الأحد، ١٩ سبتمبر ٢٠١٠

افيونة الحياة


مشروخ يا ناى متغنليش زعقك وجعنى اه وانا مكفانيش
ده الواقع المرير اللى عايش فيه
حبيت حب بس من غير امان
حب مصر
خلانى حاسس انى عبيط وده شعور الناس حواليا
للاسف يا مصر
مقدرش انسى حبك ولا قادر حتى احاول
مع انك صعبة وعبيطة وهابلة انك تسكتى
وانا برضه ساكت
ساكت على اه وظلم وجروح وحاسس انك يا مصر
مسجلة خطر
يا مصر انتى افيونة الحياة
عايش عشانك وعشان سؤال صعب انساة
انا فين ؟
فى وطن ميعرفش معنى الامان
ولا بلد الامن والامان
ولا ايه ولا ايه
ولا اكون فلاتى خمورجى حشاش حرامى نصاب معايا فلوس
بالعكس
انا قلبى مفتوح يا مصر
لحبك وحب غيرك
لاهلك ولضميرك
لعشقك وبرضه مليش غيرك وطن
........
كيمو

هناك ١٢ تعليقًا:

Hanan Elshafey يقول...

جامده يا كيمو

احلي حب في الحياة بعد حب ربنا
حب مصر
حتي وهي ظالماك
اللي بيحب بيعرف يسامح

دي حته من فيلم :)

غير معرف يقول...

حب متعب ووجع دائم

تحياتي

Sweet Violet يقول...

مصر مالهاش دعوة باللى بيحصل فيها
مصر يعنى اهلك و ناسك و ذكرياتك
علشان كده بتحبها
الحكومة و النصابين و بتوع ال3 ورقات هى مش ذنبها حاجة فى كده
اصل يعنى مش بايدها مين مسكها و مين عايش فيها
:\

شمس النهار يقول...

ايوه كده ياكيمو

طلع اللي جواك

مش عمنا صلاح قالك بيحبها عشق زي الداء

انا كمان زيك

بحبها ولو طلعت منها اموت زي ماتطلع سمكه من الميه

عارف لما بسافر بره افضل اعيط في المطار والا المطروده منها

واما ارجع ابقا مبسوطه والا العيل التايه اللي رجعوه لمامته

بوست جون ياكيمووو

Foxology يقول...

كلنا حاسين نفس الاحساس يا كيمو حاسين بغربة جوة الوطن وحلم يصبح وطن !

بنت اللذينة بنحبها منعرفش ليه مع اننا مش طايقين نعيش فيها !!

ده سر الهى وده رأيى

تحياتى

Ramy يقول...

جامدة يا كيمو

بجد

جبت من الأخر

(:

جنون عـبقري يقول...

سلمت الأنامل .. ومين ما بيحبش مصر أم الدنيا .. تحياتي لك على موضوع الجميل

richardCatheart يقول...

حب مصر رصاصه لاتزال فى قلبى

تحيه يا كيموز

dr.lecter يقول...

لن نورث بعد اليوم
بلدنا مش وسيه ولا تكيه

أسمعنى شكراًً يقول...

أية ياواد الجمال دة

جامد فى التعبيرات والاوصاف
أفيونة هههههههه

هى فعلا أفيونة للكل

gogo!sf يقول...

مع الاسف انا كمان زيك وفخورة جدا انى مصريه برغم كل المتاعب اللى كل الشعب فيه بس بردو بنحبها

وعشان كل حد مش مصرى بيتمنى انه يكون مصرى وبيحسد كل حد مصرى عايش فى مصر

مصر ام الدنيا يا كيمو ومع الاسف تانى انها فاتحه دراعها للكل واى حد عايز يبقى حاجه بيبقى من خلال مصر والمصريين بس ماعدا شعبها الطيب

تسلم ايدك يا كيمو فضفض فضفض ولا يهمك
بس هى مصر لسه فى المعتقل ولا افرجو عنها

جوجو
ميرسيه على اهتمامك لتصحيح المعلمومه

بس انا ليه مش عارفه ادخل على مدونتى بعد التخصيص ده والنبى لو تعرف قولى ربنا يخليك هههههههههه تقريبا محاولتى هتكون فاشله مش عارفه

wafaa يقول...

تصدق اه
هيا ادمان فعلا
بس مسيرى هتعالج منه
واشوف بلد تانى احبها وتحبنى