انا والتركى صحاب للابد

صورى

دى صوره حسين اتركى اخويا وصحبى

شعبولا جالى فى المنام

وهبطل سجاير وخلاص هشيل حديد غناها المطرب الوطنى الكبير شعبولا حبيب قلبى انا بقى مشيت على النظريه دى لكنى واضح انى فشلت ومع ان حسين صحبى هو الى غوانى عشان نلعب حديد لكنه برضك بطل وبقينا احنا الاتنين ابطال كده زى ما زينجر واوعى تضحك لما تشوف الصور دى صور اتنين كلهم فعلا ابطال زى اسمه ايه بتاع المصارعه اه كرم جابر كان نفسى امثل مصر فى الاولمبياد بس رجعت لحبيبتى كوكو الضعيف السجاير المصرى لانها ما بتخلص بسرعه زى المرلبورو الاجنبى وبعدين لازم نشجع منتج بلدنا ولا ايه دى بقى صورى وانا بلعب حديد ولا زمن يا حديد ؟

بموت فيك يا حمار

بحبك يا حمار ولعلمك يا حمار انا بزعل اوى من الى يقولك يا حمار فعلا سعد لصغير مش غلطان بعد التركيز فى الاغنيه جامد جاتلى فكره كولللل جامده طحن وهى حمار دوت كوم يعنى موقع متخصص بالحمير يعنى زى ما بنفضل الكلاب والقطط والبنى ادم نهتم بالحمار ونقول للعربجيه شايفنكم عشان محدش منهم يعذب الحمار الى مستحمل منذ خلق الوجود تخيل بقى اننا نعمل ماسبقه لملكه جمال الحمير لكل عام وافضل صوره للحمار ونعمل برضه خط للخاطبه يعنى للحمير الى عاوزه تتجوز يعنى يريت يكون رقمه 19777 وده هيكون سهل جدا ونعمل ليهم نظام غذائى والى عايز يشترك فى حركه شايفنكم يا عربجيه ياريت يكلمنى وميتكسفش احنا ليه نسيب الحمير تتعذب ياريت تشوف الاستاذ صاحب العربيه الكارو بيعمل ايه فى الحمار انا عن نفسى مش هسكت وبحبك يا حمار

نفسى اكل قطن واحلى بمرهم

دبوس ده الاسم الحركى لحاجه بتشك وليها سن كما قال التعريف لهذا الشىء تخيل الشىء ده يبقى جوه بطنك من الاخر انا بلعت دبوس معرفش ازاى والله

ايه رايكم احكلم الحدوته دى

كنت قاعد بتفرج على برنامج يا مسهرنى على دريم بتاع انجى على والضيف كان احمد السقا وقبلها كنت واكل من عند سيد تلوث ودى اكله اشتهرت جدا فى المطريه المهمكنت بسلك سنانى وارخم على اختى معرفش ليه برخم عليها بس رخامه وخلاص المهم فجاه اسال نفسى هو الدبوس راح فين وعمال ادور عليه وفجاه اختى بتقولى مش ممكن تكون بلعته (بلعته) يعنى ايه فجاه وجع غريب جدا والله اول مره احس بيه المهم اكتشفت انى بلعت الدبوس بتاع الطرحه اجرى بسرعه واروح للاجزخانه وقبل ما اوصل اكتشف انى نسيت اخد فلوس معايه والاعجب الدكتور يقولى اجرى على المستشفى وفعلا روحت ومعايه اتنين صحابى وقبلت الدكتور وقالى مفيش مشكله واقوله انا بتكلم بجد انا بالع دبوس لدرجه المستشفى كلها بتقولى كلمه انا بتكلم بجد من كتر تكرار الكلمه قالى هنعمل اشاعه على صدرك

قولت تمام فى امل انى اشوف صدرى السجاير عامله فيه ايه عملت اشاعه ومش واضح شىء غير ان الدبوس وهو نازل المعده عورنى عملى جروح فى المرىء انا اتجننت وقولت وبعدين لاقيت الدكتور بيقولى كل فينو كتير وحاول تاكل اكتر وممكن تاكل قطن ولقيت ناس بتقولى كل قطن بعسل اسود

من كتر الخوف جالى احباط وقررت انام وصحيت الصبح ولقيت تليفونى عليه رقم ندى حبيبتى ومش مصدق انى مكلمتهاش وطبعا معييش رصيد اكلمها وطبغا كل ده بسبب دبوس

اكتشفت بعدها ان الرخم فى الى ارخم منه زى الدبوس

وعجبى

ضحكت يعنى قلبها مال

اقول من تانى بحب جديد بحب ياعالم بحب ياهووو يا اخونا الموضوع ده المرادى مش هزار ده بجد حتى انا حاسس ان حياتى دلوقتى متقلبه مع الشتا اللذيذ الى بموت فيه من البرد مع ذاللك بحب اعيشه بيفكرنى بزمان واه من زمان وسوسه سوسه كف عروسه اوعى تقولى مش فاكرها وافتكر كمان اول بنت كلمتها فى حياتى كنت صغنون جدا كنت فى الاعداديه السنه التانيه تخيل ولا كنت بشيل هم فلوس ولا حتى اى شىء ابتديت احب من حوالى اسبوع افكر فيها واقول طيب ازاى دى اكلمها مش عارف واكلمها ويخلص الرصيد واقعد اعيط من الغيظ لانى فى اخر المكالمه كلمتها مش كويس واتنرفزت المهم انا حاسس انى بايخ وطولت عليكم زلا اقولك اكمل احسن لو عايز اقولها بحبك ممكن اقعد 8 ساعات اقولها مقدمات وربنا يبارك فى عمنا نجيب سويرس المستفيد الوحيد من قصه الحب الجديده ممكن حد يقولى اعملها ايه عشان منتكلمش فى التليفون تانى

الشتا وانا

والله انا فعلا مش عارف انا هكتب ايه هنا بس الشتا دخل وفى الشتا احب اسمع فيروز بحب اشوف طلبه المدارس وارجع بالذاكره لما كنت فى المدرسه واضحك على نفسى جدا واقول ساعتها كنت بفكر كنت هاوى رسم وخزف وفعلا كنت مميز فيه اما حاليا فانا لا شىء سوى انى بحب اسمع اغانى وانام متاخر ومبعملش شىء مفيد ليه مش عارف بس لسه زى مانا اتفرج على كارتون واسمع ابله فضيله ومبعرفش اعاكس بنات بس فى شىءانى اصبحت جرىء فى المسئله دى ولازم ابلور نفسى طبعا مع المود الجديد الصحاب اتغيروا وكان حياتى كلهااتغيرت مع صحابى الجدد وارجع افتكر سور المدرسه اى انا هربت منه الف مره او اكتر بشويه واقعد بعدها على القهوه واشرب شيشه تفاح واقعد اكح من التعب واخر اليوم اروح وانا وبعدها اصحى واروح الدرس وارجع انام بس كنت برسم افتكر المطر الجميل لما كان بينزل وانا قاعد فى الفصل واسمع صوته واحب انى المس الميه بس كنت بحس انى محبوس حاليا صعب المنال فقدت قيمه اللذه فى المطر وفقدت قيمه المدرسه كانت فعلا احلى مراحل حياتى بجد بجد ؟

وبعدين الله اعلم

الحب كده

الحب كده من افلام احمد السبكى او عائلات السبكى المهم وبامانه انا شفت الفيلم ده الف مره بس فيلم من بلاد بره
بس فعلا كان فيلم بس توب قصته انه شاب بيحب واحده وبعدين يلاقى معاها ولد وبنت نفس فيلم الحب كده وبعدين تقولوه لازم تروح بيهم فى حته بعيد كانت كالفورنيا الى هيا الصعيد بالعربى فى فيلم الحب كده وميركبوش قطر ولا طياره لازم يركبوا عربيته الغاليه ومن هنا تحصل مواقف
بامانه احنا فعلا بقينا فى عصر ؟
ولا بلاش
الحب كده ولا ايه

حد يشوفلى حل بجد ؟

اول مره بجد احس انى مكتئب مش عارف ليه بجد

الحكايه سهله جدا ومريحه بس انا مش هفهمها طبعا يوم العيد جالى تليفون من اقرب الناس لقلبى ( حبيبتى ) المهم خرجنا وكان يوم كله صراحه قلنا لبعض على الحقيقه بجد من غير خوف كان بقالى فتره مشفوتهاش مكنتش خايف زى كل مره اكلم فيها بنت عملت بامنه حركات كتيره غبيه تصرفاتى كانت مريبه مش عارف ليه كنت فعلا غبى غير كده بعدها جالى توقف عن التفكير لمده اسبوع وحاسس ان فى افكار كتير بس ملهاش حل ولا مكان لانها تتطلع لان مفيش اصله فلوس عشان تتنفذ اصحابى قالوا عليه رخم لانى مبهزرش زى كل يوم وفى يوم حسين صحبى اخدنى معاه المعهد وهناك فعلا زاد الاكتئاب لانى كنت حاسس انى لوحدى فى عالم تانى من كتر شرب الشاى والسجاير كنت حاسس انى خلاص هتطلع دخان من جوايه ناس كتير قالوا عنى انى فعلا منفعش ادخل البرتى بتاعهم لانى هزارى قديم جدا حسيت ساعتها انى فعلا مش كول خالص وقررت اتعالج بس ازاى وامتى مش عارف انا ممكن اشرب عشان ابقى زى الناس التانيه ولا ايه ؟ المهم الاغرب انهم كل واحد منهم كان قاعد مع الموزه ومش فاضى يقعد مع واحد زيى مع انى ضيف بيسمعوا اغانى مبحبهاش انا بحب محمود العسيلى وجوليا بطرس وفيروز بس هما بيحبوا سعد الصغير مثلا وانا بامانه مبحبوش

كل ده ومش عيزنى اكتئب

ولا عايزنى اروش ؟

شنطه المدرسه كان فيها ايه؟

الشنطه دي فيها إيه ؟
( مطوتك في جيبك قلمك في أيدك والى يقولك غشيشنى قطعه وأربعه جنيه بعد الامتحان هات لك ازازه بيرة ) قالتها فرنسا للمبى في فيلم اللمبى طبعا الغريب إن دي حقيقة ومحدش طبعا هيصدق شنطه ألمدرسه ممكن تشيل فيها حاجات ومحتجات البنات دايما ماكياج والأولاد طبعا كوره ده غير الكتب إلى متتعداش الكشكول إلى لكل صفحه ماده يعنى انجليزى أخر صفحه والعربي ألصفحه الأولى وهكذا ؟ المهم ممكن نلاقى اغرب في الشنطه بس هي تتفتش
خمره وصور عريانة
تخيل ممكن تشيل زجاجه خمره داخل شنطه ألمدرسه طبعا مستحيل احمد فهمي طالب في جامعه أسيوط كان شايل معاه كوب و ثلاثة زجاجات خمره من النوع الرديء أبو عشره جنيه ونص جوه الشنطه وده كان يوم راس ألسنه ويقول انه جمع من كل طالب خمسون قرش عشان يشترى ألخمره الفصل كله كان موافق و الأكثر من ده انه لأول مره كان معاه شنطه في الفصل وكانت شنطه أخوه الصغير وطبعا المدرسين مكانوش بيدخلوا الفصل أصلا
محمود قال اغرب من ألخمره كان رايح بشنطه هداية وهو في اعدادى ودخل موجه لغة عربيه وكان متدين وفجاه كان في واحد في أول الفصل ومعاه اجلسير عليه صوره نوال الزغبى وكأنه شاف عفريت مرسوم على الاجلسير وقال هشوف شنط ألطلبه وعدى على الفصل واحد واحد لحد انه وصل عندي وشاف ألصوره إلى على الشنطه وبصوت عالي يقول ( طالب في اعدادى وشايل شنطه عليها صور سكس ) والفصل كله قعد يضحك عليه وأنا طبعا كنت في نص هدومى الكلام ده طبعا كان في اعدادى وفى الثانوي مرحتش ألمدرسه أصلا عشان بكون نايم طب ليه اشترى شنطه
ابتدائي عذاب طبعا
الشنطه بتختلف من سنه إلى أخرى ومن مرحله إلى أخرى في ابتدائي تحث انك شايل حمولة حديد مصلح على ظهرك رنا تأكد الكلام ده طبعا كانت بتفرح جدا لما تخرج تشترى الشنطه وتقعد تلبسها قبل دخول المدارس يوميا عشان جديدة وشكلها جميل وبعد دخول ألمدرسه تبدأ ألمعناه كل الكتب في شنطه وغير كده كراريس وطبعا مدرس العربي يقولك حوالي سبعه أنواع كراريس تخيل انك شايل كل ده وأنت لسه عندك حوالي عشر سنين مش هتتعب وليد رد وقال أنا كنت لازم أخد الكتب والكراريس كلها لان لو نسيت حاجه هتبقى كارسه وضرب على رجلي وبصراحة بحسد الجيل الحالي لأنهم ممنوعون من الضرب في المدارس
الشنطه كل ما تكون لونها أغمق تكون أشيك وعلى حسب دماغك ولازم ولابد تكون كبيرة عشان تتحمل الكتب الكتيره إلى هتتواجد فيها
ماكياج وبرفان وكوره
قبل دخول ألمدرسه الصبح يكون شكلك جميل جدا وبعد ألمدرسه يكون شكلك أحلى شنطه كل بنت وهى رايحه ألمدرسه الثانوية لازم ولابد أن يكون فيها روج وروجاجو وبودره تفتيح ألبشره وبرفان ولو لزم الأمر ممكن بلوزه عشان محدش يعرف أنى في مدرسه رحاب طالبه في مدرسه تجارى رحاب يوميا تاخد معاها ألمدرسه شنطه ألمدرسه بيكون فيها كشكول وقلم وشنطه ماكياج وكل ده عشان المظهر قالت رحاب أنها تاخد معها الماكياج في الشنطه عشان بتنام في الفصل ولما تصحي هيبقى شكلها زباله طبعا مش هينفع تخرج كده من ألمدرسه وفى أخر اليوم قبل ما تخرج من ألمدرسه تعمل ميكاب كامل والشنطه أصلا مش شنطه مدرسه دي شنطه خروج لان المظهر مهم احمد حليف الكوره بيروح ألمدرسه بدري عشان يقدر يلعب كوره في الملعب قبل الطابور بحوالى نص ساعة الشنطه كبيرة عشان تشيل الكوره والكوتشى الباتا بتاع زمان ومتلاقيش ولا كتاب واحد واحتمال تلاقى قلم ومبيكتبش المهم انه لعب كوره وخلص لعب والطابور بدا يخرج جرى من ألمدرسه عشان يستنى قدام مركز الشباب لحد ميفتح الساعة تسعه ويكمل لعب وفى أخر اليوم يروح البيت ويذاكر كويس عشان ينجح ويذكر أيضا أن الشنطه ممكن تشيل بومب وصواريخ لإفزاع المدرسين
الشنطه أشكال وبفلوس
الشنطه إشكال كتيره بعد الكليب الشهير تملى معاك لعمرو دياب ظهرت شنطه عمرو دياب وكان بيد واحده وكان ثمنها من خمسين جنيه لحد تسعين وليد يضيف في كلامه انه أول ظهور الشنطه في الكليب يرتديها عمرو دياب اشتريتها بخمس وستون جنيها نظرا للموضة وبعد أسبوع من ألمدرسه بقيت أروح ألمدرسه بكشكول في ايدى بس لكنى اشتريت الشنطه الشنط زمان غير دلوقتى الموضة دلوقتى شنط سبور جدا على الشنطه رسامات للمشاهير مثل بوب مارلى وجيفاره واشهر لاعبي كره القدم زيدان وبيكهام وهنرى وأيضا أبطال ألمصارعه ألحره باتستا وجون سينا والشنطه ثمنها ثلاثون جنيها عم احمد نزل يشترى شنط ألمدرسه للأولاد بيقول ( اشترى شنط ولا ملابس مدرسه ولا ملابس عيد ولا ياميش رمضان ولا و ولا الدنيا أصبحت صعبه جدا عشان الغلاء إلى حصل كل حاجه بقرشين بدل قرش ) تفتكر شنطه مدرستك كان فيها إيه ؟

فخور بأنى مصرى لكن اريد ان اكون سودانى

منذ قليل قرأت موضوع عن السودان وفعلا لم اعلم كل هذا عن السودان امنت بانى اريد العيش هناك

شعبها اصيل لهم عيب مثل اى دوله عربيه الخليجى مغرور والمصرى مغلوب على امره والسودانى كسول لكن ننظر لهم فيما فعلوا الجنيه السودانى الان يساوى ثلاث جنيهات مصرى ؟

هههههههههههههه دى مش نكته دى حقيقه العربيات الملاكى هناك اقل موديل موديل 2000 يا بختهم طبعا عندهم الزرع مفهوش مبيدات لانهم مبيتعاملوش مع الصهاينه ( اسرائيل) طبعا الى احنا بنتعلم منهم الزراعه

كفايه ولا اكمل شكلكم زهقتم السودان كل حاجه فيها فعلا حلوه حتى الدين بجانب قصر الرئاسه ترى عمر البشير يلقى خطبه الجمعه تخيل ان الرئيس بتاعك هيظهر على التليفيزيون هتبقى معجزه اصله مش فاضى معاه معاد مع كوندليزا رايس فى القصر ؟

كفايه بأمانه

دى اجمل صوره من بلدى