الخميس، ٢٦ مارس ٢٠٠٩

بلا هويه


الوم نفسى نعم فانا حزين بقدر معرفتى بالناس فعندما انظر الى الوجوه دائما فى الصباح داخل المترو المذدحم دائما ارى وجوه قعد اعلنت الانكسار وراء ما يدعى الاسره والفقر ولقمه العيش اهل هذا من الغباء ام انه ذكاء ناتج عن ظروف مجتمع مقهور تجاه حاكم لا يعرف معنى كلمه فقراء مطحنون فقد الغى الطبقى الوسطى التى كنا بها نحن وهى كانت تدعم جميع الموظفين العاديين مثل والدى ووالدك وهل ابى كان يعلم مدى انى صأصبح تجاه الحكومه المصريه بلا هويه بلا مأوى بلا حريه هل كان يعلم ان الحكومه ستكون حكومه اغنياء فقط اذكر مثال الى تلك الجمله وزير الداخليه الشهير حبيب العدلى دائما يقول الوزاره تبتدى من عند ملازم اول فيما فوق اى ان امناء الشرطه والمندوبين ليس من لهم اهميه تجاههو هل نحن المصريين الفقراء اصبحنا لا شىء بالنسبه للحكومه ام سنصبح صداع دائما فى راس الحكومه . لست من احلم بالمال لست من احلم بالجاه لكنى احلم ببلد وطن الفقير مثل الغنى ارى بدلا من ان الحكومه تدفع نصف اموالها فى حمالات ماما سوزان على القنوات الفضائيه ان ترعى شئون من ليس لهم هويه مثلهم مثل القراه للجميع يا ماما ( اسف يا طنط لانى مليش غير ام واحده هى مصر ) اصبحت انا وانتم بلا هويه سؤال اود ان اساله للجميع ؟ هل يظن الناس انى مجنون نظرا لكتاباتى تجاه الحكومه ؟ يقول لى البعض نهايتك قربت ارجو ذالك لعل وعسى الحكومه المصونه تقرا ما ادون

هناك ٧٢ تعليقًا:

حاسوباتيه يقول...

لا مش شايفه انك مجنون بالعكس انت بتكلم بلسان كتير جدا من الشعب ده فعلا حكومه اعوز بالله نفسي يموت بقى زهقت واتخنقت منه

صوت من مصر يقول...

حاسوباتيه
شكرا للثقه دى كلها
بس فعلا انا كمان زهقت ومليت ونفسى احس انى اتغيرت

fnoonh يقول...

لا ابدا ابدا ابدا مش جنون لو انت مجنون يبقى مافيش حد عاقل بس ربنا يحميك من شر البتتكلم عنهم
حقيقي الاحوال بقت صعبة جدا ربنا يعين الجميع
بحس ان مصر مافيهاش وسط اما فقير او غني والاغنياء بس هما البيحترومو هناك اما الفقير بيتداس علية ب--------
بلاش اقول
بس على فكرة ماتفتكرش انه الفقير بيتظلم وهيعيش مظلوم ويموت مظلومزي الناس مابتقول
لا هوه ايوة هيعيش مظلوم بس الحمدلله في حساب في الاخرة في عدل في فصل بين الظالم والمظلوم في رب كريم لايظلم احد
وكله هيحاسب على العمله وهياخد جزاؤة
بس الشاطر فينا اليخلي حياته لربنا لانه مهما قعد ماهيخلدش فيها
ويحاول يعمل فيها لليريحه لابد الابدين في الجنة
يارب اجعلنا منهم

تحياتي وتقديري

حزينه يقول...

تعرف انى كنت حكتب بوست عن كدة وبس
عن الحزن اللى فى عيون البشر
مش معظمهم
لا كلهم
بحس ان مش فى حد فرحان يا احمد
بجد ماساه

حزينه

Foxology يقول...

كلامك مظبوط .. فى فجوة كبيرة اوى بين الحكومة وبين الشعب العادى

الفجوة بتزيد يوم عن يوم وبقت مشكلة حقيقية

بلدنا حلوة بجد والله بس احنا اللى مش مبسوطين ومش عارفين نبسط نفسنا

تحياتى :)

وردشان smilyrose يقول...

اخى الغالى

اجنون ان نصرخ ان ينطق لسانا صادقا


اين نحن لما نحس بالضياع ونحن نحيا على


ارضنا لما تضيع حقوقنا بدون سبب


الا نصرخ باعلى صوت لما يكبر كلا منا

قبل اوانه من كثرة الهموم وكثر الاحمال


لما نتحمل اخطاء حكام لا يعرفون الرحمة


ان كانت نهايتك قربت كما يقولون


فتلك نهايتنا جميعا اخى


دمت بكل الود

smilyrose

وردشان


روح الحب الصادق

Unknown يقول...

معاك حق في كل الكلام اللي قلته
الحكومة محدودي الدخل احنا مش في دماغهم أصلا
ده لو كان عندهم دماغ أصلا
أدعوك لزيارة مدونتي
ويبقى التواصل

Tamer Nabil Moussa يقول...

السلام عليكم

كلامك صحيح

تعرف رغم حال الناس والضنك زى ما بنقول الا البلد فيها فلوس تعيش ناس مرتاحين بس مسروقة

ربنا يصلح الحال

تحياتى

صوت من مصر يقول...

fnoonh
اولا شكرا جدا لزيارتك الى بتمنى انها تتكرر دوما
ثانيا نعم نحن من نصنع حياتنا تجاه الله لكن هل الوطن لا يستحق مننا انه نفدى به حياتنا حتى لو لحظه لماه دائما نرتكب الصمت تجاه الوالى والحاكم ام اننا سنقول المقوله الشهيره
واطيعوا الله ورسوله واولى الامر منكم ؟
صعب جدا
تسلمى

صوت من مصر يقول...

حزينه
المأساه بجد انى اسمى محمد مش احمد
والاخص فى كلامك انك حزينه يعنى بتدلى على شعور 80 مليون بنى ادم
تسلمى

صوت من مصر يقول...

Foxology
فوكس
الفجوه احنا الى سبناها توسع وتزيد مع مرور الزمن ليه دايما ساكتين مش عارف
تسلم

صوت من مصر يقول...

smilyrose
وردشان
للاسف كلامك جميل جدا بس مش كل الناس زيك
الناس فاكرانى واحد لاسع نتيجه حبه لبلده ووطنه
ارجو منك الدعاء لكل مواطن تحت ارض المحروسه حتى يصبح لديه وعى بثقافه الحكومه
نعم انهم حكماء اصماء
تسلمى

صوت من مصر يقول...

معتز شاهين - باحث تربوي
اعذرنى ليهم دماغ بس مش لينا ولو لينا هتبقى كيفيه الاباده فى ظل مئويه قادمه ؟
والله الناس فاكره نفسها خالده على وجه الارض
دومت صديقا وادوم انا زائرا
تسلم

صوت من مصر يقول...

Tamer Nabil
ايوه يا تامر مسروقه
بس لو ركبت المترو ومسكت حرامى بيسرقك هتعمل ايه ؟
تسلم

kmt يقول...

السلام عليكم ورحمة الله وبركاته

عارف
لو حتى مجنون
فجنانك دا عين العقل

بص يا كيمو
هي الصفحة سودا سودا
هانحاول بيضها بس تقريبا الصنيعي المسئول عن ده في اجازه

ربنا يستر

تحياتي
الى اللقاء

مدحت محمد يقول...

لا متخفش على نفسك الاعمار بيد الله

aidy يقول...

فعلا الكلام ده مش جنان

بالعكش فى ناس كتير بتتكلم كده

بصرف النظر عن وجهات النظر سواء كانت متشابهة او لأ بينا

بس انا شايفة ان كلماتك هى حرية شخصية ليك وحدك طالما مش بتضر حد بيها ...

ومش معنى انك ضد نظام معين او ضد بعض السلوكيات فى النظام ده انك تكون مجنون .. لأن المجنون ملوش وجهة نظر عشان يعبر عنها

وطالما انك مقتنع برأيك مش تهتم كتير للى بيقولوا كده لأن اغلبهم بيكون بيهزر بس .......

تحياتى

محاولة لكسر الصمت يقول...

أولا..
إجابة على سؤالك (لو كل واحد في البلد دي بقى مجنون عشان ضد الحكومة, يبقى البلد كلها هتدخل السرايا الصفرا)
ثانيا..
عن الفقر والغنى.. ربما تكون على صواب, لكن (وبعدين).. أرى أن الاستسلام قد أصابنا وتمكن منا فأصبحنا نخشى الاعتراض, ومع ذلك أعتقد أن حكوماتنا العزيزة بما تفعله هي تجني على نفسها فلقمة العيش هي آخر ما تبقى للكثيرين في هذا البلد وحين يفقدونها سوف يثورون ثورة من لا يملك ما قد يخسره..كما قال درويش (أنا لا أكره الناس ولا أسطو على أحد, ولكني إذا ما جعت آكل لحم مغتصبي)..
وأخيرا..
كان لي سؤال أرجو ألا تعتبره تطفلا, وضعت في مقدمة المدونة صورة مناضلين عظيمين, فلماذا وضعت صورتك (وأنت تدخن) بجوارهما,,لماذا لم تكن صورتك وأنت تقوم بأي فعل آخر؟!!..
ومرة أخرى عذرا على التطفل..

صوت من مصر يقول...

kemet
بصى هقولك ايه بس عارف انى هكلم واحده دماغها زى دماغى بايعه القضيه ومش فارقه بس عين العقل ده لينا بس لغيرنا يبقى ايه
للاسف كلنا بقينا صنيعيه
شكرا
شكرا

صوت من مصر يقول...

مدحت محمد
مدحت الحنازه من عمر مكرم اوك
ياعم عارف طبعا بس مش هسيب حقى وحق بلدى
تسلم

صوت من مصر يقول...

aidy
ده راي انا فعلا بس هل هو صح
هل هو غلط
انا مؤمن بيه
ومؤمن انه صح ومش هغيره
للاسف الحياه اصبح بها مليون لا مباله
تسلمى

صوت من مصر يقول...

محاولة لكسر الصمت
مش هرد على تعليقك لكن هجاوب على سؤالك
اولا انا لا شىء بين جمال وجيفاره ثانيا هما مناضلين وانا حقير
ثالثا تيمنا بيهم يمكن اطلع زيهم بالصدفه صدفه تخلينى بطل او رمز لكن ساعتها هكون على حق يعنى مش بطل على ورق السيجاره مزعلاكى ومزعله ناس كتير
بس دى حريه ؟
ليس لدى كلام اكثر

gannah يقول...

اللى بيقول عليك مجنون ياريت يقلنا العقل يعنى ايه؟؟
يعنى الاستسلام للظلم والسكوت عليه
يعنى كل واحد يخليه فى نفسه ويقول وانا مالى ..ماليش دعوة
يعنى الغنى يزداد غنى والفقير يزداد فقر دون ان يجد من يدافع عنه
يعنى كمان نخرس ونسكت ونغمض عنينا
هو ده العقل
لو كده يبقى انت مجنون وانا مجنونة وكل قرائك- مع الاعتذار ليهم- مجانين
ومرحبا بالجنون
اكتب ولا يهمك
تحياتى

محاولة لكسر الصمت يقول...

أولا اشكرك على ردك واسمح لي أن أرد ايضا..
يقولون في علم النفس أن الذي نردده بألسنتنا هو ما نكون عليه حقا, تقول أنك بجانب جما وجيفارا لا شيئ, لماذا؟ ما أدراك ماذا كان حال الاثنين وهما في مثل عمرك, وما أدراك أنك قد لا تكون مثلهما أو أفضل في يوم من الأيام, أما عن الصدفة, فصدقني الأبطال الحقيقيين لا يأتون صدفة, فإن أصبحت في يوم من اليام كهؤلاء لن يكون السبب سوى أن داخلك شيئ عظيم لا علاقة له بالصدفة..
أما عن الحرية الشخصية فأعتقد أن أكثر ما يخصنا هو حياتنا, هل أن يتخلص المرء من حياته هو حرية شخصية, لا اقصد ضرر السجائر الصحي, لكنني أتحدث عن قواعد عامة تحكم أخص خصوصياتنا, قلت قبلا أنك تعرف أن التدخين خطأ ولكنك لم تستطع التوقف, لا أرى الأمر غريبا فكثيرون مثلك, لكن أعتقد أن بإمكانك الاختيار في أن تضع الصورة أم لا...
عذرا على التطفل مرة أخرى لكنني أحببت أن أقول شيئين أخيرين,
أولا..يكفي أن تحب وطنك وتحاول من أجله كي تكون عظيما, العظمة لا تعني أن يعرفك الجميع, بل أن تفعل ما يستحق الاحترام ولو لم يعلمه غيرك..
وثانيا..كي تكون عظيما, عليك أن تتعلم أن تقول لا لأكثر الشياء أهمية بالنسبة لك إن رأيت فيها خطأ...
..وأخيرا تحياتي لمن أتمنى أن يكون يوما عظيما.......

kmt يقول...

السلام عليكم ورحمة الله وبركاته

كيمو
دواير
الحوار اكتر من رائع
بجد
بجد

تحياتي الى اللقاء

ريمان يقول...

انت مش مجنون ولا حاجه

انت مجرد واحد انسان عندك ضمير وعندك جرأه انك تتكلم وتقول الحق وتنقد الغلط



سيبك من كلام الناس الخايب ده

هو ده اللى جايبنا لورا

شمس النهار يقول...

ياسيدي ماحدش عارف نهايته امتي
خاليها علي الله
ممكن حد يفهمني المدونه اللي انا بقيت فرد من اعضائها ايه اللي انا ممكن اعمله بالظبط
يعني ممكن اضع صور انا مصوراها مثلا
حد يفهمني

M.a.r.y.o.o.o.m يقول...

بص انا من كتر ما بفكر في الموضوع ده
والله كرهت اكتبه وكرهت افكر فيه اصلا معاك في كل كلامك بس خلاص مش هنغير حاجه

ahmed_k يقول...

عزيزي صوت من مصر
أنا مش شايفك مجنون بالعكس
أنا شايفك عاقل
لأني اعتقد أنك بتنتقد بعض تصرفات الحكومه من منطلق حبك لبلدك
فكلنا نفسنا مصر تكون أجمل وأحسن بلد في الدنيا
فالشرط ان يكون النقد بهدف التجميل ومن دافع الحب
أما الذين ينتقدون لمجرد النقد فهم المجانين
يعني حسألك سؤال لو حكومتنا النضيفه الطويله السكره
لو لو لو عملت حاجه كويسه حتنتقدها
لأ ببالعكس يعني لو ربنا أراد وحصل حنكون أول المصفقين لهم ودعما لهم
لأن مصلحة الوطن فوق أي أعتبار
مش كدا ولا أييييييييييييه

صوت من مصر يقول...

gannah
يا دكتوره احلف بايه ان الناس دى ممكن تعمل اى حاجه ممكن تمشى بمخدرات عادى لكن انها تتكلم عن الحكومه يقولك لا ده كده جنون ؟؟؟؟؟
شكرا ليكى لانك بتقرليى ده شرف كبير بس لو ده معناه انى مجنون
افضل الجنون افضل من الحياه العاقله بالموت

صوت من مصر يقول...

محاولة لكسر الصمت
كلامك فعلا حقيقى وبتحرجينى بالكلام لكن انا لو فعلت سافعل لبلدى ولس حتى يقولون هو من فعل انا لاشىء فعلا لكن انتظر اليوم الذى سابقى فيه شيائا يحترم كانسان ناضل من اجل وطنه
شكرا ليكى انك بتتمنى
وخلى بالك بقى جمال وجيفاره كان بيدخنوا
ومن الاخر حسنى مبارك مش بيدخن وعشان كده افضل انى اكون مدخن ولا ايه
تحياتى

صوت من مصر يقول...

kemet
مش هقولك ان اول بلوج علقت فيه منذ دخولى عالم التدوين كام بلوج دواير

صوت من مصر يقول...

ريمان
لو كلام الناس جايبنا لورا يبقى مش لازم نسمع
بس ممكن نسمعهم على الاقل نفهم الغلط من الصح
شكرا يا ريمان

صوت من مصر يقول...

شمس النهار
هى على الله والله والحمد لله انى لسه موجود بينكم
بالنسبه للبلوج البلوج بيوضوح الصور الى احنا مصورينها بنتكلم بيها عن الواقع المصرى
ياريت الى عايز يضيف معانا يقول ؟

صوت من مصر يقول...

فتاة ضائعة في زمن الأوهام والأحلام
لو اقولك انى ده واجب علينا كلنا يبقى مش من حقنا نزهق
شكرا جدا

صوت من مصر يقول...

ahmed_k
لو الحكومه عملت حاجه واحده كويسه والله هكتب فيهم شعر مع انى مبعرفش اكتبه
تحياتى ليك يا احمد

Unknown يقول...

مجنون.؟
والله قمة العقل هو الجنون فى بلدنا
يابنى بلدنا اصبحت المقاييس بها مقلوبة
لكنك لست بمجنون


لى نصيحة لك
لو تحب تسمعها يعنى
ممكن تدخل لى على الميل من المدونة

طبعا دا لو انت حبيت
ووالله مش قصدى انى اغلس ابدا
تحياتى واحترامى

رؤية يقول...

ان كان كل من يكتب عن الحكومة سينتهى
فيوما سنستيقظ لنجد وطن بلا شعب...!

عزيزى لست مجنون...
ولست بالعاقل....

فقد حدثت المعجزة
وصرنا وسط بين الاثنين

فلو كنا عاقلين متنا من الكمد
وان كنا مجانين تجاهلنا الالم

تحياتى لك

mahasen saber يقول...

صوت يا صوت انتا مش غلط ولاا مجنون انتا بتعبر عن رأيك وما اختزن بداخلك نتيجة تجارب عشتها ومراحل مريت بيها من دراسه وغيره وغيره وحاليا المفروض تلاقى ااقل القليل فرصة عمل تصونك من البطاله فكون انك تصرخ وتقول اليى انتا عايزه لا هو جنون ولاا حتى فعل فاضح

romansy يقول...

اللى بيتكلم دلوقتى اى كلمه لازم يتقال عليه انه مجنون ومش فى وعيه بس احنا فعلا نتمنى الخير للبلد
الجميله اللى احنا فيها

mahasen saber يقول...

بس بعد الشر عنك يا ابنى من النكد والحزن والنهايه اليى حساها فى كلامك ده

ربنا يبارك فى عمرك ويسعدك فى مستقبلك

قول امين بئه

عارف مدونة الصور اليى عاملها مع سمسم بنت الشمس تحفه انا برضه قلت بصماتك فيها يا مجرم ..مجرم دى بمناسبة البصمات يعنى مش شتيمه..

اوعى تزعل نفسك يا لذيذ يا رايق ربنا يصلحلك الحال ان شاء الله

دعاء العطار يقول...

مااعتقدش خالص يامحمد انك مجنون

انت بتعبر عن احاسيس كل مصرى

هل كل مصرى مجنون ؟

بس اللى بجد عايزه اساله

تتوقع انهم لو قروا كلامك ده هياثر فيهم ؟

مااعتقدش انهم بيهتموا بمشاعر المواطن المصرى

او بمعنى اصح مش بتاثر فيهم

صوت من مصر يقول...

نهر الحب
انا قولتلك ملقتش ميل عشان اسمع النصيحه
بس محتاج اسمعها فعل
تحياتى ليكى

صوت من مصر يقول...

رؤية
نعم انها معجزه لكنها مش هتدوم كتير
لانى مش لوحدى بتكلم فى ملايين
ملايين عندهم كبت
وهينفجروا
شكرا

صوت من مصر يقول...

mahasen saber
مش عارف انا سميت البلوج صوت من مصر على اساس ان ممكن فى الايام يكونلى صوت الناس تسمعه فعلا الناس سمعت وقالت عليا مجنون لكن ليه فعلا بطاله وقرف ومحسوبيه وتخلف وجهل وفقر
عندك حق اشكرك لانك عارفه انتى بتكلمى مين

صوت من مصر يقول...

romansy
يا ريت برومنسيتك دى ترسملنا صوره لمصر جميله بعيد عن قرف الحكومه
شكرا ليك يا شاعر من قلب الوطن

صوت من مصر يقول...

mahasen saber
امين بقى
بس للعلم انا مزعلتش بس البلوج اسمه صور من مصر مخدتيش بالك انها فكرتى وانى انا الادمين مش غرور او تباهى بس حسيت فى تعليقاتك هناك انى مش موجود
واتمنى انك تكونى معانا
ياريت

صوت من مصر يقول...

dodoo
دودو انا مش محتاج تعليقك
انتى دايما رافعه روحى المعنويه
هقولك ايه مش لاقى رد لتعليقك

Unknown يقول...

اكتب
اكتب
اكتب
وانا هتابعك وكلنا هنتابعك
لأن مش انتا لوحدك اللى بتتكلم فى الناس دى
كلنا بنتكلم لأننا شايفين حاجة غلط
بس احنا بهوية ، هويتك انك بدون ، يعنى ليك كلمتك ، كل كلمة بتقولها انتا عارف هيا طالعة ليه ولمين وازاى

ميهمكش حد واكتب ، احنا ضد الغلط
ومتهيأ لى حكومتنا غلط فى غلط

رحلتنا في الحياة يقول...

لا انت مش مجنون ابدا انت فى قمة العقل وياريت كل الناس تكون عاقلة وتعرف تتدافع عن بلدها وتحس بهمومها

خالتى بمبة يقول...

انت مش مجنون بس متشائم قوي لكن كلامك صح 100%

mohamed يقول...

بالعكس انت العاأل الوحيد اللي فينا:(

محاولة لكسر الصمت يقول...

لو قررنا ان نفعل أي شيئ حتى لو كان خطأ لمجرد ان مبارك لا يفعله فسيكون لدينا الكثير من الأخطاء لنفعلها...
أما جيفارا فقد كان يدخن كي يطرد الناموس الذي كان منتشرا أثناء اختبائهم في الجبال الكوبية, أرأيت حتى التدخين كان من اجل الثورة...
تحياتي...
..على فكرة ... أول تعليق على مدونتي كان لـ (صوت من مصر)..

Unknown يقول...

يا سيدى ربنا بحفظك و يحميك و سؤالك بنسأله لنفسنا كل يوم و مش لقينله إجابة

صوت من مصر يقول...

اصحى يا مصر : اسلام ديو
للاسف يا اسلام هكتب ولومليون كتاب
كفايه انك تقرالى ده شرف كبير ليه
بجد شكرا لتحميسك

صوت من مصر يقول...

ايوشة
ياريت يا ايوش بس الواحد هيعمل البلد بقى فيها حاله لا مبالاه
ع عبد العال
صح
شكرا

صوت من مصر يقول...

ايوشة
من عينى والله التدبيسه دى
بس البوست الى جاى هيكون تاج
موافقه

صوت من مصر يقول...

خالتى بمبة
انا مش متشائم بس واعى للحياه هنا فى مصر
اشكرك لحضورك مدونه الاكتئاب

صوت من مصر يقول...

mohamed
ياعم لوده عقل تبقى مستشفى المجانين فاضيه خالص
شكرا ليك

صوت من مصر يقول...

محاولة لكسر الصمت
بقيت استنى تعليقاتك جدا جدا
واحب اقولك انى بولع السجاير عشان الدخان يمنع الناموس برضه لانى عايش فى غابه غابه كلابها ديابها على راى الشيخ امام
ودى طبعا فرصه متتعوضش انى اكون اول حد علق عندك فى دواير
وانى اول تعليق ليا يكون عند دواير
وللاسف مبارك غلط ولو الغلط نصححه بغلط يبقى شىء وقح لكنى بصححه بشعبيه بفول وطعميه مش احزاب ووجع دماغ فكك من الاخوان ومن الوطنى لا دول بيفهمواولا دول
كل واحد عايز مصالحه الشخصيه وبس
الله يرحم كل مناضل من اجل الحق وبس ؟

صوت من مصر يقول...

عاليا حليم
ياه سؤالك بنساله كلنا سؤال بساله ايه اخرت الاحلام
انا بحب منير وانتى بتحبى حليم
للاسف يبقى مش هنلاقى رد لاسالتنا
اشكرك
ويارب يصبرك على ذكرى وفاته الى اتنقت من الدش كله بسببه

Rania Lelah يقول...

للاسف مجتمعنا بقى غريب فعلا يا محمد
مجتمع للاغنياء حذف الفقراء و اختفاء الطبقه الوسطى حقا
لست مجنونا و لكنك انسان يحب و يعشق بلدة و يتمنى ان يصبح معروف الهويه فقط

تحياتى

احمد سعيد يقول...

صباح الخير بالليل يا معلم

لا تتعجب هذة مصر

هههههههههه

كله ماشى بالشقلوب يا كبير


صباح الفل


ونورت مدونتك يا معلم

دا اللى هو انا طبعا

هههههههههههههه

لا بجد ربنا يوفقك

اخوك الكبير حلاوة

رحــــيـل يقول...

شوف هو انا عجبنى قوى
ام سنصبح صداع دائما فى راس الحكومه
لانه فعلا كده

انت مش مجنون ولا حاجه بس اللى عايزه اقولهولك انهم لو حتى قروا اللى انت بتكتبوا ولا هيهتمو اصلا ولا فى دماغهم مهم عارفين كل ده بس مش شئ مهم ليهم

تحياتى لك

Hanan Elshafey يقول...

محمد
التغيير مش بعيد عنك بس محتاج محاولات كتير والكلام برده مش بعيد لكنه بس صدي ملوش تاثير
واذا كان جواك كل ده واصله انتماء
يبقي مين بقي اللي يكون صاحب الهويه

تحياتي

صوت من مصر يقول...

Rania
من منا يمتلك هويه يا رانيا ارفض الظلم حتى ولو كان من بلدى تجاه الاخريين لكن عندما تظلم بلدى اظلم نفسى حتى ارى من هو الظالم
تحياتى

صوت من مصر يقول...

احمد سعيد
يا كبير والله فعلا انت نورت البلوج
بس مصر مش مشقلبه هما الى شقلبوها
تحياتى ليك ولكل من شقلب البلد

صوت من مصر يقول...

رحــــيـل
احنا هنفضل صداع فى راس الحكومه ولا ايه
هما فعلا مش حاسيين بالوجع لانهم ضاربين الله اعلم ايه

صوت من مصر يقول...

حنان الشافعي
يا حنان لوكلامى ملوش تاثير يبقى فعلا انا بلا هويه
شكرا

احمد سعيد يقول...

هههههههههه

ونا مالى يا عم

هو انا اللى شقلبتها

انا مش معاهم

مش معا اللى شقلبوها

انا مع الناس التانيين

DoNyA يقول...

من الذكاء ان تلهي الشعب بأنه يدور علي لقمه العيش والرزق
علشان ميشفش اي حاجه تانيه
او يعترض علي اي حاجه او يقول رأيه في حاجه

واكيد انك حد من الناس الفايقين دلوقتي مش معصورين في دوامه الحياه
يبقي تسمحلي اني اقولك
انك اكيد من القله المجانين الموجودين في العالم
لكن صدقني الجنون مش دايما بيبقي مرض

مودتي

سجود يقول...

السلام عليكم ورحمة الله وبركاته
اسفه طبعا علي التاخير الطويل ده
بس احب اقول ان اللي بيقول الحق يبقي عايز لبلده الوصول الي اعلي ما هي عليه ده اكيد لكن اللي بينافق تعرف ان هو مش بيحب البلد ولا حاجه
لكن احب اطمن حضرتك ان ده مش جنون ده قمة العقل وقمة الوفاء والحب للبلد لكن مين يقدر بقي