الثلاثاء، ١ مارس ٢٠١١

من 25 يناير حتى 11 فبراير جزء ثالث


بما انى لسه جاى من بيت العز يا بيتنا " اقصد بيت امن الدولة " المهم كنت منهك جدا قلة نوم وقلة اكل وقلة شرب مياه وخلافه جالنا على تليفون البيت تليفون ونرد كالاتى " تحذير من مكتب رئاسه الجمهورية اللى هينزل بكرة من البيت هيكون تحت طائلة القانون " على اساس ان الشارع كان بيت اهله مثلا المهم بعد مكالمات التليفون والناس اللى اطمنت عليهم نمت نوم السنين من التعب لكن اتفاجىء بشكل فظيع بريحة المسيل للدموع جوه الشقة " كانى بحلم " اطلع ابص من الشباك الاقى الجو كله دخان ونزلت طبيعى كاى بنى ادم ولقيت صحابى تحت فى الشارع ويلا بينا على الميدان فى المطرية قولتلهم يلا لقيت عربيات امن مركزى بتتحرق ولقيت حد ساتيق عربية منهم وبيلعب بيها وبسمع ان القسم اتحرق الساعه كانت 5 المغرب قولنا نجرى نشوف القسم لقينا القسم بيتحرق فعلا بس الغريب ان كل الشرطة اللى كانت موجوده استخبت " غالبا فى الجوامع " ماعادا ظابط رخم فضل يضرب الناس بالرصاص الحى من مأذنة الجامع اللى جنب القسم لحد ما الذخيرة بتاعت مامته " امه " خلصت نزل قالع هدومة ورافعه ايده كانه حرامى الناس كانت مش مصدقه وكل واحد ليه حق عند الحكومة اخده بشكل فظيع خاصة ان القسم عندنا كانت ريحته فايحة المهم وانا واقف ابتدى القسم يتقلب اللى خرج ومعاه سلاح واللى خرج ومعاه باب وواحد خرج ومعاه قاعده حمام وواحد كان واخد مكتب البيه المأمور وخلصت حريقه القسم وهروب الشرطة والاقى الناس احتلت محزن السجاير بشكل فظيع المحزن كان فيه سجاير تكفينى انا شخصيا لاخر عمرى المحزن بقى فاضى .................... خالى من اى نيكوتين وده كان اليوم الموعود اللى روحت فيه وكملت نوم لانى لسه مرهق خاصة انى قعدت اهتف وقعدت اجرى شمال وشمال .
ده كان الجزء المهمش بالنسبة ليا .

هناك ٧ تعليقات:

أسمعنى شكراًً يقول...

هيييييييييييييه أنا أول واحد

أسمعنى شكراًً يقول...

يا أبنى ماتبقاش أومليت

وأرفع باقى إللى حصل بقى

أنت هاتقعد تنقط زى الحنفية

دعاء العطار يقول...

بحقد علييييييك

(:

شمس النهار يقول...

اللي حصل في الاقسام ده كان شئ غريب ورهيب
وبيعكس مدي كره الناس للأقسام

صوت من مصر يقول...

أسمعنى شكراًً
انجزتلك ياض خلاص

صوت من مصر يقول...

دعاء العطار
هههههههههههه

صوت من مصر يقول...

شمس النهار
وبرضه ميمنعش انها كانت حركة معروفه والله اتصلى بيا معيش رقمك نهائى
ووحشنى جدا كوستا
هههههههههههه
ماشى ليا كده واحد قهوة عندكم