مننا واحد بايع عمره علشان نجاح القضية


الله يرحم ايام زمان

بجد كان نفسى اعيش فى الزمن ده


اقولك


روق

فرنسا هانم يقول...

انت هنا عند الفرنه ؟؟؟؟
اه
ابعت لك ميدو ابن اختى ؟؟

صوت من مصر يقول...

اوشن
الله يبارك فيكى بس على فكره عمرى ما هروق طول ما حالناكده
;;;;;;;;;;;;;;;;;;;;;;;;;
فرنسا
والله العظيم ميدو طلع بطل قومى بجد لو بقيت ريس هكرمه

Heba يقول...

يا محمد دي مشكلة مزمنة

أنا سكنة قدام فرن وبشوف المهازل اللي بتحصل يوميا

خناق وشتيمة وضرب

الذنب مش ذنب الناس طبعا

ذنب الظروف المقندلة اللي احنا فيها

ده غير تهريب الدقيق للسوق السودا

كويس أنك عرفت تطلع بالعيش في الأخر

ربنا يرحمنا

صاحب المضيفة يقول...

وليه الجاي انيل من كده


ربنا يكون في عون الشعب المسكين ده


سلام يا صاحبي

mnoon يقول...

"الساكت عن الحق شيطان أخرس"
بلغ عنهم
خليهم يعرفوا
يعنى إيه إحترام!
وبرضه إشترى عيش من اللى بربع
إنت متعرفش العيش
اللى إشتريته معجون أصلا إزاى؟

د/اجدع بنوته يقول...

لاا حول ولا قوة الا بالله

انا جيت بناءا ع صرخة المجتمع التدوينى

الكل بيندد وبيشجب ان محمد قولنا كمال

فشل انه يحصل ع 5 ارغفه عيش

اومال لو 5 فينو كان عمل ايه

قلوبنا معاك مصر كلها معاك

بس انت اتبهدل واحنا معاك

وتانى مره متتهورش علشان متتعورش

ماله العيش الابيض الخمسه ف كيس
تدخل الماركت تاخدهم بكل احترامك

تحياتى

سكــر يقول...

محمد باشا

ريح نفسك

انتى هتدن فى مالطا

ومحدش هيسال
حنى لو بلغت هيجو ياخدو المعلوم ويمشو

تحياااتى حماده

احمد سكر

yomna يقول...

فيه حد لسه بياكل العيش ابو شلن يابني...الواحد ممكن لو عاوز يروح الفرن يبقى ياخد معاه كام كتبا يذاكر فيهم لو لسه بيدرس لو ياخد معاه شغله يخلصه وبالنسبة للستات ممكن تاخدلها كام كيلو ملوخية على بامية توضبهم لحد ماييجي دورها في الطابور

بجد والله دي بقت خيبة...يعني اللحمة غليت قالوا بلاش لحمة..الفراخ عيت وغليت كمان قالوا مش لازم فراخ...السمنة غليت قالوا ناكل بالزيت وهو صحي اكتر غلي الزيت طعنا في المسلوق بما انه اكتر فايدة...لكن قوللي بقى بعد العيش الناس هتاكل ايه... والله فيه ناس كتير غلابة اوي انا شفتهم بياكلوا العيش ده حاف...فلما ميلاقهوش كمان هيعملوا ايه...ياكلوا تراب بقى بس يلحقوا قبل ما يغلى هو كمان

اصل هو ده اللي ناقص

صوت من مصر يقول...

هبه
يا بختك اكيد مش بتشترى عيش من جاور الحداد
;;;;;;;;;;;;;;;;;;
صاحب المضيفه
يا عم خليك متفائل
;;;;;;;;;;;;;;;;;;;;;;;;;;;;
منون
لو بلغت هيجوا ياخدو ال200 جنيه ويمشوا
ممكن ابلغ واقسم معاهم صح
;;;;;;;;;;;;;;;;;;;;
دكتور اجدع بنوته
بجد العيش الشامى الى فى كيس مش بيكفى
وادينى حاولت
;;;;;;;;;;;;;;;;;;;;;;;;;
سكر
والله انا معاك فى الكلام ده
;;;;;;;;;;;;;;;;;;;;
يمنه
بجد مش عارف اقولك كلامك صح وده الى هنشوفه كمان يومين لكن الخبر الجديد بمناسبه اللحمه
كيلو اللحمه بقه ب 50 جنيه بس
وعجبى

ra7eel يقول...

تصدق انا لسه سامعه عن موضوع كشك العيش ده النهارده
تفتكر اساسا الموضوع ده هينجح
الواحد بيشوف العجب قدام افران العيش بجد

ربنا معاك كويس انك طلعت من الطابور بخير
تحياتى

ابو مفراح يقول...

السلام عليكم
اذاكان المفقود هو خمسه ساعات فقط من اجل رغيف الخبر
فهناك من فقد حياته كلها و اقرا عددد الدستور السابق تعرف جديا بان هناك من لقب بشهيد الرغيف

جزاكم الله خيرا
تحياتى ابو مفراح

صوت من مصر يقول...

رحيل
موضوع الكشك ده مش هينفع ودى خديها منى ثقه ؟؟
;;;;;;;;;;;;;;;;;;;;;;;;;;;
ابو مفراح
اول حاجه ده شرف كبير ليه دخولك عندى ؟
بس موضوع شهيد العيش ده فعلا انا معرفش عنه حاجه بس واثق انها حقيقه من الى انا شفته

Mohaly يقول...

I dont know why are we doing that to each other. Till when will the government talk about "ma7dodi el dakhl" but all what it does is make them more "ma2tou3i el dakhl". 1 hour for getting some bread is non-sense. Walahi 7aram eli beye7sal dah!

Ahmed Al-Sabbagh يقول...

تعرف يا محمد

انا كنت بروح اماكن فى القاهرة

كنت بشوفهم بيوقفو على فرن العيش والله اكتر من خمس ساعات

لدرجة ان كل واحد بياخد معاه حصيرة ويقعد

لنا الله

تحياتى

أحمد

صوت من مصر يقول...

mohaly
بجد عندك حق احنا فعلا مش محدودى الدخل احنا مقطوعى الدخل
شكرا على زيارتك الكريمه ؟
;;;;;;;;;;;;;;;;;;;;;
خالو احمد
والله انا فعلا عارف انها مشكله من بدرى لكن الموقف ده خلانى اموت من الغيظ اكتر لانى عشت الموقف
شكرا جدا يا استاذ احمد

أنا إنسان يقول...

كل رغيف
20 دقيقه
طب ةزعلان ليه بقى
ما هو كويس اهو
بكره يبقى كل رغيف ساعه

مشمش يقول...

انا سمعت ان في 4ماتو في خناقة بسبب طابور العيش في حلوان ومعرفش دة بجد ولا بابا بيهزر عشان هوة الي قالي
ربنا يستر

رفقة عمر يقول...

حضرتك كنت فى غزوة مش رايح تشترى عيش ووكمان بربع جنيه
بجد مش عارفه الحكومه هاتين فيينا اكتر من كدة ايه
ربنا يرحمنا من عنده اللهم امين يارب العالمين

walaa يقول...

عرف فرن العيش بتعنا فى الشارع الذى اسكن فييه
الناس بتحجز التوابير من الساعه تامنيه الصبح
بعد كده الناس هتصلى الفجر وتطلع من الجامع تحجز مكان ههههه
ربنا يلطف بينا
تحياتى ولاء

صوت من مصر يقول...

انا انسان
تحب تعرف ان فى ناس بتاخد عيش ب 2 جنيه وهى واقفه يعنى 40 رغيف تعرف تحسب بالدقيقه ؟
;;;;;;;;;;;;;;;;;;;;;;;;;;
مشمش
بيحصل فعلا وبباكى ده راجل متابع
;;;;;;;;;;;;;;;;;;;;
رفقه عمر
عندك حق على كلمه غزوه لكنها ليست بغزوه
دى حرب من اجل العيش
;;;;;;;;;;;;;;;;;;;;;;;;;;;;;
ولاء
تحب اقولك انى بشوف فعلا الناس وهى وقفه بعد صلاه الفجر عندنا
يعنى بكره
ممكن نبات عند الفرن يومين وممكن نعمل مخيمات