الخميس، 23 أبريل 2009

اسال نفسك ؟؟؟؟؟؟؟؟


قبل اى حاجه كنت من يومين ناوى اقفل البلوج ولاول مره من يوم ما فتحتها ( كان احساس زباله جدا مالكنى ) ابسط الحلول ابسطها تكون انسان هتتعب ولسه مستنى مستنى يوم ما تكون انسان بنى ادم على وجه ارض ارض تدعى مصر ومصر التى فى خاطرى وفى دمى كدبه ولا حقيقه اظن انها حقيقه كلنا بنحبها اسال نفسك يعنى ايه حكومه ؟ المعنى الصحيح ليها انها تساعد على الامن والامان لكن انت حاسس انك فى امان وان الدنيا كويسه اسال نفسك يعنى شرطه ؟ التورته هى الى فى خدمه الشعب مش ال شرطه على الاقل دى بتتاكل وساعات بتبقى رخيصه اسال نفسك يعنى ايه وزارره ؟ يعنى واحد حرامى ماسك البلد ومعاها شويه فلوس بقى بيهم وزير ( عشان الحصانه ) اسال نفسك يعنى ايه مجلس الشعب ؟ المفروض انه بيكون لحد يتكلم عن المواطنين من منطقته ؟ للاسف كل منطقه ليها واحد حمار بيمسكها وخلاص ويطلع مصالح منها بالكوم يعنى ايه احزاب ؟ الحزب يوضح وجه نظر المجتمع فى امور معينه سياسيه واجتماعيه من بعض الفئات لكن الاخوان والوطنى وال وال وال نسيواااااااااااااااااااااا ان فى حاجه اسمعها مجاعه ياريت تفتكر تسال نفسك ان ربنا هيسالك عن صمتك ................................. اسمى صوت من مصر

هناك 37 تعليقًا:

kemet يقول...

السلام عليكم ورحمة الله وبكاته

كيمو
:)
مش عارفه اقولك ايه عازه اعارضك بس المرة دي معاك حق
انت قرأت اخربوست لدواير
انت علقت
انا حتى مش عرفت ارد عليها
عارف كان كل اللى بالي غنوة فؤاد ( يعني ايه كلمة وطن )

مش هاقولك زي كل مرة في امل
سواء جات امل او ماجتش
ده مش معناه اننا ننسحب
اقل حق لينا اننا نتكلم واللهي حد سمع ماش ( اقصد سمع بمعنى استجاب ) ما سمعش يبقى مش زنبنا انه اطرش

قول كل اللي نفسك واعمل اللي تقدر عليه لكن متستناش نتيجه علشان دوا الاكتئاب في البلد دي غالى
:)
ادعو الله انك تكون بأفضل حال

تحياتي
الى اللقاء

ايوشة يقول...

التورتة فى خدمة الشعب فعلا :))
بص يامحمد هقولك حاجة علشان ترتاح بجد من الهم اللى بيصيب كل الناس فى البلد دى الحل نصلح نفسنا الاول وكل انسان يبدا بنفسه ساعاتها البلد حالها هيتعدل انا وانت وغيرنا لازم نتعلم الايجابية اكتر من كده

صوت من مصر يقول...

kemet
انتى صح وانا صح وكلنا صح بس سكاتنا هو السبب فى ضعفنا قدامهم
ومتعترضيش على الفاضى والمليان
عموما تعليقك دايما بيبقى مفيد لنفسى
وانا بافضل حال لكن يوجد الافضل منه وهو ما اتمناه للجميع

صوت من مصر يقول...

ايوشة
طب انا بقيت ايجابى وانت واهلنا كلنا وكل الناس هل كده هما هيبقوا كويسيين
ما اظنش

kemet يقول...

السلام عليكم ورحمة الله وبركاته

كيمو
انت عارف ان انا مش بعارضك ع الفاضي D:
بس اناحاسة ان جواك حزن الحزن دا جوا كل النا اللي بتفكر
عارف اوقات الواحد من كتر الضغط على اعصابه وان يحس انه مافيش فايده اوقات بتقلب معاه بحالة عكسية بإنه ينفض ويهيس ويضحك ع الفاضية والمليانه ويمكن ع الفاضية اكتر
السحابة السوده اللي واقفه ادام كل الشباب المصري مش بتعدي ومش بتتزحزح من مكانها حتى.

ربنا يريح بالك يا كيمو

:)
تحياتي
الى اللقاء

Foxology يقول...

الحل حاجة واحدة بس >>>

ابدأ بنفسك :)

لو كل واحد عمل كدة يبقى خلصت


تحياتى :)

mahasen saber يقول...

ازيك يا كيمو

انا اصلا اتنكد عليا من الحزن والياس اليى فى كلامك
نزلت شويه على البوست اليى تحته ماانتا عارف بقالى قرن مدخلتش بلوجات وقلت اشوف ايه فاتنى يقوم يتنكد عليا اكتر واكتر
انا دلوقتى هموت واتطمن على الولد اليى وقع تحت يد من لا يرحم ده

ربنا يفك كربه ويحميه من بطشهم

يا حبيبى ولد صغير على الوحشيه دى

romansy يقول...

نتمنى ان تعلو اصواتنا فى حب مصر
تعلو وتصل الى عنان السماء ان يفرج كربنا يارب العالمين

رؤية يقول...

مين عارف
يمكن بكرة افضل
يمكن..


تحياتى

dodoo يقول...

مش عارفه اقولك ايه يامحمد

بس كل اللى انت قلته ده للاسف هو الواقع فعلاً

بس احياناً بقعد اقول

من اعمالكم سلط عليكم

ممكن لضعفنا وسكوتنا واستسلامنا وسلبيتنا حتى فى حياتنا الشخصيه

هو ده سبب اللى احنا فيه

احنا لا بنحاول نغير نفسنا ولا حتى بنحاول نعبر عن راينا

كل واحد فينا _ الا من رحم ربى _ عنده لا مبالاه فى كل حاجه

اللى اقدر اقولهولك انك مش هتقدر لا تغير الحكومه ولا الوزاره ولا الرئيس

لان دى مش بتيجى من فرد التغير بيجى من امه

لكن ممكن تغير نفسك وتحاول بعد كده تغير اللى حواليك

" اذا رادت شىء فاسعى اليه ولا تنتظر قدومه "

mnoon يقول...

السلام عليكم ورحمه الله وبركاته

لا بلاش يأس يا محمد
لو كل واحد زهق زيك قفل مدونته
ووقف كتابه وتعبير عن رأيه
تفتكر دا هيكون فى مصلحه مين؟؟؟؟


يأسك وصبرك بين إيديك إنت حر
تيأس متيأسش الحياه راح تمر
" صلاح جاهين"

حنان الشافعي يقول...

بصراحه مش عارفه اجاوب ولا سؤال
زود عليهم بقي
هو يعني ايه امان خصوصا للي مشافهوش
حسبنا الله ونعم الوكيل
اقدر مننا

صوت من مصر يقول...

kemet
الحمد لله انك مقتنعه مليون فى الميه بكلامى
بس السحابه كده ملهاش حل ؟؟؟؟؟؟؟؟؟؟؟؟؟

صوت من مصر يقول...

Foxology
بدات بنفسى وانت كمان بدات بس للاسف هموا جايبنا وراااااااا

صوت من مصر يقول...

mahasen saber
للاسف يا استاذه يا معلمتى الصبر بس صبرى نفذ
الولد متخافيش عليه ( على راى المثل محدش بيموت من الجوع )

صوت من مصر يقول...

romansy
نعم كلنا بنحب مصر
نعم كلنا تتجه رومنسيتنا اليها
شكرا

صوت من مصر يقول...

رؤية
اتمنى بجد يا رؤيه
اشكرك

صوت من مصر يقول...

dodoo
لا انتظر كثيرا ولكنى اتقدم احيانا
لكن هكون لوحدى اسف مبعرفش اكون وحيد ؟

صوت من مصر يقول...

mnoon
يا منون مش هقولك اى كلام لان كلامك ملوش رد ( ومين هيرد على عمنا جاهين ) اشكرك وبجد اتمنالك حياه سعيده

صوت من مصر يقول...

حنان الشافعي
امان امان دى كلمه معرفهاش ولا سمعت عنها الا فى الافلام الامريكانى
اشكرك يا حنان

Tamer Nabil يقول...

السلام عليكم

كلامك صحيح والناس كلها عارفة كدة رغم الاعلام المضلل واللى بيقول حاجات غير اللى احنا نعرفها

ربنا يصلح الحال

اكيد للظلم نهاية

تحياتى

فشكووول يقول...

كيموا
هى البطاريه خلصت ولا المخ هنج زى الكمبيوتر
ايه الكلام ده يا كيمو مصر التى فى جيبى وفى فمى احبها من كل بطنى وسنانى
وما عادتش فى الخاطر ولا فى الدم .. وكل اللى بيقول كدا فى الخاطر وفى الدم بس بيعاكس نفسه وبيشتغل نفسه.
يا كيمو يعنى ايه كلمة وطن (الغنوه اللى العيال بيغنوها فى التليفزيون والراديو) عشان هما واكلين الوطن فى بطنهم.
فيه ولد مطرب بيحب مصر قوى قوى قوى ومن كتر حبها قاعد يغنى لها ليل ونهار ولما احتاجته مصر عشان يؤدى ضريبة الدم هرب وزور .. وكفايه عليه انه يحبها فى الاغانى اللى بيقبض عليها فلوس
يا كيمو الله يخليك ما تقلبش علينا المواجع
تحياتى

Soul.o0o.Whisper يقول...

السلام عليكم و رحمة الله و بركاته

بص رغم كدا
إلا انى دايما مقتنعة ان ربنا مش بيظلم حد


و مش بيحكم حد على حد الا من نفسه

يعنى بص لحالنا احنا كشعب مع بعض بنعمل ايه
هتلاقى ان الحكومة يعنى مش فارقة كتير
بس كل واحد و على قد سلطته بئا


أنا آخر شئ توصلت له
انك عليك بنفسك
حاول تكون كويس
و علاقتك بربنا كويسة

هييسر لك امورك
و يسلك لك طريقك
برغم كل المصاعب



دمت بود

واحد من العمال يقول...

السلام عليكم ورحمته وبركاته

نعم أخى العزيز هناك العديد من الأسئله ولكن يجب أن نبحث عن الأجوبه
وحنتحاسب أكيد عن صمتنا عن حقنا فى مصرنا التى أصبحت مضغه وهدف للسب فى أفواه بعضنا
بس مصر مش هيا الحكومه
ولا حتى مصر هيا الرئيس أياً كان
ولا هى الشرطه بقله أدبهم ولا الحكام
مصر أكبر وأعظم بس عيانه بينا وبالحكام
وربنا يشفى

وتقبل تحيتى ومرورى

صفــــــاء يقول...

هو دة الموجود
يا نستحمل يا نهج منها

yoyo يقول...

حاسة كلامك اوى
حاسة بيه طالع من قلب انسان مصرى بجد
موجع على حاله وعلى بلده واللى بيجرى فيها
اسال نفسك
يعنى كل واح المفروض يبدا بنفسه عشان نقدر نصلح
ومش نقول يالا نفسى وبس لانها كدا هتخرب اكتر واكتر
مش عاوزة خلى عنك امل بس على الاقل حاول مش تخلى الياس و الحزن يسيطر اكتر عليك
عشان تقدر تكمل

تحياتى
يويو

بنت أبيها يقول...

ده احساس كل مصري دلوقتي

ونفس المعنى تقريبا اللى كتبته في اخر بوست ليا

لكن مشكلتنا ان احنا يا مشطرنا في التاملات والشكاوي

كلنا كمصريين بنتميز بهذا الموضوع

لكن نعمل ايه عشان نغير واقعنا للافضل متلاقيش حد يقول

بلاش ياس واحباط فيه ناس اسوأ مننا بكتييير

لكن المهم ان احنا نعمل ان حالتنا تتحسن مش تسوء

دمت بخير

aidy يقول...

مش عارفة اقولك ايه بجد

بس نفسي مرة اشوف نظرة تفائل فى كلماتك

الحياة فيها صعاب كتير بس احنا كشباب لينا دور اننا نغير على الاقل حياتنا احنا

تحياتى

صوت من مصر يقول...

Tamer Nabil
اهو انت قولت ايه اعلام مضلل لكننا هنا سواااااااااااااااااا مع بعض مفيش كدب

صوت من مصر يقول...

فشكووول
ايوه مهنج او خربان اى عطلان لكن ممكن اقول كلمه المطرب ده اسمه تامر حسنى وللاسف نسى ان فى اسطوره اسمها منير
نورتنى يا عمو

صوت من مصر يقول...

Soul.o0o.Whisper
اقولك ايه اقولك ان ابويا اتظلم اقولك انى مظلوم اقولك ان 80% مظاليم للاسف احنا ده ولو كل واحد بدا بنفسه للاسف هتلاقى الظلم ذاد
نورتينى

صوت من مصر يقول...

واحد من العمال
فعلا مصر ليست الحكومه لكن يتحكم بها الحكومه ولا ايشششششششششش ؟
نورتنى بود

صوت من مصر يقول...

صفــــــاء
يبقى افضل لى ان اموت وانا حقير او اعيش فى حته تانى غيرها لكنى زى السمك ؟
اشكرك

صوت من مصر يقول...

yoyo
للاسف الاراجوز دايما بيتكلم مع انه اراجوز بس هو بدا من بدرى ونفسه الناس تبدا زى حاله
اشكرك يويو ونورتى صوت من مصر .

صوت من مصر يقول...

بنت أبيها
انا لو معنديش ياس ومكتبتش كده اعرفوا انى زى ابو هشيمه او احمد عز

صوت من مصر يقول...

aidy
هتلاقى نظره التفائل لما الاقى حقى فى مصر
بجد اشكرك

شمس النهار يقول...

شوف مش هقدر اقول لك انك غلط والا هعاتبك علي الاحباط اللي انت فيه ده
بس هقول لك اننا لازم نبتدي بنفسنا الاول
الشعب نفسه بقينا وحشيين اوي مع بعض
كمان بنتكلم وبس
عارف صناديق الزباله اللي اترصت ده امام العمارات كان العربيه الكبيره لما تيجي تفضيهم كان نصهم بيقع في الارض يوم علي يوم الدنيا هاصت
لما كام رجل علي ست علي شاب وقفوا لهم
واعترضوا وهددوهم مافيش قشايه وقعت تاني علي الارض واللي بيقع بيلموه وكل ماتيجي العربيه اتنين بوابين بيقفوا معاهم لحد مايمشوا
وقريب هعمل بوست في المدونه المشتركه هحكي فيه بالصور قصة عماره كانت هتتبني في حوش مدرسه لما الشارع وقف يد واحده اتوقف البناء
بعد ماكان طلع ادوار كتير
نبتدي بنفسنا ونعمل حاجه قبل مانحاسب الحكومه
شوف التجار بيعملوا فينا ايه همه دول الحكومه
مع ان التاجر ده مواطن زي زيه بس احنا اصلا وحشين في قلب بعض
انا مش بدافع عن الحكومه بس عايزه
صوتك يتجه شويه للناس
ان الله لايغير مابقوما حتي يغيروا مابأنفسهم