امتى يموت ونخلص

نظريه محتمه بحته عقليا
سؤال نساله لنفسنا ؟
مين هيحكم مصر بعد حسنى مبارك ؟
اسف لانه لازم يموت لانه مش اله صح كده اه هو معمر جدا بس هيموت باذن الله عنده قصور فى الدوره الدمويه مش قادر يتحرك ولسه عايش
المهم السؤال بيقول من هيحكم بعده
مش لاقى اجابه
بس ليه منعملش ساعتها انتفاضه ونننزل قرار انه ميبقاش لينا حاكم
لا غلط لاننا شعب منمشيش غير البكرباج صح المهم مين هيحكم
انا عن نفسى هنتخب كرومبو اهو جامد طحن ومش بيكدب ومش بيسرق وكمان معاه قرشين كوييسين من الاعلانات فصعب انه يفكر فمال الغلابه صح
المهم جه فى بالى حاجه اسمها اقرار الذمه الماليه بيكتبها كل وزير او رئيس جمهوريه او شخص فى منصب كبير
هل مبارك مضى على اقرار الذمه الماليه ولا هى كوسه ولا تلقيه كاتب لاعدى له عشان لو مات مولاده يطالبوا الدوله بالى ليهم
يا جماعه بجد انا اتخنقت طب ممكن سؤال للرئيس المبجل المحترم محمد حسنى مبارك ؟
هو انت امتى ناوى تموت او تنتحر ولا هى الدنيا حلو معاك قوى كده
طب ليه الدنيا وحشه معانا
ياعم سيبك انا مواطن مطحون تحت ترابها بكل معانى الحياه

ثلجه .....

سكوت مش عايز اسمع صوت ده احساس كويس بس احساس تانى لو انت فى وسط زحمه وحسيت نفسك تلجايه مش عايزه تخرج من التلاجه هتسيح صح بس انا كده هبقى فراغ تحس نفسك جوه كبايه وصغير ومش قادر تخرج احساسك ايه مشاعر تجاه الاخريين من غير كلام بتطلع بس العيون تتكلم نظره لحبيبك تبقى ايه طفل مستنى يوم عيد ميلاده هديه يفتحها يلاقى جواها كل حاجه هو ده احساس الحب ؟ ولا ولا ولا تقدر تقولى مشاعرك ايه بتحب ولا هتغنى وتسمع بجد انا بحب مصر بس مش لاقى الهديه قرار نفسى اخده اننا زى ما بنعمل عيد للحب نعمل عيد حب مصر هل انفع اقوله لا طبعا لانى حقير او مصرى فقير كده التلاجه بتطردنى من جواها وهسيح بس من غير سياح كونك ملكش لازمه غير ممتع لكنى مستمتع بده اهو عايش لا اقدر اخرب ولا اقدر اصلح ؟ كون سعيد وارقص غصب عنى ارقص ولا انهزام ولا انكسار بدون فايده ؟ ارجو التمييز ارجو العنصريه حتى اكون بطل لكن راح زمان الابطال

جنون

انا مجنون دى بدايه ولا ايه مش عارف بس على ما اظن ان الجنون شىء جميل كنت مريح دماغى وعايش تبقى مجنون تسكت متتكلمش تبقى مجنون تتكلم تبقى مجنون نظريه العالم اصبحت لهو من يبحث عن المال وعن العمل المادى دون الرجوع الى اى كان هذا العمل يمثل نوعيا روحا من الثقافه او به حتى القليل من الفن لكن اصبحت الحياه عباره عن وظيفه وانا لست اهوى الميرى وعلى راى المثل ان فاتك الميرى اتمرمغ فى ترابه لكنى ضد المثل والفكره كلها لانى بحب الجنون والفن اه ممكن اكون غبى اه ممكن اكون مش بفهم حاجه فى حياتى لكنى بعمل الى انا عايزه فى اى وقت دون التقيد بحكم الوقت والزمن لكنى مش بجرح حد بيتقال عليا مجنون انا موافق انا مجنون مجنون وجنونى ده اختيارى بصرخ بعلو صوتى يا عواصم انهارى بشرب سجاير مع انها غلط بحب اطنطت زى الاطفال لانى لازلت طفل اعيش بدماغى حينما اكون مع اصدقائى انسى همومى ومشاكلى لا اعرف لماذه اريد اكون جمعيه لمافيا الجنون تعبث تلهو لكنها فى الاخر لها نشاطها وهو حب الناس اانت مجنون ؟ ارجو ان تجاوب ولا تخف فالجنون ليس شىء مرغوب فيه لكنه ليس حرام

حياه

دروب ورها دروب نمشى فيها من غير غناوى من غير حياه تحس انك فى طريق من غير مياه بس هنعمل ايه هى دى حياتنا بلا طعم بلا اكل اصلا لانها ليست للبيع ومعروضه فقط مثل بعض المحلات يوجد لافته للعرض فقط تلك هى الحياه جافه لايوجد بها مؤى للغلابه بل يوجد بها قصور للديابه فهل اصبح لص حتى تبتسم الحياه ام انتظر الحياه تغمض جفونها تجاهى سامنحكم الظلام حتى لاترى عيونكم كل لص حتى لا تنظرون الى الشمس التى تحرق الاعين والعكس فهم يسمون بالاعين الساهره وهم فى الاصول لصوص هل انوى التصالح معكى يا حياه الاجابه لا والف لا لانى انسان لست بخفاش الليل نعم الليل ليس ملكى لكنى استمتع به مثل اى متضهد نعم استعمتع بالغناء فى الظلام هل اصبح للظلام معانا فرص نعم اصبحت افتقد الشمس الى لا تروى العطشان تجف المياه تهرب الكائنات الصغيره الى مثلى ومثلك بل واننا اصغر انه الاكتئاب بعينه لكن لما انتظر اريد فعلا ان اكون لصبل ومحترف حتى استطيع اكل السندوتش الممزوج بطعم الحياه فى الشمس دون النظر الى جيبى المفتقد دائما الى المال ؟ انه ما يسمى بحياه الاكتئاب هل تستطيع البكاء ( لا حتى لا يرانى الاخرين وانا ابكى يظنون انى ضعيف ) تلك هى حياتى

100 سنه هل هو عمرى ؟

ماسك سجار وكبايه شاى على مكتب عتيق مليان تراب
من اثار الزمن الى عمره مقدر يمحى افكاره من نفس اليوم فى السنه
يوم بيقول عليه مشئوم وغيره يقول لا
بص على المكتب لقى ورقه وقلم كتب كلام على ورق اصفر من تعب الزمن
بس مين يسمع ومين يقرا
قالوا عليه مجنون جنون دون حدود قالوا حب بلده قالوا فاشل
وكتير قالوا اهبل بس ليه عايش طفل عايش بدماغه وميعرفش يلبس قناع
مش بيكدب بيحب الشيطان احيانا لانه لايرى الحياه دونه لها طعم
يرى نفسه منذ 23 عاما وكانه كما ولدته امه
خارج من الرحم ببكاء ولكنه ظل يبكى 23 عاما ولد فى منطقه شعبيه لذالك فهو يهوى الشوراع
طعم البيوت والمناضله من اجل رغيف غير موجود وغاز يباع بالطوابير لكنه يذهب لغيره الى داخل المنزل بالمجان
هل هو انا ؟
الاجابه بنعم اكملت ال 23 عاما من الحزن والبكاء اكملتهم وساعات الرح تمر امام عينى دون الرجوع لاى اشرطه فيديو
احساس ياخذنى بانى قد اكملت ال 100 عام ارجو ان يظل عامى افضل مما انا عليه
واخيرا الدعاء لله من اجل الرضا والتوبه على ما فعلت منذ 23 عاما ؟

غبى بيموت 100 مره كل يوم

lمش هقول تلك القاهره ولا هقول اى حاجه مش لاقى حاجه اقولها غير انا امتى ينصلح حالى انا والى زي حالى مش هستنى تغيير لان التغيير متوقع انه هيبقى للاسوء بس برضه هتقولولى انى عايش هقولكم اه عايش لكن بموت 100 مره فى اليوم الى اعرفه ان فى ناس اسمها بيبقى موجود مع انها مش بتعمل حاجه او عملت لنفسها كويس مع انها مش بتموت 100 مره فى اليوم بس عايشه واسطه شغل وظيفه تترقى فى خلال اول شهر يقبض بدل القبض مره اتنين ومش ببيعمل حاجه ازاى معرفش تعالى نقول اننا هنموت نموت لاننا ناس مش من حقها انها تتشكر ولا حتى تسمع كلمه شكرا لاننا بنفكر ولا عشان احنا ناس مكتوب عليها تموت اخر حاجه كلمه هقولها اتقلتلى خليك فى نفسك وهى الناس كده يا فوق يا تحت اقولكم انا بقى هفضل تحت لانى بفكر وناس بتقولى انى غبى مع ان الناس دى ممكن تكون عايشه كده وخلاص انا بقى هفضل كده ولو مت 10000 مره مفيش حد هيمشى ورايا لانى مش معروف ولانى ماذتش حد للاسف فاشل اسمى فاشل فاشل ليه لانى مصرى ؟ اسف لحالتى المكتئبه واسف للتاخير بمتحن ؟

برافو اسرائيل ؟

مشكلتى انى عربى كلمه بتتقال كتير صح بس هى فعلا حقيقه
حقيقى لاننا بنتعذب فى ابو غريب وفى عزه وفلسطين كلل وايضا فى مصر وفى دارفور لكن نسمى بارهاب
فعلا لو اننا نملك الارهاب لن يكن حالانا هكذا على الاقل كنا مثل بن لادن نسطيع الضرب من الخفاء
انا لست بارهابى وايضا لست متزمت فى الدين لكن من عشاق بن لادن اين هو فى ظل تدهور احوال المسلمين والعرب
هل هو عربى هل هو مسلم اين انت يا بن لادن تنصرنا
بجد حكومات هبله فى ظل حكومه اسرائيليه امريكيه ذكيه
اسرائيل تجعل زيارتها لمصر قبيل ساعات من ضرب غزه
تستنكر العروبه ذلك نصبح نحن متفقين مع الصهاينه على الضربه تكرهنا الشعوب العربيه
لكن لماذه الزياره يا مبارك
بجد الشعب نفسه كاره ده
وكمان احلى نكته تسمعها مظاهرات الشعب الحكومه رفضتها ومنعتها
تعالى اتفرج على مظاهره الحزب الوطنى زى الفل مأجرين ناس كل واحد واخد 10جنيه وايه قايم باحلى واجب والحكومه بتحميهم
اى خدمه ؟
بجد اسرائيل لكى من العرب 10000 تحيه لانك نجحتى فى الخطه العظيمه ؟

امتحان اخر السنه 2008

كلامى ممكن يكون مش منطقى

ممكن كان قبيح واسف بجد

اى حد مكانى بيقولها بس فى سره

ممكن خوف وممكن عشان هو مؤدب وده غالبا

قبل اى حاجه ده امتحان صغنون كده على الماشى واجابته موجوده ؟
السؤال الاول :

عرف او عرفى معنى كلمه حزب وطنى؟

الاجابه سرقه نصب بلطجه عربجه تنفيض جيوب الغلابه اهوحكم والسلام والى قال انه وطنى يبقى كداب هو وثنى او كوسه او سلطات

السؤال الثانى ؟

علل

قتل اطفال فقر ومجاعات لايوجد خدمات وكوارث عام 2008 ؟

بسبب الحكومه طبعا ولو حد تانى يبقى احنا عشان نكدب وناخد نتيجه حلوه ماهى كوسه او محسوبيه

السؤال الثالث ؟

اكمل

الرئيس حسنى مبارك هيقعد لغايه امتى ماسك الحكم ..............

هيدفن وهو على الكرسى

السؤال الرابع ؟

حاسس انك مصرى

الاجابه لو كنت غنى او ابويا وزير او احمد عز

السؤال الخامس

السلطه المصريه تتكون من ؟

حراميه نصابين

وفى اخر الامتحان نقول الدرجه بقى من غير زعل 100 %

وهتدخل اقتصاد وعلوم سياسيه وتطلع تشتغل على ميكروباص راما خط حلوان 15 مايوه او تقف فىت مطعم فول لو تحب

هى دى مصر والنتيجه وساعه الامتحان يكرم المرء او يهان واكيد يهان يهان يهان

يا اخى توكااااااااااااااا 3

ياريس هكتب كده على السريع كام كلمه اتمنى انك تشوفهم او تسمعهم

كام واحد جعان كام واحد بيتعذب

ياريس سيبك انا كارهك زى 80 مليون لو قولتهم اقفوا على جبل هيقولو ماشى مش خوف لا عشان تمشى وتسيبهم

يعنى ايه 28 سنه لا دول حبه بسيطه وياه بقى لو قفلت ال30 هقولك مبروك وهعمل فرح وكل المعازيم هيلبسوا اسود

اسود زى ال 28 سنه 28 كبارى صح ياريس عايز اتجوز ياريس عايز اكل ياريس توكا ولا انا اصلا قليل التربيه احااااااااااااااااااااا ياريس

اسف لاخوانى البلوجريه بس زهقت منه يعنى ايه الراجل ده عمل فينا زى سعاد حسنى فى الكرنك كلنا مش واحد بس

يعنى ايه مفيش تعليم يعنى ايه بلد يموت فيها الثقافه والفنون على ايد كبير كبراء الشذوذ فى مصر الاستاذ الدوك البروف ( فاروق حسنى ؟)

للاسف انتى فعلا تستحق كلمه الرئيس البوبو او الكنج لانك قدرت تخدع ال 80 مليون نسمه فى سنين كتير ياراجل بوش مقدرش يعملها

عارف لو ابنك مسك الحكم بجد هقلع وامشى فى الشارع ملط مستنى اى حد من ورا ضهرى افضل 100000 مره من انه يقلعنى لا انا قالع جاهز

بجد زهقت ياريس احنا خلاص قربنا نبقى منتهين الصلاحيه عارف ليه شوف تحت الكبارى الى بنتها بيحصل ايه تلاقى اطفال كتير نايمه ماسكين كيس جواه كوله عشان ينسى الهروب منك

بجد كفايه ظلم فينا كفايه 28 سنه مشوفتش غيرك طول عمرى كفايه الشعب يخاف من كلمه حكومه

كفايه انت بجد بكرهك لو شايف كلامى تبقى فعلا معندكش دم انك تسمع وتشوف وتسكت

ياريس هو الى خلق الكرسى ده مخلق غيره ياعم اطلع منها واجيبلك كرسى بسبع عجلات

بجد اسف 1000000 طظ

بجد اسف توكا

بجد اسف انا قالع وجاهز

مواطن مطحون

تلك القاهر (2)

تافه

اه تافه لانى بحب ارضى اه تافه لانى مصرى اه تافه لانى بدافع عنها بكلامى وحبى ليها سؤال انت بتحبها مش الموزه لا مصر

ياسيدى فكك من ده سؤال هتوه صح ولا مصر هى امى والى شتم امى يبقى ؟

ولا ايه ولا ايه ارجع واحكى عن حبى للقاهره تانى موافقين

عاشق ارضها ابتسم وانا ماشى جنب بيت قديم يدل على عمق التاريخ النيل مع الشمس مع ندى الفجر الذى يملء السماء

تنظر اليه ولا تريد ان تغفو تريد الذهاب الى السماء حتى تشعر انك قد وصله لقمه النشوه فى الحياه وهى الجلوس على ضفه النيل تنظر للسماء

والمطر يهطل عليك تراه قطره قطره تشعر وكانك على خط الاستواء تنشد اغنيتك المفضله بصوت عالى والسماء تتلألآ داخل عينك

ترى عجوز جالس ينتظر الفرج ومعه صناره ليمسك باحدى عشاق النيل اهل هى جنيه ام سمكه تظهر له السمكه وكانها جنيه من البحر

اتت اليه تنظر اليه ان يرجعها الى الماء حتى لا يفوتها منظر

سماء القاهره فى المساء ؟

لبرد القاهره شعور اخر

تاج بطعم اللحمه ؟

تاج جالى وكمان فى العيد هى ناقصه ؟

اه انا مكتئب بس ده عيد برضه ولا ايه ؟
التاج من عند دينا ضحك ولعب وجد وحب يلا بقى نجاوبه

ماذا يمثل لك العيد ؟ وما أكثر شئ يبهجك في مظاهر العيد ؟

العيد يعنى حاجات كتير اولها نوم عميق وتانيها نفسى اخرج ومش بخرج ثالثا بحب اشوف العيال بترخم على بعض ةتلاقى طفل وبيعاكس بينت موزه بفرح جدا واقول مستقبل الرخامه فى مصر بيتتطور وده فعلا الى بيبهجنى .

اوصف لنا طقوسك في العيد .. من ليلة العيد لآخر يوم ؟

الوقفه بنام لحد المغرب واصحى افطر اروح القهوه اشيش خوخ غالبا مع قهوه مانو اروح اكل تانى ( طفاسه ) اتصل باى حد صاحبى غالبا حسين نروح نصيع فى اى حته واول يوم انااااااااااااااااااااااااااااااااااااااااااااام تانى يوم اقعد على النت والشارع واشرب بيبسى وسجاير بس اليوم التالت والرابع حسب التساهيل بس غالبا مش بخرج

احكي لنا أطرف موقف حصلك في العيد ؟

مبلاشى

كنت خارج فى العيد مع اخواتى وكنت صغنطوطجدا ووقعت فى نافوره وهدومى بقت طينه والناس كانت بتضحك عليه

يرضيكم كده

بتحرص على تهنئة الأهل والأقارب والأصدقاء بالعيد .. ولا مش بتهتم ؟؟

مش بهتم الا بساره بس

مين أول حد تزوره أو تكلمه في التليفون /الموبايل عشان تهنيه بالعيد ؟

طبعا ساره ومن الاخر مش بشحن فى العيد عشان ببقى رخم جدا

إيه الفرق بين العيد الحالي .. وعيد (أيام الطفولة )؟

كان فى الطفوله بيخلص بسرعه دلوقتى ممكن يقعد ساعتين زياده

تفتكر الحياة من غير عيد .. هتفرق كتير ؟؟؟

طبعا مش هتلافى لحمه كتير ولا هتاخد اجازه من شغلك عشان تعرف تنام ولا هتصيع

إيه أجمل رسالة تهنئة بالعيد وصلتك .. قلنا طبعااا بتقول إيه ؟؟ ومن مين ؟؟

هى من ساره ومش هقولها عشان عيب وغير كده جالى رساله بتقول كل سنهوانت طيب يا اجمل قلب من نمره غريبه وحاولت اتصل مش بيرد غالبا موزه ؟؟؟؟؟؟

لسه بتاخد عيدية ؟؟ من مين ؟؟ وبتديها لمين ؟

مش باخد عديه ولا بدى اى مخلوق عيديه بس لو اولاد حنان اختى موجودين فى مصر كنت هبقى مفلس بس برضه حنان بتدينى العديه عشان مانكرش الجميل

إيه رأيك في التاج ؟

محتاج كرومبو عشان يحلوا

تحب تمرره لمين من المدونين ؟ اذكر على الأقل 10

محاولات للبحث عنى

ساعات ساعات

جنه

لا شى يستحق

حزينه

m k

حاسوبتيه

قلوب بتغنى

كلمتى

موجوده انا

وكل الى عندى واعرفه انا هفتكر مين ولا مين

كل سنه وانتم طيبـــــــــــــــــــــن

سجن ودم وعرق هديه العيد ؟ مسجون

فى الوقت الذى احلم فيه ككل مصرى ان ارتقى الى النجوم وامسك بالرمل هناك لارى

هل هو نفس رمال وطنى هل له نفس الهويه هل يظن نفسه داخل وطن ام

ام مسجون مثله مثلنا فى وطن لا يعلم متى يخرج منه او متى ينقضى الحكم

فى بلاد كثيره بها حروب انظر اليها بحقد احسد من يعيش بها

وكما قال المثل عيد باى حال جئت يا عيد

فياتى العيد وانظر الى النفاق الموجود داخل الشعب المهموم وهو بفرحه العيد ينسى

كانه عطشان وملقاش غير كاس كاس عذاب بطعم الفرحه

يتذوقه قليل منه تنسيه همومه تنسيه هويته يفتح الجريده

فى اول ايام العيد اول خبر كل الدنيا بعتت تهنئه القواد المصرى بعيد الاضحى

يا جدعان الخرفان الايام دى بتدبح هو هيدبح امتى

بجد زهقت

واه فرحان بالعيد

واه شربت من كاس لونه لون دم اهلى

وريحته ريحه عرقى

وطعمه فرحه خفيفه

بس مفهوش طعم البيوت

ياريس افرج عننا من السجن ؟
مواطن مسجوـــــــــــــــــــــــــــــــــــــــــــــــــــــــــــــــــن

فى الحريه

يا اخى تــــــــــــــــــــــــــوكا و 10000 تـــــــــــــــــــــــــوكا

خوف من داخل قبر يسمى بوطن

خوف كلمه بتعنى كتير اتكلمنا عنها فى حياتنا كتير بتيجى علينا لحظات نحس فيها ان مفيش خوف .

صح مفيش بس ازاى اعيش وانا مش خايف ازاى مخافش من كيان بحاله

امريكا . اسرائيل . روسيا . نظم سياسيه باكملها من الممكن انها تكون سبب خوفك

نبعد شويه ونقول صعب بس بخاف

تخاف من بلدك حبك ليها خوف عليها . مستقبلك ازاى

فكرت فيه

مش هتندم فكر بس مترجعش وتقول ياريت الى جرى ما كان ؟

مخفش ازاى من قانون من دماغ ابن العمده

ويقولك ايه سك الملكيه ؟

هل هو ده صابر الطيب بطل فيلم خالد يوسف طب ممكن نعرف البلد هتتباع لمين .

ولا مش من حقى مع انها املاكى .

افتكرت كلمه فى الاخر احنا كاننا هوااااااااااااااااااااااااااااااااااااااااااااا.

بجد هوا محدش بيحس بينا ممكن اعرف ازاى هاكل انا وانا ونص انا من سك الملكيه

طيب انا موافق ممكن سؤال صريح شويه .

انا هاخد كام واحمد عز كام ولا هنتساوى ؟

ياعم فكك انا هشرب سجارتى وانا خايف احسن اموت من الخوف ..................................

بصراحه طظ فى كل قانون ملوش لزوم

ارضيه شطرنج يا بلد

قبل اى حاجه بشكر كل الى سال عليه فى غيابى وفى حضورى واحب اوضح حاجه مهمه جدا لدودو صاحبه مدونه كلمتى بجد اخر بوست كتبتيه هايل جدا جدا واحب انى اذكر اسم اسم لكن هفتكر مين ولا مين العيله كبيره

قوى يا اخونا بس كلكم فى قلبى

المهم وانا بتشنكت كده مع اصحابى زى كل سبت واتنين فكرت انى انزل على النيل وفعلا روحت وانا هناك فكرت فى سؤال مهم

وهو مين هيحكم بعد بعد الى ربنا يقصر فى عمره ؟

هل اخوانجى ولا وطنى تانى ولا تجمع ولا ولا ولا ولا

المهم تعبت مش لاقى حد فيهم كويس زى جمال عبد الناصر او فيدل كاسترو مع ان فيدل كاسترو ساب الرئاسه لابنه راؤل بس برضى الشعب

الى هو احنا اسمنا شعب اه ومظلومين اه بس بصراحه حاسس ان المستقبل هيبقى اسود او بمبى او ابيض وياريت

عارفين مش احنا لوحدنا اتظلنا ولا الى بعدنا ولا الى قبلنا وقبلهم لا والف لا

المشكله فى حاكم يقدر يمشى وسط الناس تقدر تقولى مين هو ؟
بس التانى ربنا يخده ؟

ادعى

اسف بس بعين واحده ؟

اسف للتاخير لكنها ظرف

ادعولى بالشفاء كنت بعمل عمليه بسيطه فى العين بس بقيت بعين واحده من بعد ما كانو اتنين ؟

بجد اسف تانى لكنها ظرف

البوست القادم مفاجاءه يوم السبت ؟

كيمـــــــــــــــو

العمده والشيخ فى حوار مشروخ ؟

هى الدنيا كده يا باشا

قاعد على دكه لابس عمه وجلابيه وشال وشنبه شنب بارم ديله يقف عليه الصقر يرفع لى الشيشه ويشــــــــــــــــــــــــــــــد نفس معسل سلوم نوع مصرى اصيل يجيله ابنه بيجرى ويقوله

يابا يابا العيال فى البلد جالولى انى هكون عمده بعدك ؟

هو انت هتموت امتى يابا ؟

العمده ؟

اجرى ياواد العب بعيد ال عمده ال وانا هنا بعمل ايه يا شيخنا قوله

رص حجر بسرعه ياواد وخلى الفحم حامى !!!!

عمال يشد ويشد والدخان حواليه مخليه مش شايف من كتره

الشيخ ؟

بقولك ياعمده انا سمعت ان فى قريه حدانا قريبه كده اسمها اميركوش عمله انتخابات للمره المليون وكانت حلوه كده واختاره عمده جديد

العمده : ايهى !

الشيخ: ياعمده ده ده الخامس من يوم ما انت بقيت عمده علينا ربنا يزيدك ؟

العمده : عارف يا شيخ هما الناس الى فى امريكوش دى مش حاسين بالنعمه الى انتوا فيها عشان كده بيغيروا حكام كتير لكنى عادل

الشيخ فى سره : يا اخى توكا

العمده : فى حاجه يا شيخ

الشيخ : لا يا عمده كنت بقولك الواد واد اختى

العمده : ماله

الشيخ : عايز يفتح غرزه ومعهوش ترخيص

العمده : خليه يفتحها ونباركله

يشــــــــــــــــــــــــــــــــــــــــــــــد ويشــــــــــــــــــــــــــد واحنا دخان ؟

دخان للبيع

تلك القاهره .

اتاخرت اه انساكم لا والف لا لما بعدت عن البلوج لمده اسبوعين بس حسيت احساس غريب وهو انى مفتقد العائله جدا بجد بجد اسف اسف ـــــــــــــــــــــــــــــــــــــــــــ وارجو تقبل اسفى

نبتدى منين الحكايه مش عارف ارغب فى شىء جديد لكن اين

دخل الشتاء واخيرا تذوقت طعم المطر

اركب المترو وهى المواصله المفضله لدى انظر الى جميع الوجوه بجانبى ارى طعم الانسانيه المصريه بحق

فترى من هو متحاذق ويكره رائحه العرق ومن هو منهك من عمل شاق طول اليوم وشاب فى اذنيه هيدفون

وهناك ايضا شباب وبنات فى وقت خروجهم من الجامعه متوجهين الى منازلهم لكنهم لايرغبون الذهاب الى المنزل

يريدون تكمله اليوم مع بعضهم فما افضل من الصداقه وترى بدله وفى يدها شنطه

هاند باج واليد الاخرى موبايل احدث موديل وفى الجانب الاخر ترى جلباب يحمل شوال به الكثير من العرق

تلك القاهره من رائحه عرق الى افضل انواع البرفان لكنها ثقافه بلد او عاصمه فيها كل شىء تريد ان تراه

بامانه انا من عشاق القاهره فى وقت ليس بليل او بالنهار كما يقولون لكن تنويه ارغب ان نعامل الجلباب مثل البدله

فكلها كسوه ليس اكثر

المطر ينزلق على زجاج باب المترو وانا الهو باصبعى عليه وارغب فى النظر الى السماء داعيا الله بكل ما فى قلبى .

تلك القاهره

محمد كمال

ازاى وامتى وليه

ازاى وليه وامتى

ما هى معنى كلمه حكومه ؟

حكومه يعنى عربيه واعو اعو وااااااااااااااااااااااااااااا وكده ولا ظابط لابس ابيض فى ابيض وعلى كتفه نجمه دهب وهلالاين والتحيه للهلال والنجمه ولا امين شرطه اسم الله ولا دبلوماسى على راى المرحومه سعاد حسنى ولا عسكور زى عساكر الشطرنج ولا ولا ولا هما واحنا مين هما الامراء والسلاطين واحنا الناس بالطول والعرض هما بياكلوا حمام وفراخ واحنا الفول دوخنا وداخ ولا ايه هل الحكومه ملك ووزير او ( زير ) وبعده الخخخخخخخخخخخخخخخخخ هنتعب فى حاجه اسمها تراب الميرى سمعت عنها بتقول ايه الميرى ميرى برضه حتى ولو ساعى فى مكتب ياخى توكااااااااااااااااااااااااااااااااااااااااااا و 100 توكا على ده زمن ودى حكومه وده ميرى الى بيخلى الى معاه فلوس معاه سلطه سمعت فى مره من المرات لو هتحب تدخل شرطه عشان تبقى ظبوط تتدفع من 50 باكوا لبان وانت طالع ولا اقولكم الافضل لو ممعكش فلوس معهد امناء الشرطه لو هتقدم ادفع 5 بواكى وهتدخل على طول ولو هيتوصا عليك جوه يبقى 3 بواكى والشعب يطرقع واللبان على قفا الباشا والبيه وانا بصراحه من الجوع الاندر وير بتاعى بان من كتر لزق اللبان عليه من فتره كنت كاتب فى مجله عشرينات اكيد عرفينه مجله عشرينات كنت شغال هناك صحفى بس كنت منحرف شويه كتب موضوع عن امناء الشرطه اتكلمت مع ناس قدمت وفشلت والحقيقه مش اتكتبت عارفين ليه عشان تدفع تدخل وهى دى الحقيقه

يا خىــــــــــــــــــــــــــــــــــــــــ توكــــــــــــــــــــــــــا توك توك توك ــــــــــــــــــــــــــــــــــــــــــا

كان نفسى اكتب فضفضت اسف

ال ايه ؟ wanted

اول مره احس انى فعلا بتخانق او فى موضوع خانقنى مش عارف ليه نا بكتب البوست ده بعد المشكله ما حصلت بحوالى ساعتين يعنى نتكلم بقى فى المهم زمان كان نفسى ابقى مناضل او اضرب اى حد تبع الشرطه ولا اله الا الله ربنا حققلى امنيتى بجد بلاش نحرق لموضوع وهحكى الحدوته توته توته ؟
كنت ماشى فى الشارع زى اى مواطن عادى ودخلت القهوه سلمت على واحد صحبى واتكلمنا شويه وسبته وقومت عشان كان عندى مشوار لازم اعمله ولسه خارج من القهوه طفلين معرفش طلعوا منين

كل طفل ماسك كيس زباله وشكلها زباله زباله بجد يعنى وهباااااااااااااااااااااااااااااااااااااااااا ارمى يلا الكيس وكان الكيس جاى عليا روحت انا اتحركت عشان ميلمسنيش

المهم الكيس مجاش نحيتى نهائى بس راح زى مالعيلين عايزين تمام فى وش الشخص الى بيسوق العربيه الفخمه الى كانت ماشيه جنبى وانا عادى جدا كملت طريقى ولقيت العربيه ركنت ونزلت شخص ولقيته بيشتمنى ومعاه اتنين جاين معاه ولقيته هيضربنى كمان طبعا انا عملت فيها عنتر واظهرت شجاعتى وروحت مسبق انا بالضرب والى سبق اكل النبق المهم واحد اسمه حسام سواق تاكسى سمع الصوت راح يبص لقانى انا وهباااااااااااااااااااااااااااااااااااا مسك الراجل وهاتك يا ضرب بالاقلام وفى ثانيه لقيته بيقول انتم مش عارفين انا مين وصاحبه مسك التلفون وبيتكلم ولقيته بيقول انا عمى يبقى وائل طاحون ( مأمور قسم المطريه ) حسام سواق التاكسى قاله لفظ مش هينفع اقوله طبعا

حسام هرب بالتاكسى وبعدها بثوانى لقيت الامناء بتوع القسم واقفين جنبى وكانى قاتل قاتيل الراجل عمال يزعق ويقولى مش هسيبك وانا لسه زى مانا فرحان انى ضربت شخص تبغ الحكومه بجد المهم فهمت انه شغال فى نيابه المطريه وهباااااااااااااااااااااااااااااااااااااااااا انا عمال اضحك وحاسس انى خلاص هتمسك وهاخد علقه موت جوه القسم ولكن ممكن اعمل فيها روبن هود واحرر المساجين من عذاب السجن المهم نكمل الراجل ده ولا عجبه يمين ولا شمال وعمال يزعق فى امين شرطه بيقعد على القهوه اسمه رومانى والله فيه الخير معجبوش الكلام راح هو كمان زعق معاه وبقينا بدل اتنين حوالى 5 مطلوبين القبض عليهم وحاسس انى بكره هيتكتبلى ورقه تتعلق فى ارجء المطريه مكتوب عليها wanted لكن نكمل لقيت صاحبه بيقولى امشى والامناء بتوع القسم قالولى كده برضه امشى روحت مروح وكما لم يحصل شىء ولكنى مطلوب القبض عليه ؟

وعجبى على الضحك بجد اخيرا ضربت حد من اتباعك ياريس

اول ضحكه ليا كده النتيجه بقت كام

99 /1 ليك بس انا قريب موت

لو تقبض عليا النهارده بجد يبقى نهار امه اسود عشان حبايبى البلوجريه هيفضحوا امه طبعاااااااا ؟

نهاركم سعيد

روبن هود

الموضوع ده حصل فى شارع البلسم المطريه الساعه 7 ونص

امام قهوه العوامه

وطنى اتريد ان ابكى """

حينما اعشق الوطن حالما بوطنى حالما بوطن ابى كما كان يحكى عنه يحكة كم كان رغيف لعيش متوافر يحكى كم كانت الحياه سهله

يحكى ويحكى

يجعلنى افتخر انى من تلك الارض لكن هى من الممكن ان احلم انى قد اكون مصرى حقيقى ليس مصرى بالورق ليس مصرى وانا لا امتلك شبر منها وهل لانها اصبحت بلد الاغراب

غير معقول ان نقول ان الرئاسه اصبحت لشخص غريب لكن فى عصر الاتراك كانت الحياه جميله فكان اجدادى ياكلون ويلهون ويفعلون ما يحلو لهم وايضا يناضلون من اجل حقهم فى ارضهم لكن الان ارى وبعينى الصغيره الضيقه ان عصر الاحتلال الخارجى كان افضل مليون مره من عصر الاحتلال الداخلى

وطنى هل ابكى عليك ام انتظر الفرج

وطنى هل تريحنى وتقول لى ابقى فهى ارضك احمها

ام ستقول لى امشى فهى اصبحت ملك لمن يملك فقط

وانا كما تعلم كما خلقنى الله لم يعد لدى ملابس

اسف للكلام لكنك اصبحت وطن من يملك كل شىء

من يملك المال فى ذالك الوطن يملك السلطه وانظروا الى الاخ الكريم احمد عز

اسف اسف لكنى اريد انى احيا على وطن كما قال لى والدى عنه

وطن يجمع من يملك ومن لا يملك ؟

وطنى ــــــــــــــــــــــــــــــــــــــــــــــــــــــــــــــــــــــــــــــ عجبى "

ابن الوطن محمد كمال

للاسف انا مش محبط ولا مكتئب لكن عايز حقى