الأربعاء، ٦ فبراير ٢٠٠٨

سلمى وجمال ويوم من عمرى


قبل ما هكتب اى حاجه هقول شكر جامد لكل من دخل البلوج وانا مش موجود فيه اصل البلوج بعتلى وقالى انا زعلان منك بس فى ناس حلوه جتلى وزارتنى وانت مش معايه واتعرفت عليهم وهيبقوا اصدقاء قولتله عرفنى عليهم مش راضى بلوج رخم ؟

النهارده كان يوم مغامر جدا فى حياتى من فتره كنت بكتب واقول انى عايز اعيش من غير حب معرفش ليه كنت بكتب وانا واثق انى كداب المهم اليوم كالاتى كنت بايت عند ام حمزه ( اختى ) وطبعا رخامه حمزه وحنيه نور وبكاء ساره بيأثر عليه جامد المهم الفلوس جاتلى من عند ربنا وخرجت روحت الاجتماع فى الشغل ولقيت نفسى تايه فى وسط البلد ومشغل الاغانى على التليفون وسرحان مع نفسى فجاه تليفونى رن مين منى سليم زميله معايه

منى : الو

انا : ايوه يا منى

منى : انت فين

انا : انا فى وسط البلد

منى : طيب تعالى عند نقابه المحامين بسرعه

انا : اوك

طبعا روحت عند النقابه وشوفت الحكايه على سلم النقابه لقيت اسر قاعده ورافعه يفط مكتوب عليها استغاثه من اهالى بور سعيد لجمال مبارك ( محدش يضحك ) والاهالى بيقولوا هنعمل ايه ادينا بنكلم اكبر سلطه فى البلد مع اننا مش بنحبه ( وانا كمان ) فى سرى طبعا المهم خلصت الحدوته وصورنا مع الناس ورحت الاجتماع مع منى وقابلت اخواتى الاتنين واحده المديره والتانيه زميله خلص الاجتماع وروحت وقولت ايه افحت المدونه اشوف مين عبرنى النهارده وافتح الميل طبعا لقيت سلمى الى بقالى 3 اشهر مش بكلمها خالص قصدى هى مش بتكلمنى خالص وبتقولى محمد متزعلش منى انا اسفه انى مش بكلمك حتى على الموبايل اصل النمره ضاعت منى والحياه بقت كئيبه من غيرك

قولت فى عقل بالى هى اتجننت ولا ايه ولا عشان ربنا كرمنى وكنت لابس جاكت جديد من اسبوعين والتليفون والكوتش ولا ايه هى نسيت انا عملت ايه انا بصراحه كنت بكلم زمليتها من غير ما اعرف انه مقلب منهم هى كانت عايزه تعرف انى بحبها ولا لا بس انتم عارفين الرجاله ديلهم بيلعب دايما واخيرا اتصلحنا وقولت الحمد لله والفالنتي قرب وهتجبلى هديه طبعا مدى السعاده رهيب فلوس وحب جمال مبارك ورجعت مسمعش اغنيه صالحنى لمحمود العسيلى وعايز اسمع منير وهو بيقول حواديت

ياما فى زمانا بيوقلوب رسماها اعمرنا زى النجوم حواديت على ضل شبكنا

هناك ١٤ تعليقًا:

بسمه عبدالباسط يقول...

ربنا يوفقكم ويجمعكم على خير قريب جدااااااااا
وبعدين هو انت اللى مستنى الهدية
ههههههههههههههه

تحياتى لك

صاحب المضيفة يقول...

ماشي يا عم فالنتينو

لما نشوف أخرتها ايه يا عم

سلام يا صاحبي

صوت من مصر يقول...

بوسبوس ياريت كلامك يتحقق بجد وانا فعلا الى بستنى الهديه لانها اكيد حاجه تتاكل ؟
فالنتينو يا بوحه ياعم صاحب المضيفه هعرف بجد انت مين ؟ قريب

جميز يقول...

مبروك عـ الحب و الفلوس , يارب تحافظ عليهم , و ياريت لو تعرف تزودهم , يعنى الحنيه تخلليه اتنين و الحب يبقى اتنين برضه

:):):)

غير معرف يقول...

هاى يا محمد البلوج بتاعك عاجبنى قوى ليه؟
لانك مصرى زى ومش لاقى تاكل زى وعايش تقريبا بلطجه زى
حبيت البلوج بتاعك علشان صورة جيفارا وعبد الناصر الى هما عشقى
لانى يساريه ولا انا مش هبله ولا حاجه وعارفه ان بلدنا مفيهاش يسار ولا يمين وفيها هز وسط بس
لكن برضه يساريه
عجبنى صور الناس وهى بتقاتل علشان لقمة العيش وياريتها نضيفه فى الاخر
نسيت اقولك مبروك على الحب وحافظ عليه
شكرا على مرورك لمدونتى(قلوب بتنزف دم فى العتمه) وابقى كرر الزياره

صوت من مصر يقول...

جميز شكرا لحضورك والحب انا مش عايزه اكتر من واحد بس على قدى لكن الفلوس عمر الجنيه ما هيبقى اتنين فى الزمن ده
قلوب بتغنى فعلا انا مصرى لكن مش يسارى متشدد لكن لا اخوان ولا وطنى انا من عشاق ناصر وجيفاره لانهم فعلا بيشوفوا الناس الى تحت عايزه ايه ولا لازم نبص للاغنياء بس عموما شكرا لمرورك
الجميل

oceaneyes يقول...

يا سلااااااااااام !!!!

ايوة كدة ...بانوا على حقيقتكم ..بقى انت راجع للبنوتة عشان هدية الفالنتين ؟؟؟؟

!!!!!!!


الله يرحم ايام زمااااااااان اوى


والله البنات دول مظلومين معاكم ..بس خير خير

البلد لسة بخيرها برده


وعموما ربنا يوفقك


تحياتى

:)

صوت من مصر يقول...

عشان تعرفى يا اوشن انى مش انا الى رجعت هى الى رجعت وانا لو كنت غلطان كنت برضه هرجع لانى بحبها موت
ولا فالنتين ولا يحزنون
عموما شكر ا

حنة يقول...

ماشي يا عم الحبيب
سلم ع المزة .. وعليا انا هدية الفالانتين طالما عملتني مديرة وانا غلبانة باطمح لشغلانة مراقب جودة في مصانع الحاج احمد نصر

صوت من مصر يقول...

تصدقى ان البوست الوحيد الى مكنتش عايزك تشوفيه لانى هتشرد هتشردينى عند كل مصر يا حنه

د/اجدع بنوته يقول...

الله يسهلوووووووووووووووووو

صوت من مصر يقول...

اجدع بنوته هنا يا مرحبا وربنا سهله بعد 4 شهور

حـنــّا السكران يقول...

كيفك يا محمد

التدوينة دي عجبتني جدا ..طبعا انا قريت غيرها و عجبوني بس كنت محتار اكتب تعليق فين عشان أسلّم عليك اولاً و أشد على ايدك عشان تكتب دايما من قلبك و نقرالك ..بس لما لمحت خبر وصول الايميل من سلمى قلت خلااااااااص هناااا ..ههههه
انا بشكرك جدا يا محمد على تعليقك عندي و أرجو انك تزورني في مدونتي الأساسية لأن المدونة هنا كانت للتجربة فقط .

جـو غانم

joe75.jeeran.com

خالص تحياتي و امنياتي يا محمد ..و تحية لكل صوت مصري حر

حـنــّا السكران يقول...

نسيت أقلّك أهم حاجة

أنا لما شفت صورة غيفارا و صورة ناصر أول ما دخلت ..تمنيت لو كنت قريب منك كنت بستك على خدك ..لان غيفارا و ناصر و نصرالله ..أغلى خلق الله على قلبي