الاثنين، 21 سبتمبر 2009

اصبحنا فى مدافن


اصبحت الاوان لا تختلف واصبح المساء مثل الصباح وغناء العصفور مثل بكاء طفل جائع اصبح الاشياء واحده شبيه لغيرها فليس هنك اى فرق بين غناء فيروز وطرب بعرور فى ظل زحام عربات ايقاعات سريعه واخرى بطيئه هل اصبحت الحياه بلا اختلاف ايمكن للبنى ادم الاستمتاع فى ظل ظروف قهريه تمنعه من الاستمتاع بحياته ويومه ام الانسان اصبح يعشق الملل والغباء ضاق الزمن فعلا بنا لكننا تناسينا شىء هام وهو اليوم وكل من ينظر ينظر الى شىء واحد وكلمه واحده ( ياعم انا عندى عيال عاوز اربيهم ) كلمه بسمعها اكتر من مليون مره اصبح المصرى مخترع الثوره لا يثور بل يدفن راسه فى التراب كالنعام اصبحوا يبحثون عن كيفيه سماع اهات جديده ليس اهات غناء فيروز او انغام بل اهات العذاب اليومى والى بيهرب من عذاب يلاقى عذاب تانى مكتوب من مدارس لعيد لرمضان لمصاريف ملهاش حل والتل فاضى وخلص من زمان لكن السؤال يجمع الكل لماذا هل السبب قوه الحكومه ام عدم وجود بنى ادمين اصلا ولا لاننا مات صوتنا واصبحنا فى تعداد الاموات فلاموات لهم الحق ايضا فى عيش الحياه الاخرى بحلوها ومرها لكن هل الاحياء مكتوب عليهم الصمت للابد فسيكون عنونا للحياه صامت بدلا من جاهد لماذا نست على حجومه نسيت اننا بشر واننا نحيا مثل ابناء الفلل والسهرات نعم نحن ناكل فول ونشرب ماء ملوث وفى بعض الاحيان لا نستطيع العشاء لكن لما نكون اموات وهم احياء لقد ضاق بى الحال الى من يعلم اجبنى ؟؟؟؟؟؟؟؟؟؟؟؟؟؟؟

هناك 46 تعليقًا:

mimi يقول...

ونقول صباح الخير

وبسم الله أول تعليق من شبرا وبنات شبرا

mimi يقول...

ده مش بوست ..... ده صرخة

لو عرفت اجابة سؤالك .. ابقي قوللي

romansy يقول...

حرام عليك

انا سايب ليك عيديه على المدونه
كل سنه وانت طيب

norahaty يقول...

مالك ياكيمو بس؟
ربنا يفرجها علينا
كلنـــــــــــــــا

الازهرى يقول...

ممممممممممم
مهما كانت صرخاتنا عاليه
فلن تصل إلا لو تحركنا تحركا ايجابيا فالتغيير يبدأ من الفرد وهو نحن

تحياتى دوما

aidy يقول...

كنت استنى شوية على الحزن يا محمد لبعد العيد :D

بس بجد الموضوع عجبنى هو مش حزن هو رصد لملاحظات فى الشارع وانت عرضتها برؤيتك انت عظيم

بس انا ليا ملحوظة بقي...

بقي بذمتك غناء فيروز مبقاش يفرق عن بعرور بالذمة مش حرام عليك إلا فيروز


وبعدين بعرور ده مش بيغنى ولا بيطرب ده بيسلك بوابير الجاز :D

نيجى للجد بقي

الحكاية ان الشعب المصري مش بيثور بسرعة

ده بجد و من زمان مش من دلوقتى

انا درست تاريخ مصر و مواقف الشعب
كل المواقف كانت فردية و لسنين طويلة
ولازم عشان يثور يحصل حاجة كبيرة اوووووووووووى تخليه يغير فكره

يحصل مجاعة بجد اكتر من اللى مؤشراتها موجودة

يحصل حادثة زى بتاعة دنشواى

يتقبض على شخص زى سعد باشا زغلول

الجيش يعمل انقلاب

الشعب المصرى مش بيثور بالساهل لأنه شعب بطبيعته مستكين وصابر و راضى وعشان يتحول من ده للنقيض لازم تحصل حاجة كبيرة


ده غير ان وراء كل ثورة وكل تغير أزمة إقتصادية و احنا الحمد لله بقى عندنا أزمة إقتصادية يعنى اطمن خالص :d

أينعم الازمة لسة موصلتش لمنتهاها بس هى بدأت

yoyo يقول...

عارف يا كيمو البوست دى ش مجرد تدوينةو خلاص
لا دا رصد لواقع احنا بالفعل عايشنه
الحال ضاق علينا اوى وكله بيقول زى ما انت قلت جايز يون خوف و اعتماد على الغير على اساس ياعم هو انا اللى هاغير الكون لما يبقى حد يعمل ابقى انا اعترض
ينى لو بصيت للعالم العربى بشكلعام مش هتلاقى فيه اى اتحاد كله فردية يالا نفسى كمثل الحال عندنا هنا اللى معاه خلاص مش بيفكر غير فى نفسه و يقولك وانا مالى طالما انا مش محتاج

لو حصل ثورة هتبقى اشبه بثورة للجياع لان الوضع الحالى بقى صعب و كل شوية بيكون اصعب

و الله حتى الاموات فى احة بال عن اللى احنا فيه
اى بت دلوقتى فى ازمة اقتصادية كبيرة اوى يعنى رمضان و عيد و كمان المدارس و طبا مرتبات الموظفين حدث ولا حرج
ربنا يتولانا و يرحمنا برحمته
لا يغير الله ما بقوم حتى يغيروا بانفسهم

هون على نفسك
تحياتى
يويو

7annen يقول...

اذا ضاق بك الحال فلا تلجا لغير الله

كل سنه وانت طيب

حنين

صفــــــاء يقول...

كل سنه وانت طيب

ووحدووووة

اسماء واحلام فى وجدانى يقول...

متاخرة اوى

اسف جدا

كل سنة وانت طيب يا عم الحاج

صوت من مصر يقول...

mimi
وانتى طيبه يا كل بنات شبرا

صوت من مصر يقول...

mimi
انا عارف الاجابه انى انا اسمى مصرى
والصرخه لازم تكون موجوده لانى مصرى

صوت من مصر يقول...

romansy
حرام على اساس ايه
وانت طيب يا ابوحميد
ووصلتنى العيديه

صوت من مصر يقول...

norahaty
مالى ان انا مصرى
كل سنه وانتى طيبه

صوت من مصر يقول...

الازهرى
طب قولى انت عملت ايه

صوت من مصر يقول...

aidy
هبتدى معاكى من الاخر
معنى كلامك ان من ايام زمان اننا كمصريين معندناش كرامه ولو وجدت توجد فى شخص من 70 مليون
لو عرفتى و مين قوليلى
بالنسبه اول شخص يقولى ان الموضوع مش حزن وفهم انى برصد ما يسمى بالشارع المصرى
بجد تعليق ممتع

صوت من مصر يقول...

yoyo
من يوم ما عرفت انى مصرى يوم 24/1/1986 وانا عارف اننا فى ازمه اقتصاديه ومن يومها جوعنا كتير واكتر واكثر
فين التغير
اظن ان الشارع بتاعنا نايم برضه
شكرا يويو

صوت من مصر يقول...

7annen
لجأت الى الله لكن شكل ربنا غضبان مننا كلنا كمصريين
وانتى بخير وسلام

صوت من مصر يقول...

صفــــــاء
لا اله الا الله
وانتى بخير وسلام

صوت من مصر يقول...

اسماء واحلام فى وجدانى
وانت طيب ومش متاخرها بس كفايه انى اسمعها منك ولو بعد سنه

Sweet Violet يقول...

لان السلبية بقت جوانا و بتجرى فى الدم و كلمة انا مالى هو انا اللى هغير الكون يعنى و زى ماانت قولت ياعم انا عندى عيال عايزة اربيهم هما السبب فى اللى احنا فيه
مع ان زمان بردو كان عندهم عيال عايزين يتربوا لكن كانوا بيتكلموا
v_v

ماما يقول...

صباح الفل
انا لم اقرا شيء
لانى رايحه الشغل دلوقتى
بس جيت اقولك كل سشنه وانت طيب لانك وحشتنى قوى
وعيد سعيد

ميمي وأحمد يقول...

اللي عيد ميلاده في شهر سبتمبر يقول :
أناااااااااااااااااا

أو يعرف حد مننا عيد ميلاده في سبتمبر


ويكتب يوم كام في شهر سبتمبر




هنا حفلة كبيرة جدااااااااااااااا

الازهرى يقول...

بسيطه جدا يا صاحبى
أنا بدأت بنفسى وأقنعت أصحابى وبعد ما كان مركز الشباب عندنا عامل زى مركز الشباب بتاع فيلم التجربه الدانماركيه
اتفقنا ونضفناهوكمان كل واحد فينا بدأ يدرب تخصصه والحمد لله خلال سنتين تقريبا احنا بدأنا التجربه فى يوليه 2007 تم اعادة قيد المكان فى الاتحادات المختلفه وحصل العديد من المراكز فى البطولات كما تم اخذ عدد من اللاعبين للانديه الكبرى
ووصل عدد اللاعبين فى الكاراتيه وحده الى ما يقرب من 150 لاعب

اما عن البلد نفسها حاليا تم زراعة المناطق خلف وبين عمارات المساكن الشعبيه الموجوده عندنا
تم تنظيم حملات تحت اسم الجواله لتنظيف وتشجير المنطقة والتوعيه البيئيه والطبيه والتعليميه
تم تحفيز الشباب المتعلمين على تنظيم دورات تعليميه لمحو الأميه ومساعدة المتعلمين الغيرقادرين على اخذ دروس خصوصيه
قام عدد ممن يجيدون المهن اليدويه بتعليم غيرهم وخاصة الأيتام غير القادرين وهم الأن يعملون فى بناء المدن الجديده
وغيرها من الأنشطه
ولا أدعى أن مدينتنا الأن المدينه المثاليه أو أن الموضوع لم يقابل بعقبات كالجبال ولكن بالمقارنه بما كنا عليه من أعوام فهناك تقدم كبير
وكل شىء يأتى بالتخطيط الجيد والصبر والتوكل على الله تعالى قبل كل شىء

تحياتى دوما

mahasen saber يقول...

ليه وجع القلب ده ..

الحكايه مش ناقصه بهارات حزن يا كيمو

حزينه يقول...

الحياه بقت صعبه اوى يا احمد
كفايه انك تبص فى وشوش الناس اللى ماشيه فى الشارع
حتلاقى الهم والغم
ترجع البيت
مش قادر حتى تتكلم
يارب فرج كرب كل مهموم

حزينه

engy يقول...

بجد عندك حق لكن الصراخ مش كفايه لازم الحركه
لان الحال حتى مش ثابت لكن بيتدهور للاسوأ مش عارفين هنوصل لايه بعد كده
والتغيير لازم يبدأ من الداخل وبعديكون مابينا فى اخلاقنا وتعاملاتنا وساعتها نقدر يكون فيه اصلاح

الشعب لابد له من حكومه تشكمه يقول...

مش عارفه.....
دى جابة سؤالك

dodoo يقول...

ازيك يامحمد

اولااااا وحشششششتنى البلوج

ثانيا اسلوبك المره دى عجبنى اوووووووووووى

ثالثاً بقى يامحمد ان سبب اللى احنا فيه ده هو كلمه واحده

الذللللللللللل

الذل يخلى الانسان يتخلى عن كرامته وعن كيانه وعن حقه ويقتل فيه الشجاعه والثوره

ويخليه بيفكر فى حاجه واحده بسس

اعيش واربى عيالى حتى لو كانت العيشه دى الموت افضل منها مية مره

الذل قتل جوا الناس كللللل حاجه حلوه

مش هقدر اقول غير كده

شمس النهار يقول...

كيموووووووووو
ازيك

علي فكره افتكرتك هناك لازم ولا بد تلم شلة شباب المدونين

وتعملوا رحله لدهب

وصدقني مش هتتكلف كتير

هبقي اقول لك علي التفاصيل

كل سنه وانت طيب

mero-moory يقول...

السلام عليكم و رحمة الله وبركاته

كل سنه وانت طيب يا محمد

وموضوعك صرخة واقع عايشينه يمكن كتير بيصرخها جواه في صمت خوفا على اللي بيعولهم زي ماقلت عندي عيال عايز اربيهم

لكن هقولك حاجه واحده مقتنعه بيها الظلم مهما طال له يوم والمظلوم مهما طالت مسافة استرداد حقه له يوم معلوم بيرجع فيه بالساعه والثانية
الرسول عليه افضل الصلاة والسلام لما كان بيطارد من الكفار وبيتحارب منهم سواء في ضهره او في وشه وهو نبي رسول هل ربنا سبحانه وتعالى موش كان قادر يهلكهم كلهم ؟ هل الرسول نفسه استسلم هو نبي ورسولنا بس بشر بيه نقتدي ومن حياته وسيرته نتعلم
دايما لما بشوف الضلمة تكتر والظلم ياخد اكبر مساحه والجميع شايفه بحس ان النور جاي وقريب .. إن فرج ربك لقريب
وهو قادر على كل شيء
لو في انسان نام من غير عشاء او طفل نام جعان ربك قادر يرزقه ان مكانش النهارده يبقى بكره خلينا نقول يارب

الدوده في بطن الارض ربك بيرزقها وهو قادر يرزق عبيده .. رحمتك يارب

واتمنى تكون بخير ودايما صرخاتك تملى الدنيا احتجاجا على الظلم وحبا لاسترجاع الحق

سوري طولت عليك
في رعاية الله

العصفورة يقول...

السلام عليكم
كل عام وحضرتك بخير
وجهد مشكوووور
خالص تقديرى

صوت من مصر يقول...

Sweet Violet
حيث كده لا اجد اختلاف للراى

صوت من مصر يقول...

ماما
وانتى بخير وسلام

صوت من مصر يقول...

ميمي وأحمد
طب خلوه يناير

صوت من مصر يقول...

الازهرى
عارف لو فى مزه دنماركيه خدنى معاك على فكره فكرتكم حلوه جدا جدا لكن فى يوم وهتتعب من غير فلوس
انا مش يكدب

صوت من مصر يقول...

mahasen saber
لازم نحزن لاننا بشر

صوت من مصر يقول...

حزينه
يا حزينه كلنا بقينا من حالك

صوت من مصر يقول...

engy
عارفه العيب مش فينا زى ما متخيلين
العكس صح
فيهم هما

صوت من مصر يقول...

الشعب لابد له من حكومه تشكمه
منوره يا شيمو والله

صوت من مصر يقول...

dodoo
عارفه انا عارف انك مثلى بجد كل حاجه
الحكومه بنكرهها صح

صوت من مصر يقول...

شمس النهار
طيب موافق هلم من كل واحد 15 الف جنيه موافقين
ههههههههههههههه
كده تمام اظن
حمدلله بالسلامه

صوت من مصر يقول...

mero-moory
اولا احنا مظلومين منذ يوم الميلاد عمرنا شفنا هنا ولا سعاده
دايما اغانينا حزينه
نورتى

صوت من مصر يقول...

العصفورة
لا تعليق اصلا

dina يقول...

الصمت و السكوت عالغلط و الخوف بيعلم الذل و الاستسلام و المشى جوا الحيط و بيقتل الطموح فتبقى النتيجة عاوز اربى عيالى و خلاص....و للأسف التربية اللى بالشكل دل عمرها ما يتنجح
عارف عسيلى لما قالك(عايشين كأن الحال عاجبهم طول ما فى حاجة مالية جيبهم...يا ترى دا اللى جايبنا لورا؟؟)

صوت من مصر يقول...

dina
دينا عاوز اقولك ان اغنيه طراطير دى اغنيه سياسه بمنتهى المعنى
بس كلامك صح التربيه كلها غلط فى غلط