الثلاثاء، ١٧ فبراير ٢٠٠٩

امتى يموت ونخلص


نظريه محتمه بحته عقليا
سؤال نساله لنفسنا ؟
مين هيحكم مصر بعد حسنى مبارك ؟
اسف لانه لازم يموت لانه مش اله صح كده اه هو معمر جدا بس هيموت باذن الله عنده قصور فى الدوره الدمويه مش قادر يتحرك ولسه عايش
المهم السؤال بيقول من هيحكم بعده
مش لاقى اجابه
بس ليه منعملش ساعتها انتفاضه ونننزل قرار انه ميبقاش لينا حاكم
لا غلط لاننا شعب منمشيش غير البكرباج صح المهم مين هيحكم
انا عن نفسى هنتخب كرومبو اهو جامد طحن ومش بيكدب ومش بيسرق وكمان معاه قرشين كوييسين من الاعلانات فصعب انه يفكر فمال الغلابه صح
المهم جه فى بالى حاجه اسمها اقرار الذمه الماليه بيكتبها كل وزير او رئيس جمهوريه او شخص فى منصب كبير
هل مبارك مضى على اقرار الذمه الماليه ولا هى كوسه ولا تلقيه كاتب لاعدى له عشان لو مات مولاده يطالبوا الدوله بالى ليهم
يا جماعه بجد انا اتخنقت طب ممكن سؤال للرئيس المبجل المحترم محمد حسنى مبارك ؟
هو انت امتى ناوى تموت او تنتحر ولا هى الدنيا حلو معاك قوى كده
طب ليه الدنيا وحشه معانا
ياعم سيبك انا مواطن مطحون تحت ترابها بكل معانى الحياه

هناك ٢٦ تعليقًا:

أختكم فى الله يقول...

أنا سعيدة بإنى اول تعليق بعد الغيبة دى كلها

اعذرنى والله غصب عنى

معتقدش ان حد بيؤعد عالكرسى ويقدر يقوم تانى الا لما يموت متعرفش بقى الكرسى مريح ولا ايه

جزاك الله خيرا

kmt يقول...

السلام عليكم ورحمة الله وبركاته

هههههههههههههههه
بجد ضحكتني
يابني دي امنية كل مصري بجد
بس هو زي ماتقول لما الشعب يتربي ويعرف حقوقه و واجباته اخينا هايكون ميت مش حي

والله وحشني كلامك يابني
يارب تكون بخير

تحياتي
الى اللقاء

وردشان smilyrose يقول...

طب والله كويس

ايه يابنى انت زهقان منه للدرده دى

حرام عليك الراجل لسه صغير وبعدين

بتتمنى له الموت ولا ايه عيب

الراجل يادوبك بيقول يا هادى


وبعدين الكرسى مريح ومتبطن وكمان

مفيش مشاكل ولا ازمات ماليه

ولا اى حاجة والحياة حلوة

يبقى هتموته ليه

شكلنا كدا هناكل عيش وحلاوة قريب

عيش ايه دا فيه ازمة خلاص خليها باتيه وحلاوة

smilyrose

روح الحب الصادق

حزينه يقول...

عارف
كتير بقول انى مش حموت الا بعد كتير لانى وحشه
وعرفت ليه بردة حسنى مبارك لسه عايش

حزينه

صوت من مصر يقول...

اختكم فى الله
كويس انك وصلتى والحمد لله طب اتفضلى اشربى حاجه
المهم يا ستى ممكن حد يقعد ويقوم من على الكرسى عادى بس الاهم انه يكون انسان كويس تانى حاجه هو من الاخر عمل لزق على الكرسى قبل ما يقعد عشان ميقدرش يقوم منه تانى ولا حتى بميه سخنه ولا ايه ؟

صوت من مصر يقول...

kemet
حلوه وحشنى كلامك كانى بقالى كتير مهزقتوش صح
بس الاهم انه يفهم ويقوم بس احنا عارفين بس زى ماتقولى كسل بقى
هو ده الشعب المصرى بجد

صوت من مصر يقول...

smilyrose
سؤال انتى مش زهقانه منه ولا هكون لوحدى
وممكت بدل العيس توست احنا مساجين سياسيين بنكلم فى السباحه صح ؟

صوت من مصر يقول...

حزينه
طب هو انسان بايخ ورخم
لكنك انسانه كويسه ايه وجه المقارنه

د.خالدأمين يقول...

بص ياباشا

انا هعلق واجري


علشان متاخدش عند ابو علاء واموتانا قبله

سؤالك مالوش اجابه لان احنا بجد مش عارفين مين اللي هيحكمنا
لافيه نائب رئيس
ولا زعيم قومي كده حلو ومعسل
ولا حتي رئيس حزب ولا اساسا حزب خالص

بس انا سعيد

مش عارف ليه
بس سعيد


استاذن

محاولة لكسر الصمت يقول...

(امتى يموت ونخلص؟؟)
.......ومين قال انه لما يموت هنخلص؟؟؟؟؟

دعاء العطار يقول...

انا دايما يامحمد بسأل نفسى السؤال ده

مين يقدر يمسك الحكم بعديه ؟؟؟؟

وللاسف مش بوصل لاجابه

ممكن لاننا مفتقدين الرمز فى البلد دى

مفتقدين الاحساس بان شخص ممكن يحمل همومنا ويعيش عشانا وعشانا وبس

وممكن لافتقدنا للاحساس بالامان

لاننا حاسين ان كل اللى هيجى هيبقى اسوا

عامة انا موافقه انى انتخب عمك كرومبو

بس انا بقول ندخل معاه سرحان جوز نفيسه عشان مايزعلش هو كمان

ايه رايك بقى ؟؟؟؟؟

صوت من مصر يقول...

د.خالدأمين
ياعم متخفش
وعموما نورتنى جدا
اوعى فى سلمه مكسوره احسن تزحلق وانت بتجرى

صوت من مصر يقول...

محاولة لكسر الصمت
عارفه يا دواير نفس تفكيرى بس ادعى ان ايمن نور يكون ليه كلمه الراجل ده محترم

صوت من مصر يقول...

dodoo
عارفه للاسف بكره سرحان ونفيسه
بس يا دودو هو انا منفعش رئيس عليكم ابدا صح

Unknown يقول...

الريس يمرض ولا يموت
عيب الكلام ده
هشتكنا و بشتكنا يا ريس
و كمان كمان يا ريس

لما يموت احتمال الشعب يموت وراه من الفرحه

M.a.r.y.o.o.o.m يقول...

يحيا التوريث
ولا للعنصرية
وبعدين قولي انت مش خايف علي نفسك ولا ايه ليعملوا فيك زي المدون جدا
تحياتي

M.a.r.y.o.o.o.m يقول...

قصدي المدون جاد

صوت من مصر يقول...

EmY
انا اول واحد هموت من الفرحه
بس قوليلى هيبشتنكنا ازاى

صوت من مصر يقول...

maryooom
للاسف مش خايف ولو خفت مكنتش كتبت الكلام ده صح ولا ايه
تانى حاجه المدون جاد شاب يفتخر به ارجو منك التدعيم وليس لى فقط بل لكل مواطن يحتر حقوق بلده

Unknown يقول...

كتير بسأل نفسى الاسألة دى بس بتبقى باجابات خايفه قوى
بحس انه لو مات هتحصل مهازل
واطماع وعيون كتير هتتلفت لينا
احيانا بحس انه بحسه عامل حاجات غريبه
ساحر
اتعودنا عليه
منعرفش غيره
وربنا يستر كلامك جريئ جدا

صوت من مصر يقول...

اسماء جمعه بنت الشمس
للاسف انا مش جرىء ولا جبان انا بحب مصر بشغف لا اكثر

ريمان يقول...

السلام عليكم

ههههههههههههههه
لا لا مالكش حق بجد

حد يقول كده على بابا مبارك


تؤ تؤ تؤ

ده هو اللى جابلنا النقطه

وهو اللى جاب الفقر لمصر

وهو اللى مجوع الشعب

وهو اللى مكرهنا فى الدنيا

وهو اللى سارق فلوسنا

تؤتؤ

دى افضاله علينا كتييييييييير

لا لا عييييييييييب

مش تقول كده تانى


لا لا لا

Gannah يقول...

ازيك يا محمد؟؟
الله أعلم يا محمد..الأعمار بيد الله
بس السؤال
هل انت شايف فى المرشحين من بعده أمل؟؟
يعنى هل حد فيهم قلبه على مصر بجد
هل حد فيهم هيعمل لمصر اللى عمله ماهتير محمد لماليزيا؟؟
وهل حلنا فى موت الرئيس ولو فى تفكيك المافيا الكبيرة اللى خربت مصر واللى مسكاها بقبضه من حديد
مشكلتنا بقت اعقد من انها تختزل فى شخص واحد
ولا ايه؟؟
تحياتى

صوت من مصر يقول...

ريمان
طب ده انتى الى عندك حق كلامى هيجى ايه جنب كلامك
شكرا للافاده

صوت من مصر يقول...

Gannah
للاسف يا دكتوره الحاكم بيحكم على الكل بس هنا بيحكم على الناس الى بتحكمنا بس لكن مش بيحكم علينا لاننا بالنسبه له
تراب او هوااااااااااااا
يعنى نقدر نقول ان العمليه لو اتغيرت فى شخص منه لشخص كويس هتتغير العمليه كامله

kmt يقول...
أزال المؤلف هذا التعليق.